Luka 4
4
Ukulingwa kwa Yesu
1-13: Mat. 4,1-11. Mal. 1,12. 13.
1UwenʼuYesu lwʼayizuyʼuMupepʼuMufinjile, pʼahafuma mu-Yolidani, uMupepo ahamulongola mulwugwa. 2Mwʼahalindʼamandʼamashumi gane. Pʼumukwalanzi ahamulinga. Shʼataliye naṿimo amanda gonti ganaga. Ilelo lwe gashilinkine pʼihamulumʼinzala. 3Pʼahalinga pupʼumukwalanzi ahayanga nawo ahati: Inga nalyoli we Mwana wa Mulungu, pʼuyanje kwivwʼili liyipelajʼukuvʼuvugali. 4PʼuYesu ahamula ahati: Lisimṿilwe lye likuti:
Umuntu vutakumupʼuvulanzi vwe vugali vweka.
5Pʼumukwalanzi ahazuva nawo pigambʼitali, ahamusontela pashezi insi zyonti zya vamwene vonti munsʼumu. 6Umukwalanzi ahamuvuzya ahati: Nkukupa ukuva we muhatasho insi zyonti zinizi, nuvumwamu vwakwe vwonti, she vwane nenene, nkumupa wuyo wenga nkasime nene neka. 7Ingʼukuputa kukwane lelʼiwe, pe zikuva zyaho wenewe zyonti. 8PʼahamulʼuYesu ahati: Lisimṿilwe lye likuti:
Putaga kwa Mwene uMulungu waho,
wʼumuvombele wuyo weka.
9Pʼahavala nawo ku-Yelusalemu. Mwʼahavalʼukumuviha patempeli pamwanya, ahayanga nawo ahati: Inga nalyoli we Mwana wa Mulungu, pʼufume panapa udomoshe pansi pala. 10She lisimṿilwe lye likuti:
Alikuhomelezezyagʼavahavizya vakwe,
ava kuti vakusunje,
11havili lye likuti:
vahanyatula munyove,
ukutʼutapunule pivwʼishinama shaho.
12PʼahamulʼuYesu ahati: Havili lyope liyanzilwe nilya kuti:
UtamulingajʼuMwenʼuMulungu waho.
13Uwenʼumukwalanzi lwʼamazile lwontʼululingo lunulwo, pʼahamuleha, ahati: Inga lumo.
UYesu mu-Nazaleti
14. 15: Mat. 4,12-17. Mal. 1,14. 15.
14PʼuYesu ahavwela mumaha ga MupepʼuMufinjile ukuvala mu-Galilayi nohavili. Pʼahakumuha munsi yonti mwʼizyunguluye. 15Pʼuwenʼahavasambilizya mumasinagogi gavo, vonti vahamutiniha.
16-30: Mat. 13,53-58. Mal. 6,1-6.
16Ahavalʼukufiha namu-Nazaleti, mwʼakuliye. Ahinjila musinagogi, inza shʼahonzyaga shima pisabati, ahavuhʼukuvazya pakalata. 17Vahamupʼukalata wa Yesaya mukuvwi. Ilelo lwʼazunguluyʼukalata, pʼahaga pe lisimṿilwe lye likuti:
18UMupepo wa Mwene ali papane, shʼampasile pakuti
mbavuzyeʼinongwʼinyinzʼavapina;
antumile nakuvakungwa ukuti mbavuzyʼukuti vasatulilwe,
nakuvantonko ukuti vakwenya,
nave valemenchelilwe ukuti mbasatule;
19antumilʼatili uhapanjʼumwahʼumwinza wa Mwene.
20Ilelo pʼahazingʼukalata ahamuninchilizyʼumwimilizi ahatendama. Pʼaminso ga vonti musinagogi gahamutontomela wuyo. 21Ilelo pʼuwenʼahanda ahati: Zye zisimṿilwe panapa zilunjisile lwe mukwiṿwa shinishi. 22Pe vonti vahamuhomeshezya, vahasukumilʼamazwʼamatehamu ge gakufuma mwilomu lyakwe, vahati: Te mwana wa Yosefu uno? 23Ahavavuzya ahati: Imwe mulimbuzyʼumwivʼuno wʼakuti: We muganga, uyikantule wewe weka. Inza she gugo twiṿuyʼukuti upezile namu-Kapelinahumu ungatupelela gamo naswe swe va munumu mwʼukuliye. 24Uwenʼahati: Nalyoli nkuvavuzyʼine nkuti: Numʼumukuvwi atakuvahondelʼavantu mwʼakuliye. 25Nkuvavuzyʼizya nalyoli nkuti: Valʼavinji avantandʼavafwile mwa Yisilayili umu mumwahʼula wa Eliya, pala kumwanya kwah kwigalile amaha gatatu namezʼumutanda, pala panzala yaguyʼinyinji nkani munsi yonti. 26PʼuwenʼuMulungu atamutumile kuli woka wa munumu Eliya ndali, nkandʼahamutuma mu-Salepita munsi ya Sidoni kumwantandʼumufwile wa mumwo. 27Vope navamambombo valʼavinji mumwaha ula wʼalipʼElisa umukuvwi. Pʼatahamupozya numo wa mumwo, nkandi weka weNamani wa mu-Sili. 28Pe vahavinduha pupo ukuṿitwa vonti ve vali musinagogi lwe viṿuye zinizi. 29Pe vahavuha vahamushimbizya muhaya, vahavalʼukumuviha palungalagata lwʼigamba lye vazenzilʼinkaya yavo, vahati tumubunchilizyaje pansi. 30Uwene nyene ahatuha vwelele pahati pali vuvo, ahavala.
Ukushimbizyʼimpepʼinkandamanu
31-37: Mal. 1,21-28.
31Pʼahihʼukuvala ku-Kapelinahumu, inkaya vimo ya mu-Galilayi, mwʼahavasambilizya shima pisabati. 32Pe zihavahola muhati zyʼavavuzizye, shʼahaloleha lwʼakuyanga ukuva we Muhatamaha wuyo. 33Ilelo musinagogi mwʼalʼumuntu wa mpepʼimbivi inkandamanu. Wʼahapongomohʼizwʼipiti ahati: 34Ye! tuli vuli naswe nawe we Yesu wa mu-Nazaleti? Uyinzilʼukututupula? Nkumanyilʼine, she we Mufinjile wa Mulungu iwe. 35UwenʼuYesu ahayipilila ahati: Pumaga, ufume mumuntʼuno. Pʼimpepʼimbivi ihamupamizya pahati, ihafuma kukwakwe nakumuṿulazya napamo. 36Pʼishitetemwi shihavagwila vonti mwe vavaliye, vahavuzilizanya vahati: Lye lizwi vuli linili? Shʼimpepʼinkandamanu akuzipilila ilya vumwene ilya maha, izyene pe zikujenda nukufuma vwelele. 37Pʼuwenʼahakumuha munsi yonti iya mupipʼumu.
Ukuzuzuvuha kwa nyinaṿwala wa Simoni navanji
38-44: Mat. 8,14-17. Mal. 1,29-39.
38Pʼahafuma musinagogi, ahavalʼukwinjila munyumba ya Simoni. Uwenʼunyinaṿwala wa Simoni avinile nkanʼinzegema. Pe vahamuvuzilizya vahati: Tutuvuli nawo? 39Pʼuwenʼahamwinamila, ahapililʼinzegema, pʼihamuleha. Pʼuwenʼumwantanda ahavuha nzila ahavavombela.
40Ilelo lwe likuswʼizuva, pe vonti ve vali navayeyevazu impungo zyonti, pe vahavaleta kukwakwe. Pʼuwenʼahavavihʼumuhono uno weka uno weka, ahavazuzuvushizya. 41Zyope nimpepʼimbivi ahazyefwa kuvantʼavinji, zye zihavilishila lwe zikufuma zihati: Iwe we Mwana wa Mulungu. Uwenʼahazipilila ahati: Mutapangaje zinizi; she vamumanyile ukuva wʼuChilisiti wuyo.
42Lwe kushiye kunzi shanzanche, pʼuYesu ahavuhʼukuvala mulwugwa. Pʼavantʼimpuga yonti vahamwaga, vahavalʼukufiha pupo pʼali, vahati tumugalusye atepaje mumwitʼumu. 43Uwene nyene ahavavuzya ahati: Munkaya mwonti nakunji nziyangajʼinongwʼinyinza zya vumwene vwa Mulungu, she zye zizyo ntumilwe. 44Pʼahavalʼukuzikumusya mwonti mumasinagogi munsi ya mu-Galilayi.
Επιλέχθηκαν προς το παρόν:
Luka 4: NYi1965
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Nyiha New Testament © British and Foreign Bible Society, 1965.