MAWOOKIONYI 14
14
Abramu akiṟa Loti
1Kyasia kiheri Amrafeli ai mangi ya Shinari na Arioko mangi ya Elasari, na Kedorlaoma mangi ya Elamu na Tidali mangi ya Goimu, 2waleamtsa shida na Bera mangi ya Sodoma, na Birsha mangi ya Gomora, na Shinabu mangi ya Adma, na Shemeberi mangi ya Seboimu, na mangi ya Bela, nyio Soari.
3Iwa wose wakakusanza kulya pichinyi lya Sidimu kufui na ipalyipalyi lya moonyo. 4Maaka ikumi na iwi wechiṟundia Kedorlaoma na maaka fo ikumi na iṟaṟu wakamleha. 5Na maaka fo ikumi na kaana Kedorlaoma kacha na wamangi walya wawei kimu nao, wakakapa Warefai kulya Ashteroth-karnaimu na Wazuzi kulya Hamu, na Waemi kulya Shawe-kiryathaimu, 6na Wahori kulya fumvuhu lyawo Seiri, mṟasa Elparani ii kufui na nuka. 7Numa wakawuya wakacha mṟasa Enmisfati, nyifo Kadeshi, wakakapa oruka lose lo Waamaleki na lo Waamori wawekekaa Hasason-tamari.
8Mangi ya Sodoma na ya Gomora, na mangi ya Adma, na mangi ya Seboimu na mangi ya Bela nyio Soari wakakure wakaamtsa shida kulya rendewelenyi lya Sidimu, 9Wakapane na Kedorlaoma mangi ya Elamu, na Tidali mangi ya Goimu, na Amrafeli mangi ya Shinari, na Arioko mangi ya Elasari, wamangi waana ko walya watanu. 10Na pichi lya Sidimu liwewode maṟungu hafoi ha kimia. Na wamangi walya wa Sodoma na Gomora wakadicha wakaolokapfo, na walya waletsuhaa wakadichia mafumvuhu. 11Wakaduo masaa hose ha Sodoma na Gomora na shelya shawo shose, wakanndesia. 12Wakaduo na Loti, mana o manomae Abramu awei kulya Sodoma, na masaa hake wakasiia.
13Mndu umu sa alekusheṟuopfo kahenda kashitsia Abramu ai Mwebrania mbonyi; Kiheri kyo Abramu nawekeri ikaa kufui na mashidi ha Mamre Mwamori; Mamre ai manomaye o Eshkoli na Aneri, nawo wawewode mbuya na Abramu. 14Abramu kekiicho ke manomae ambado shidenyi kainengya waleu wake shisha walya walefeeyo kulya kanyi koke, wandu mahana haṟaṟu na ikumi na nyanya (318), kawaduo mṟasa Dani. 15Kakuala nakapane nawo kio, o na masinga hake, kawakapa, kawawingia mṟasa Hoba, fui ora lo kumoso lo Damasko. 16Nao kawihiṟa masaa hose, kawewihiṟa na Loti mana o manomae na masaa hake, na waka handu hamu na wandu.
Melikisedeki awikia Abramu ona
17Abramu kekiwuya awuka ikapa Kedorlaoma na wamangi walya wawekulungie nao, mangi ya Sodoma kakure nahende imwambia kulya pichinyi lya Shawe, nalyo nyi pichi lya Mangi. 18 Na Melikisedeki mangi ya Salemu kaende mkate na mpfinyo, nao nawei mkohanyi o Ruwa ai huye mnu. 19Kammbikia mboṟa, kahamba, Abramu nakewikio ona nyi Ruwa ai huye mnu, mowumba ruwehu na oruka. 20Kuadapfumo Ruwa chu ai huye mnu, alewika wakituwa wapfo mawokonyi hapfo. Abramu kamnenga kienga kya ikumi kya shindo shose. 21Mangi ya Sodoma kawia Abramu, “Nenga inyi wandu-wo, na masaa ho nokudaaye iyo.” 22Abramu kawia mangi ya Sodoma, “Njileiria owoko loko ko Mndumii, Ruwa Ai huke mnu, Mowika ruwehu na oruka, 23ke njechiduo orusu ma okowa lo shadupfo manya kindo kyose kii kyapfo-pfo, ulakoye omhamba, ‘Njilesuṟisha Abramu,’ 24shile na shilya waleu walelya na kienga kya wandu walya waleoshana na inyi, woko Aneri, na Eshkoli, na Mamre, wo wakudae ohawi lowo.”
Επιλέχθηκαν προς το παρόν:
MAWOOKIONYI 14: KIM2
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Kimochi Bible © Bible Society of Tanzania, 2016.