Vapositili 5
5
1Pwale ujyunge umunu uvi ale vi Ananija ilitavwa, undala va mwene ale vi Sapila. Vwu vakagutsa ikinge ikilunga kyavene. 2Lola indalama itsu vagulaga tsu vakidiṅana vakata tudapulanyage. Pwu itsinge Ananija akatsivika kumalunde kuvapositili. 3Pwu umwene UPetele akatsova nave akata: Ananija adigile kiki USetano munumbula jyako atye untekage UMego umbalatse, atye uvusage itsinge indalama tsa kilunga ikyu kagutsaga. 4Palya vwukanale ukugutsa nda nakyale kyako? Apene upwu kagutsaga, pwu indalama nda natsale tsako? Tsu vwisagye kiki tsitsitsi munumbula jyako? Ulatetsaga pange ututekile twi vanu, bako untekile Unguluve. 5Umwene Ananija vwu apulike amameńu aga pwu akagwa pasi akatsilika. Pwu voni avapulikaga tsitsitsi vwu lukavavona uludwado lwu lwongosu sitso. 6Pwu avalume vakima vakangaha vakampimba vakahuma nave vakatsikunsila.
7Vwu tulutile utuvalilo tudatu, pwu akingila namwene undala umwu vale. Lola umwene natsimańe itsa ngosi. 8Pwu UPetele akambutsa akata: Umbule ndeti ikilunga kińo vwu ngahile vuvule-vule ukukavilamwo? Umwene akata: Ena vwu tugahile vuvule-vule. 9Umwene UPetele akata: O humbe mwidiṅine mutye tungelage UMepo va nkuludeva? Nda navupulika unsindo gwa malunde ga vene avali pakunsila ungosi vako pandyango apa? Viva pakukupimba nuve lino. 10Pwu umwene akagwila mmalunde ga Petele baho vuvule namwene akatsilika. Vwu vikwingila avalume vakavona namwene aswe. Pwu vakampimba vakahuma nave vakatsikunsila upwu vale pakunsila ungosi. 11Pwu uludwado lwu lwongosu sitso lukagugwila umpelela gwoni navanu voni avapulikaga tsitsitsi.
12Agene amavoko ga vapositili gakapela isidego nisipelwa sisyongosu vwu vilola avanu. Avene sikutsoni vakulundamana voni nduhengo lwa Selomoni, vakava numbula mamato jyene. 13Mańa avange avanu vakadwada ukuvapwo ujyunge uva kuhanga navo, bako voni avanu vakavimika. 14Avene avamwidikaga unkuludeva vwu vakongeletsa vunnonu ukuhegelela vavongosu navagosi navadala. 15Pwu tsikatengula baho itsa kuvapimba avatamu itsa kuvavika munzila pavugono napasipimbilo sya vene vakata UPetele angave iluta pwu umwitsitsi gwa mwene guvasyikage avange. 16Vakakuluka ukubiha mu-Jelusalemu vavongosu nava mbutsenge vwoni uvuli mbwipi vakalundila mumwa. Vakavagega navatamu nuvwu imepo imbivi tsavagatatsaga. Pwu voni vakapona.
17Pwu vakima nunteketsi umbaha navanine voni, va va kapelela ka vasatukai, akavini kakavapelela uluvipo. 18Pwu vakavibata avapositili vakatsikuvadindila nńumba jya vańololo. 19Umwene unsuṅwa va nkuludeva akadindula kundyango gwa ńumba jya vańololo pakilo, akavahumya akavavula akata: 20Mbihage nkimage pavuvalusu mwa Tempeli, nkavavule avanu tsoni inongwa tsa vwumi uvu. 21Avene vwu vapulike ili, pwu vakalava ukubiha mwa Tempeli vwu vukye pavusiku, vakatsikuvavula inongwa avanu. Umwene unteketsi umbaha navanine vwu valundamine, pwu vakilanga ululundamano lwa vańivaha avenekivumbuko, vwu vagosi avavaha nkivumbuko kyoni kya vańa-Isilaeli. Pwu vakavasuṅa avakuvatola nńumba jya vańololo. 22Avene avakivaga ava vwu vavye pakusika nńumba jya vańololo pwu vakatsivona navamuli. Pwu vakatsikuvavula 23vakata: Ijyene ińumba jya vańololo tuvwene vadindile vunnonu, navene navaloleli tuvwene vimile pandyango, mańa vwu twingye nńumba, pwu natumbweni ujyunge umunu mumwa. 24Vwu vapulike ili undolela-Tempeli navateketsi avavaha, pwu tsikajaga vuvule avene vakata: Kyu kinu kiki iki? 25Pwu akabiha upwu vale ujyunge umunu akavavula akata: Lola avanu uvwu mwadindye nńumba jya vańololo viva mwa Tempeli, vimile pavuvalasu vikuvavula inongwa avanu. 26Pwu undolela-Tempeli akabiha navakivaga va mwene vakatsikuvatola. Lola vakivandila ulwakuva vavadwadaga avanu vakata vikutuhomaga namaganga. 27Vakatsikuvavika umwu lwale ululundamano lwa vańivaha avenekivumbuko. Pwu unteketsi akavutsa 28akata: Nda natuvavulili ukuta inongwa tsa litavwa ili ndambulaga ujyunge umunu? Mańa uńe inongwa tsińo tsitsitsi ntsitsovile mwoni mu-Jelusalemu umu. Pange uńe unkisa gwa munu uju mwisagye mutye gwa kututsigila uvwe? 29Pwu nu-Petele navapositili avanine vakanda vakata: Nu-Nguluve navanu, mańa upita tumpulikage ju Nguluve. 30Umwene Unguluve va vatengutsi vitu antsusitse UJesu uvi mwambudile upwu muntovelelage pakibiki. 31Vi amwimike Unguluve nikivoko kya mwene ikyandyo, ampelile ndongolelanzila, ampelile mpoki va kuvapa nulukilivuko nuvusyikilo vwa nongwa uvańa-Isilaeli. 32Nuvwe twipelile ukuva va kumwidikila inongwa tsitsitsi ukuta tsa jilweli. Namwene nu-Mepo umbalatse vuvule-vule, uvi Unguluve avapelye ṅani voni avikumpulika. 33Avene vwu vapulike tsitsitsi, pwu tsikavahoma mwitumbu vakata tuvabude.
34Pwu akima ujyunge unjavo ndulundamano lwa vańivaha avene-kivumbuko umu umpalisai vi Gamalyeli ilitavwa, umańisandagilo uvi vandwadaga sitso avanu voni akata: Mbahumyage panzi padebe avapositili. 35Pwu akavavula avanine akata: Ńi vajango ńi vańa-Isilaeli tsu mbandikage mwisagilage sitso itsu avanu ava mutye tuvavungage. 36Mańa napajagili pongosu upwu akasisimuka UToita akavateka avanu akata nene nongi, vakambadama avanu avagosi ikipuga kya pavamia vani (400). Vi vanjatsitse vuvule. Avene avankongaga vapalaṅine vahambile. 37Pambele akasisimuka UJuta va mu-Galilai, akima upwu vivalwa avanu upwu vivigwa, akavalusa avanu vavongosu vakamambukila UNdoma vakankonga jyujwa Namwene aswe. Avene avambadamaga vapalaṅine. 38Pwu ndita: Avanu ava mbatavulage mbalekage. Mańa tsingave itsu visagye nitsu vivomba vangave vagwe avanu pwu tsilajagaga vuvule, 39mańa angave agwe Unguluve, pwu nandatsijatse lusiku uńe. Mbandikage ndipelaga ukuva vakulwa nu-Nguluve.
40Pwu vakata itsova jilweli. Pwu vakavilanga avapositili vakavatova vakavalagila sitso vakata: Ndalitsovaga ilitavwa lya Jesu. Vakavavopola. 41Avene vakahuma umwu lwale ululundamano lwa vańivaha avenekivumbuko. Vakahekela ulwakuva Unguluve atye vanogye ukuhelukila putavwa lya Jesu. 42Navakagataluka napadebe. Goni amatsuva vakavavula inongwa avanu mwa Tempeli namuńumba tsavene, vakansimilitsa UJesu vakata: Vi vi Kilisiti jujwa.
Επιλέχθηκαν προς το παρόν:
Vapositili 5: Kinga
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
New Testament in Kikinga © British and Foreign Bible Society, 1961.