Luka 5
5
Ukwitwa kwa vasundikwa avalanzi
1-11: Mat. 4,18-22. Mal. 1,16-20.
1Pe lumo lwʼavantʼimpuga vatitilinkine nawo, lwe viṿwʼizwi lya Mulungu, uwene lwʼayimiliye kushipuma sha sumbi wa mu-Genesaleti, 2pʼahagʼamavoti gavili vagakweseye kushipuma. Avenʼavaṿuṿi avahatasho vafumile, vakuhandʼinyelo zyavo. 3Tuhayipashila mwivoti lya Simoni, ahati: Ulisunkaje lifupushe hansi kushipuma. Pʼahatendama mwivoti, ahavasambilizyʼavantu. 4Ilelo lwʼamazilʼukuyangʼinongwa, pʼahamuvuzyʼuSimoni ahati: Shinishi valaga pasumbi pahati, pe muhatajilʼinyelo zyinyu ukuṿuvʼinswi. 5AhamulʼuSimoni ahati: Mwene, tuyikunguyʼuvusiku vwonti, tutaṿuṿile nimo nkandi shʼuyanzile wenewe lelo, pe nkutajilʼulwelo. 6Ilelo lwe vatajiye inza she lilyo avavuzyaga, pe vahaga vavunginyʼinswi nyinji nkani, nulwelo lwavo luhazepuha. 7Pe vahavapalizyʼavamwavo ava mwivotʼilyamwavo, vahati: Simwinze, mututule. Avene vahinzʼukuvatula. Pe gahizula ge gavilʼamavoti, gahapona nukudwiva. 8Ilelo lwʼawenyi zinizi uSimoni Peteli, pʼahamugwila kuṿizwʼuYesu, ahati: Yepaga mumwanʼumu, Mwene, she ne muntu umutalamalandu ine. 9She shavagwiliyʼishitetemwi na wuyo nava ve vali nawo vonti, she zyalʼinyinji inswi zye vaṿuṿile, 10vovulo vope navaYakobu nuYohani, avana-Zebedayi, avamwavo va Simoni. UYesu ahamuvuzyʼuSimoni ahati: Kwe ndalʼukutetemʼiwe, shʼukwanda shinishi ukuṿuvʼavantu. 11Pe vahagakwesela kushipumʼamavoti gavo, vahaṿileha pupo ṿwonti, vahamulandata wuyo.
Ukupola kwa wamambombo
12-16: Mat. 8,1-4. Mal. 1,40-45.
12Lumo lwʼali munkaya yimo, pʼahamwagʼumuntʼuwamambombo umuvili wonti. Uwene lwʼamuwenyʼuYesu, pʼahakupama pansi, ahalambilizya kukwakwe ahati: Mwene, ingʼukasimʼiwe, pʼumanyilʼukumpozya. 13Pʼuwenʼahatambalihʼumuhono, ahamupalamansya mumuvili, ahati: Nkasime, polaga. Ilelo pʼamambombo gahepa kukwakwe luvilo luvilo. 14UwenʼuYesu ahavinda ahati: Utamuvuzyaje numʼumuntu, nkandi valaga kuwashiputo, uhatwale iṿwa kupolʼiwe, inza shʼalajizizyʼuMose, ṿwe ṿivanje ṿwa kumanyila mumwʼavene. 15Pʼinongwa zyakwe zinizi zihalusyʼukukumuha. Pe vahavunganʼavantʼimpuga, nava kutejelezyʼinongwa nava kukantulʼimpungo zyavo. 16Uwene nyene ahayeleleha mulwugwa, ahaputa.
Ukupola kwa washulu
17-26: Mat. 9,1-8. Mal. 2,1-12.
17Umusanya woka lelo, uwene lwʼakuvavuzyʼinongwa, lwe vatendime pupo vope navaFalisayi navasambilizyankomelezyo, ve vafumile munkaya zyonti zya mu-Galilayi nizya mu-Yudayi namu-Yelusalemu, pʼamaha ga Mwene gahava nawo aga kuzuzuvushizyʼavantu. 18Pe vahitushilʼavantu vamunyatuye pashitala uwamwavo wʼali nishulu, vahati tumwinjizye tuhamuvishe kuminso gakwe. 19Vazile lelo vatapazilʼapa kumwinjizya, she valʼavinji mwatʼavantu, pe vahazuva pamwanya panyumba, vahapangulʼinjelwa, vahamwisya poka nishitala shakwe, vahamuviha pahati kuminso ga Yesu. 20Uwene lwʼawenyʼulwitiho lwavo, pʼahamuvuzyʼumuvinu ahati: We muntʼiwe, gaswililwʼamalandu gaho. 21Pe navamanyakalata avaFalisayi vahasiva muhati zyavo vahati: Unanʼuno wʼakumusamulʼuMulungu? Swe vantu amwʼalipo wokʼumuntu uwa kuswilʼamalandu ga muntu wamwavo? Weka we Mulungu wʼakuswilʼamalandu. 22UwenʼuYesu lwʼawenyʼinsivo zyavo, pʼahavamula ahati: Mukusiva shonu mumoyo ginyu? 23Lye lipupusu lili kwi ukuyanga nilya kuti: Gaswililwʼamalandu gaho, nilya kuti: Vuhagʼujendaje? 24Nkandi she nkuti mumanyʼuMwanamuntu ukuti akuswila namalandu munsʼumu,— lyʼahayanga kulʼuno wʼali nishulu ahati: Vuhaga, nyatulagʼishitala shaho, uvale kuhaya. 25Pʼuwenʼahavuhʼapashezi lwe vonti vakwenya, ahasenda shisho shʼakatiye, ahavala kuhaya, ahamutimʼuMulungu. 26Pe vahatentwa nkani vonti, vahamutinihʼuMulungu. Shʼishitetemwi shihavagwila, vahati: Zye tuziwenyi musanyʼuno zili payo.
Ukwitwa kwa Leṿi
27-32: Mat. 9,9-13. Mal. 2,13-17.
27Pisinda lwʼakujenda, pʼahaga wokʼumusonkolamusonko we vatili uLeṿi izina, wʼatendime pavusonkolamusonko. Wʼahamwita ahati: Nzagaga, undandatʼiwe. 28Pʼuwenʼaha-ṿileha pupo ṿwonti, ahavuhʼukumulandata. 29PʼuLeṿi ahamuteleshelʼiṿintʼiṿwinji munyumba yakwe; vavazilʼukulya navo navasonkolamusonko navanji impugʼimpiti. 30AvenʼavaFalisayi navamanyakalata vavo vahumana navasundikwa vakwe vahati: Mukulya nakungʼwela shonu navasonkolamusonko avatalamalandu? 31PʼahamulʼuYesu ahati: Avagomu ve vatakumwanzʼumuganga, nkandʼavavinu. 32Ntinzilʼukuvitʼavagolosu ine ndali, ve vatalamalandu nyene ve nkuvita nene nkuti mupinduhaje.
Ukuvuzilizya izya kusitakulyʼiṿintu
33-39: Mat. 9,14-17. Mal. 2,18-22.
33Avene vahamuvuzilizya vahati: Yenya, avasundikwa va Yohani vakufunga havili havili, vakuputʼimputo, vope ava vaFalisayi vovulo, nkandʼavenʼavaho vakulya nukungʼwela. 34UwenʼuYesu ahavamula ahati: Avalyaṿintu ṿwa pavusendelo mukuvaṿijilizya ukuti vafungaje, lwe suti vali nawʼumusendamwantanda? 35Zikwinzʼizyenʼinsiku lwʼanyatulilwe kuli vuvo umusendamwantanda, pala nyene pe valifunga pamanda gugo. 36Ahavavuzyʼishiholanyo ahati: Numo atakuzepulʼumwendʼumupwa ingʼakuti mpatishʼahapatikwa pamwendʼumukali. She ngʼahonzizye vovulo, pʼumupwa awuzepulinye, wope numukali atayanine nahapatikwa ha mwendʼumupwa. 37Havili numo atakusotʼishinyanya sha mampensya mumafukʼamakali; she ngʼumuntu akushisota mumwo, pʼishinyanya shikulepulanyʼamafuko ga mampensya, ilelo pe namampensya gakwitiha, gope namafuko gakunanjiha. 38Ishenʼishinyanya sha mampensya pakuti umuntu asote mumafukʼamapwa. 39Numo atakasimʼukungʼwelʼishinyanya ingʼavelezinye nage makalʼamampensya. Shʼakuti: Galusizyʼuvwinza ge makali.
Επιλέχθηκαν προς το παρόν:
Luka 5: NYi1965
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Nyiha New Testament © British and Foreign Bible Society, 1965.