Mitanie ya varumi 10
10
1Kyasia kulya Kaisaria eeifoo nndu umwi irina lyamwi ni Korinelio akee nnini wa kinga kya vasikari kiivaangwaa Kiitalia. 2Nae eekee nndu nsongovisi kakusura Iṛuva na numba yamwi yoose. Nae eekee muniinga misimbika miingi ya ililia vandu kalungana itereva Iṛuva mikonu yoose. 3Nkonu umwi kikee sha kyeeri kya saa kyeenda ta nsanyiń kaoruswa kindo. Kalolia malaika wa Iṛuva eeiraa na numba kwamwi kamwia: Korinelio uu! 4Nae kamulla koroo kaeṛea kanumbua: Nkiki Nndumi? Malaika kamwia: Fiterewo fafo famfika ule na misimbika yafo na ikumbulwa mbele ya Iṛuva. 5Kyasia alli ruma vandu Yope vavaange Simon ito avvaangwaa Petiro. 6Ye mmwini wa nndu umwi irina lyamwi nSimon akee nsisa shoni awore numba yamwi ikee mbaai ya nruva. 7Na malaika ulya eekee irera nae ili andemaa yenda, Korinelio kavaanga maketi amwi avili na nsikari umwi akee nsongovisi kari ka valya veekee indundia. 8Kavaongoya findo foose kavaruma vaende Yope.
9Na ili lya ngama ili valya varie shia na ifika kufui na muṛi ulya Petiro kasaama kai indetereva Iṛuva. Kikee kyeeri kya saa isasaru ta nsanyiń. 10Kaliwa nsoto kafura ilya. Ili veensongosiaa shoonga kailashika makusaṛo. 11Kalolia iṛuvewu liruukie kalolia kiya kyolokaa kivakani na nseto nnini kiiolotwaa na mikyendu yayo iini kumande si. 12Na kari kayo eeifoo mafisi a mikae yoose a marende aani na aafuafuaa na si na ndee ta kwa si ya iṛuvewu. 13Na ununga lukanshea lwinumbuaa: Kwimboo Petiro, sikya kulye! 14Petiro kanumbua: Wode Nndumi, amu nalle kutu kindo kikasha kya usutu ndi. 15Ununga lukanshea lya kavili lwimwiaa: Findo famiiliswa ni Iṛuva iwe kutafivaange fa usutu ndi. 16Kindo ki kikatanika kararu, numa kiya kilya kikaroswa lingi iṛuvewu.
17Neeli Petiro eekee na inunua nrimiń wamwi atandemanya misendie ya ifi afilolia, ilyo yeni vandu valya vanderumwa nKorinelio ili vandemaa yuṛa numba ya Simon vakasalala mwaangoń. 18Vakavaanga vakauṛa akwaa Simon avaangwaa Petiro eefo. 19Na Petiro eekirekiee ikusaṛia myorusie ilya. Mumuyo kamwia: A va vandu vararu vakee ikuṛuya. 20Kyasia kwimboo oloka si kwende nawo. Manya kutanunue, amu nniń navaruma. 21Petiro kaoloka kalolia vandu valya kavaia: Nniń ito mukee induya. Mwasha kiimba kya kiki? 22Vakanumbua: nKorinelio nshili akee nndu nsumani akusurie Iṛuva, awore nsendo nnuru vanduń woose va Vayuda, andevavaswa mmalaika nsongori iruma vandu kwafo, amu kwende kwamwi aaranye firero fafo. 23Petiro kavaata kwamwi kavawaria vakava veeni vamwi.
Neeli lya ndesi Petiro kakwimboo andu emwi nawo. Na kiindi kya vanavamae veekee Yope vakariana nae. 24Na nkonu wa kavili wayo vakafika Kaisaria. Na Korinelio eevaveriee eemmaa ikuumbia andu emwi na va numba yamwi na ndoo tamwi. 25Ili Petiro eeiraa na numba Korinelio kakwania nae kawa na si mbele yamwi eemwindiaa. 26Petiro kamwimboo kanumbua: Salala amu nań nkee nndu shawe. 27Ili eereraa nae kaaka numba kalolia-fo vandu vakuumbie-fo veengi. 28Kavaia: Mwishi sheeli kitasumani nndu Muyuda ilungana na nndu wa uṛiti lungi ana nta imfikia. Kake Iṛuva anshiikimba nta nndu umwi ave ungau ni nravi ana nsutu. 29Nkyo kiteveto nasha ili nndevaangwa nta ilea. Kyasia nkee yuṛa: Nkirero ki mundeshivaangia? 30Korinelio kanumbua: Nnu ni nkonu wa kaani kuuka ilyo niikee itereva. Nayo ikee saa kyeenda ili niiterevaa numba kwakwa. Ilyo yeni nndu kasalala mbele yakwa aṛee nseto uvaramaa. 31Kashiia: Korinelio, itereva lyafo lyamiitiwa na misimbika yafo ikumbuywa mbele ya Iṛuva. 32Kyasia ruma vandu vaende Yope vandevaanga Simon avaangwaa Petiro akee mwini numba kwa Simon nsisa shoni nkufui na mbaai ya nruva. Nae kansha areraa nawe. 33Lia eni naruma vandu kwafo, nawe kwatana kisha kwasha. Kyasia alli ise toose tikee ia mbele ya Iṛuva amu taaranye firero foose kundevavaswa ni Nndumi.
34Nae Petiro kabooka irera kanumbua: Alli nammanya dede sheeli Iṛuva allaa mikae ya vandu ndi. 35Kake kari ka vandu woose ulya amweṛeaa na itana kisumani awario̱o̱ yye. 36Kirero kyamwi Iṛuva ankirumia vana va Isiraeli karika Yesu Kristo akwanisie vandu mboni shinuru ta unambwe. Uu akee Nndumi wa woose. 37Ini mwishi mboni tilya tindeva kulya urukeń loose lwa Yudaya tikabooka kulya Galilaya kuuka ubatiso lua Yohane andekwanisa. Sheeli Iṛuva andeavia 38Yesu wa Nasareti Mumuyo Nsongori na finya. Nae kaṛuaṛua na itania kinuru valya woose veekee iliswa ukiva nSatana na ivakiṛa, fulya Iṛuva eekee andu emwi nae. 39Neese tikee varambua va filya foose andetana urukeń lua lwa Vayuda na kulya Yerusalemu. Na Yesu uu vakawwaa vakankabia nsalabeń. 40Kake Iṛuva kanduta nkonu wa kararu kamworusa na bata. 41Kake nkwa vandu woose ndi kita ise tikee varambua veensaulwaa ni Iṛuva. Neese tikalya nae na inwa andu emwi nae kyeeri kilya ili andemaa iṛuka kwa vafu. 42Nae kativavasa toongoye vandu na iringisia, sheeli uu yye eende-ṛio̱o̱ ni Iṛuva ave mufukya myaandu ya valya veefo na muu na valya vamfwe. 43Nae uu vaauya fisuku woose vanderera iringisioń lyawo, sheeli ulya woose ankusuraa atio̱o̱ mareko kwa irina lyamwi. 44Kyasia ili Petiro eereraa firero fi Mumuyo Nsongori kaolokia valya woose veekee yaranya kirero kilya. 45Na valya veekusuriee vakee varini valya veerianii na Petiro vakariika, fulya valolia na vayavaṛumu vamoolokio̱ mMumuyo Nsongori. 46Fulya vavaita veereraa na mirerie miiya veeitikisaa Iṛuva. 47Llyo Petiro anumbua: Eefo nndu amakii iima vandu va vawwaria Mumuyo Nsongori sheese veebatiswaa na mura? 48Kavavasa vabatisio̱ irina lya Yesu Kristo. Llyo vantereva asinde kwawo mikonu kiindi.
Επιλέχθηκαν προς το παρόν:
Mitanie ya varumi 10: RWK72
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.