Vapositili 12
12
1Pwu pamwaka gugwa pwu UHeloti unkuludeva akavibata avange ava mmpelela akata ndivakinilage. 2Akambuda nulwuvo UJakobu umamaje va Johani. 3Pwu vwu avwene vihekela ava-Juta; pwu akongeletsa akamwibata naju Petele. Apene pale pamatsuva ga sivanda isitsilansabe upwu amwibataga. 4Vwu amwibite pwu akatsikundindila nńumba jya vańololo. Akavika utupuga tuni twa vasikali utwa kupokelanila pakundindila, lino vani napavunge vani. Umwene akata avańa-Isilaeli ndikuvahumihitsaga UPetele vwu valye isya Pasa. 5Pwu vakandindila sitso nńumba jya vańololo mumwa UPetele. Mańa ugwene umpelela gukansajila kwa Nguluve gukijumilitsa.
6Vwu UHeloti iva pakumumya pwu ikilo jijyo UPetele akagona itulu navasikali vavili, uyjunge kunu ujyunge kunu, akakungwa nimińololo givili. Napene pandyango vakava avasikali avilolela vavili ava kulindilila ińumba jya vańololo. 7Pwu ṅani-ṅani unsuṅwa va nkuludeva imile nulumuli lumulika nńumba. Pwu unsuṅwa akantova paluvasu UPetele akansisimula akata: Sisimuka ṅani-ṅani. Pwu nimińololo gikalagala vuvule. 8Pwu unsuṅwa akata: Vwihudikage ingwamba nkivino nisikato mmalunde. Umwene akaswala. Pwu unsuṅwa akambula akata: Vwiswike nikilundwa kyako uṅongage. 9Pwu akahuma panzi akankonga. Umwene akalemwa ukutsimańa ukuta tsu avombile jilweli tsitsitsi unsuṅwa, umwene akata pange ndigona amagonasivi vuvule. 10Pwu vakaluta pandoleli undongotsi, vakaluta napa vavili, vakatsisika palwitsi lwa kyuma ulwa kuhumila mbutsenge. Lwu lukadinduka lwene. Pwu vakagenda vakamala akalekano akange pwu akalekana nave unsuṅwa. 11Pwu UPetele akivona akata: Pwu ndivwene jilweli ukuta unkuludeva ansuṅile unsuṅwa va mwene amokile mmavoko ga Heloti namu itsu vandolelage avanu ava-Juta ava. 12Vwu atsivwene tsoni, pwu akavona asike pańumba jya Malija uvańina va Johani uvi ale vi Malika ilitavwa ilinge. Mwu valundamine vavongosu avikisaja. 13Pwu umwene akakoṅona palwitsi lwa ndyango, pwu uminza va pambombo uvi ale vi Lode ilitavwa akatsipulihitsa. 14Pwu akalimańa ilimeńu lya Petele, pwu akahekela akaleka nukudindula pandyango, akańila nńumba akatsikuvavula akata: UPetele imile pandyango panzi. 15Avene vakata: Nda uli nulukwale? Umwene akitoteka akata: Jilweli pwale. Pwu avene vakata: Humbe nsuṅwa va mwene. 16Umwene UPetele akagimba akakoṅona palwitsi. Pwu vakatsidindula vakambona jujwa vakakeńemuka sitso. 17Pwu umwene akavatina ikivoko akata: Mununalage. Pwu akavavula umwu unkuludeva ambombye vwu ikumumya nńumba jya vańololo akata atye atye. Akata: Lyu nkavavule nu-Jakobu navakilisiti avajitu. Pwu umwene akahuma akabiha kukilunga ikinge.
18Vwuvukye pavusiku pwu kukajaga kukaleka vuvule avasikali vakata: Kimbwene kiki UPetele? 19Umwene UHeloti vwu andondile alemilwe, pwu akavavutsa sitso avalindilitsi pwu akata: Mbahumyage mbabude. Pwu umwene akahuma mu-Jutai umu, akika ukubiha mu-Kesalija mwu akatsigona. 20Umwene guvavipye sitso ava-Tili nava-Sitoni, Pwu avene vakidikaṅana voni vakabiha upwu ale, vakatsimańana nu-Bulasiti unkivaga untengasitala sya nkuludeva, pwu vakatekelesa kunkuludeva vakata: Utudekepelage. Ulwakuva isinu isyu valitsaga nkilunga kya vene syahumaga nkilunga kya nkuludeva. 21Pwu akavalagila ilitsuva ilinge, pwu akaswala ugwańingilitsa gwa mwene gwa vutwa, akatama pakitamilo kya mwene kya kuhigila inongwa, akavapangila itsa kupanga navo pavuvalasu. 22Pwu avanu vakilanga vakata: Lyu limeńu lya Nguluve ili, naliva lya munu. 23Pwu unsuṅwa va nkuludeva akantova baho vuvule, ulwakuva abelaga ukumwimika Unguluve. Pwu tsikandya isińe akaswa.
24Ilyene ilimeńu lya Nguluve lyu likalandala likamala mwoni-mwoni. 25Nu-Balinaba nu-Sauli vakatsivuja ulwu vabye mu-Jelusalemu vwu vamalile imbombo itsu vavasuṅile. Vakatsivuja nu-Johani uvi vita vi Malika ilitavwa ilinge.
Επιλέχθηκαν προς το παρόν:
Vapositili 12: Kinga
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
New Testament in Kikinga © British and Foreign Bible Society, 1961.