Yohane 3
3
1Eeifoo nndu wa Vafarisayo irina lyamwi nNikodemo, eekee nshili wa Vayuda. 2Kashea Yesu kyeeri kya kio kamwia: Nndumi, ise tiishi sheeli kukee llosha kuukie kwa Iṛuva, fulya ateefo nndu amakii itana myorusie ilya ya finya iwe kukee itana, kwakooya Iṛuva atakee nae. 3Yesu kamwaṛua kamwia: Nkue nakuia kya dede: Kwakooya nndu atairiwaa lya kavili, amakii ilolia umangi lwa Iṛuva ndi. 4Nikodemo kamwia: Nndu amakii iiriwa are ankua? Amakii yuya simiń ya mae airiwa lingi? 5Yesu kamwaṛua: Nkue nakuia kya dede: Kwakooya nndu atairiwaa auka na mura na Mumuyo wa Iṛuva, amakii ifika umangiń lwa Iṛuva ndi. 6Amu ulya amiiriwa ni nndu awore mikae ya nndu meni, na ulya amiiriwa mMumuyo wa Iṛuva awore mikae ya Mumuyo wa Iṛuva muni. 7Kitakuṛiikise fulya nakuia: Kyamuwara iiriwa lya kavili. 8Mburaato ivivitaa alya ifurie na iṛumi lyayo kukee ifiita liionaa kuteeshi kundo yukie nafo ana kundo yendaa nafo. Mfo kuro kikai kwa nndu woose amiiriwa mMumuyo wa Iṛuva. 9Nikodemo kamwaṛua kamwia: Ifi fimakii iva are? 10Yesu kamwaṛua: Iwe kukee llosha wa Isiraeli kuteeshi ifi? 11Nkue nakuia kya dede: Ise tikee irera filya tiishi na irambua filya tallolia, neeni mwirikie filya tikee irambua ndi. 12Kwakooya mutakee iirikia findo nkee imwongoya fa isangeń, mwirikiaa are findo nkee imwongoya fa iṛuvewu? 13Nta nndu ansaama iṛuvewu kita ulya amooloka iṛuvewu, nae mMwana wa nndu eekee iṛuvewu. 14Na sha lia Mose avanika shoka ilya kulya bateń, mfo kuro kyawara Mwana wa nndu avanikwa, 15amu nndu woose akusurani nae atareke, kake aniingwa muu utakisiaa. 16Nkuro Iṛuva akunda vandu kaotoṛa Mwana wamwi ngitani, amu woose vankusuraa vatareke, kake vaniingwa muu utakisiaa. 17Fulya Iṛuva aruma Mwana wamwi isangeń, amu aumisie isanga ndi, kake naamu isanga likiṛwa yye. 18Ulya ankusurie aumisio̱o̱ ndi, ulya atankusurie ammaa yumisio̱, fulya atakusurani na Mwana wa Iṛuva ngitani. 19Na uumisio llo ilu: Langa yansha isangeń na vandu vakafura llema kita langa, fulya mitanie yawo iikee mikasha, 20Ulya atanaa fikasha ito asule langa ana ashaa langeń ndi, amu mitanie yamwi itamanyike. 21Kake ulya aṛundaa mashoṛa asumani na uvavaso lwa Iṛuva ito ashaa na langeń, amu mashoṛa amwi amanyike na baa, fulya antana akusurani na Iṛuva.
22Kyasia Yesu kaenda na vanalosho vamwi muungoń wa Yudaya. Kasinda-fo andu emwi nawo eebatisaa vandu. 23Na Yohane nae eekee ibatisa kulya Ainon kufui na Salimu, fulya ifo kuwore mura mwiingi. Vandu vakansoṛa-fo vandebatiswa yye. 24Amu Yohane eenrawaa kifingioń ndi. 25Kyasia likava-fo ivingana lya vanalosho va Yohane na nndu Muyuda kiimba kya mboni ta isangyika. 26Vakashea Yohane vakamwia: Ulya kwikee nae kwa kulya ya mura wa Yoridane ulya kwanrambua iwe, ito nae akee ibatisa, na vandu woose vakee inshea. 27Yohane kaaṛua kanumbua: Eefo nta nndu amakii ikooya kindo kitaare ankiniingwa kyuka iṛuvewu ndi. 28Ini mu veni mwishi sheeli narera niinumbuaa: Niń nkee Kristo ndi, kake niń narumwa mmwirie mbele. 29Ulya akee na sambuṛa ya wali yye nndumi wa wali. Kake ndoo ya nndumi wa wali ulya aselele na imwaranya, akee isenywa nnu ni ununga lwa nndumi wa wali. Kyasia ifura fi lyakwa lyammaa iva. 30Ye kyawwara ańine, nań kyashiwara naangue. 31Ito asha auka iṛuvewu yye akee kwa ule ya woose. Na ulya amilie kunu isangeń kava wa kunu isangeń na irera karera fa kiisanga. Ye asha auka iṛuvewu yye akee kwa ule ya woose. 32Filya andelolia na iita mfo akee irambua ateefo nndu akee iwaria irambua lyamwi. 33Ulya amiirikia irambua lyamwi ammaa irwaa kiringisio kyamwi sheeli Iṛuva wwa udede. 34Amu ulya anderumwa ni Iṛuva areraa firero fa Iṛuva. Fulya Iṛuva ataniingaa nndu Mumuyo wa kyelelio ndi. 35Nde akundie Mwana kanrambikia foose maakoń amwi. 36Ulya akusuraa Mwana ito avaa na muu utakisiaa. Na ulya atairikiaa Mwana akooyaa muu kutu ndi, kake uvave lwa Iṛuva lulunganaa nae.
Επιλέχθηκαν προς το παρόν:
Yohane 3: RWK72
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.