Yohane 10
10
1Nkue nkue namuia: Ulya ataakaa muṛiń wa mburu na mwaangoń kaira na andu engi, ito ni inini na nsoki. 2Ulya aakaa na mwaangoń mmwisi wa mburu. 3Na nringi wa mwaango kanruya. Na mburu tikaaranya ununga lwamwi. Nae kavaanga mburu tamwi eetisendaa marina ayo na itiawua. 4Neeli aawuaa mburu tamwi toose, atiiriaa mbele. Na mburu tilya tikansoṛa, fulya tiishi ununga lwamwi. 5Kake nndu mwini tillatiaa kutu ndi. Tinrishaa, fulya fiteeshi ngyununga ta veeni. 6Ii yyo sumu Yesu andevaeeṛa. Nawo vandeaṛukio̱ nkilya afurie ivaia nakyo ndi. 7Llyo Yesu avaia Ungi: Nkue nkue namuia: Niń nniń mwaango wa yaka mburuń. 8Woose vandeshiiria mbele mmanini na fisoki, kake mburu tindevaita ndi. 9Niń nniń mwaango. Nndu kaaka na kwakwa kashaaṛua mwaango, ito akooyaa ikiṛwa na yaka na isomuka, nae akooyaa imutu. 10Inini lishaa-fo ndi kita lyasha iiva na isikya na ireta. Niń nndesha amu nato tikooye muu na findo fitifile na fa mmwasi.
11Niń nniń mwisi nnuru. Mwisi nnuru akuniingiaa kiimba kya mburu tamwi. 12Kake ndundia maṛe atakee muni mburu ana mwisi ili aloliaa ngwe iishaa, llyo aburuya-wo mburu tilya arishe. Na ngwe ilya llyo itambukiaa mburu tilya na itinyanyata. 13Fulya ye akee mu-ṛundia maṛe atakee ikwataria mburu. 14Niń nniń mwisi nnuru. Niń niishi tilya tikee takwa, nato tishiishi niń, 15sheeli Nde yakwa ashiishi niń, nań namanya Nde. Nań nareka muu wakwa kiimba kya mburu takwa. 16Noore na mburu tingi da titakee ta shoo ii. Nato kita ntinnde, nato tishiitaa ununga lwakwa. Na shoo ivaa imwi na mwisi ave umwi nsi. 17Nkyo kikangio Nde kashikunda, fulya nanreka muu wakwa, amu nuuwarie lingi. 18Nta eefo nndu ashiusokaa ndi, kake nauniingia kwa ikunda lyakwa shi muni. Noore finya ya iuniingia. Noore na finya ya iuwara lingi. Llyo ivavaso nndeliwaria lyuka kwa Nde yakwa.
19Kyasia Vayuda valya vakakwava kari kiimba kya firero filya famwi. 20Veengi ifo kari kawo vakanumbua: Aworwa mmumuyo nkasha, lingi aworwa ni uketo. Nki ili mukikee imwaranya? 21Vengi vakanumbua: Firero fo mfa nndu aworwa mmumuyo nkasha ndi. A mumuyo nkasha umakii irua miso a midoń naań?
22Kyasia ukafika nkonu nnini kulya Yerusalemu wa ikumbua numba ya Iṛuva indesamio̱. Na kyeeri kyo kiikee kya mbioo. 23Neeli Yesu eeṛuaṛuaa ifo numba ya Iṛuva alya kiremboń kya Salomon, 24llyo Vayuda vallengetia vakamwia: Nkumande iri ki iwe kwiataraa mirima yeru? Kwakooya iwe ni iwe Kristo tiie na baa. 25Yesu kavaarua kavaia: Niń nammuia, neeni nta ishikusura. Mashoṛa va nkee iṛunda na irina lya Nde yakwa wwo ashirambuaa. 26Neeni mukalemwa ikusura, fulya mutakee va shoo ya mburu takwa. 27Na mburu takwa tishiitaa ununga lwakwa. Nań ntiishi, nato tikashisoṛa. 28Nań natiniinga muu wa miṛeṛe na miṛeṛe. Ana to nta tirekaa miṛeṛe ndi. Ana nta eefo nndu atisokaa ifo maakoń akwa ndi. 29Na Nde yakwa uu ashiniingie ni nnini kita woose. Ana nta eefo nndu amakii itisoka ifo maakoń a Nde yakwa ndi. 30Niń na Nde tikee kimwi.
31Kyasia Vayuda vakaimboo lingi mawe, amu vankabe. 32Kavaaṛua: Mmashoṛa mesha meengi nndemworusa aukie kwa Nde yakwa. Nkiimba kya ishoṛa lingali mufurie ishikaba na mawe? 33Vayuda vakamwaṛua: Nkiimba kya ishoṛa inuru tikee ikukaba na mawe ndi. Kake nkiimba kya kirumu kyafo kya iruma Iṛuva, neekai kukee nndu tubu kwakwaṛua ku muni kukee Iṛuva. 34Yesu kavaaṛua: A ifo uvavasoń lwanu kitisiṛie-fo se sheeli: Niń nanumbua: Mukee Maṛuva? 35Kyasia kwakooya andevavaanga Maṛuva valya vandeshewa nkirero kya Iṛuva, — na mitisine ivaa iilasha ndi — 36a niń nndeiliswa nNde kashiruma isangeń naare mwashiia naruma Iṛuva, ili nanumbua: Nkee Mwana wa Iṛuva? 37Kwakooya nara ntaṛunda mashoṛa a Nde yakwa, manya mutashiirikie kutu ndi. 38Kake kwakooya nava mwaṛunda, na kikava kitaare mwashikusura niń shi muni, kusuraniń na mashoṛa wo akwa muutie-wo imanya deń sheeli Nde asaangi nań, nań nsaangi na Nde. 39Kyasia vakaraya mwaanya wa iwwara. Nae kakuuta ifo maakoń awo.
40Llyo awara shia lingi kafika kwa kulya ya Yoridane kumande kulya Yohane eebatisiaa, kakaa-fo. 41Vandu vakanshea veengi vakanumbua: Dede Yohane atana myorusie nta umwi ndi. Kake foose Yohane anderera fa mboni ta nndu uu fiikee fa dede deń. 42Na vandu veengi va ifo vakankusura.
Επιλέχθηκαν προς το παρόν:
Yohane 10: RWK72
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.