Luka 7
7
Yesu nakiza omwiru w'omukuru w'eihe
(Mat 8:5-13)
1Yesu kayamazire kugambira abantu ebigambo ebi byona, agya Kaperinaumu. 2Aho omukuru w'eihe ly'Abaroma ashangwa aina omwiru enganziye, arwaire araliire kufa. 3Orwo yahuliize Yesu, amutumaho abagurusi Abayahudi, namushaba kwija akamukiliza omwiruwe. 4K'abagurusi bagobire Yesu, bamutagiliza muno bati, “Asaine k'omujuna, 5enshonga nagonza eihanga lyaitu, nangu akatwombekera n'esinagogi.” 6Yesu akwata omuhanda agenda nabo. Kayabaire yailiire haihi n'enju, omukuru w'eihe amutumaho banywanyibe ati, “Waitu Mukama, otayeita kubi; inye tinsaine iwe kutaaha mwange; 7niyo nshonga nanye nabona okwo ntasaine kukwegoberaho. Iwe singa ogambe ekigambo, omwiru wange arakira. 8Nanye ndi muntu aina obushobora, ninkulira abaisherukare: Kangira owo nagambira nti, ‘Ogende,’ agenda; ondijo nti, ‘Oije,’ aija; omwiru wange mugira nti, ‘Okore eki,’ mara akikora.” 9Orwo Yesu yahuliire emigambire egi atangalira omukuru w'eihe ogu, ahinduka agambira embaga eyabaire emuhondeire ati, “Mbagambire, nangu n'omuli Isiraeli mwonkai, tinkaabonagamu kwikiliza nk'oku.” 10Ababaire batumirwe kabagarukire omuka, bashanga omwiru yakizire.
Yesu nahimbura omusigazi wa Naini
11Ebiro kabyahingwireho bike, Yesu akwata omuhanda agya omu kigo kilikwetwa Naini. Abegesibwabe n'embaga nyingi bagenda nawe. 12Kayabaire yaija kugoba aha kihigi ky'ekigo, leba nibashohoza omufu, ayabaire ali mwana omumoi ahali nyina, mara nyina ogwo akaba ali ntumbwa, abantu batali bake bamushembire kuruga omu kigo. 13Omukama kayaboine omukazi ogwo, amuganyibwa, amugambira ati, “Leka kulira.” 14Aija akora aha kiliba, ababaire bakishutwire bemelera. Agamba ati, “Musigazi, ninkugambira, imuka.” 15Ayaba afire ashuntama, abanza kufumora. Amuha nyina. 16Abantu bona bakwatwa obutini, bahaisiliza Ruhanga bati, “Tuboine omurangi w'amani!” Bashuba bati, “Ruhanga asingiire yahabukira abantube!” 17Eirangalye limaraho Buyahudi yona n'ensi yona egyataine.
Yohana Omubatiza natuma ahali Yesu
(Mat 11:2-19)
18Abegesibwa ba Yohana bamubarulira amakuru aga. 19Aho omuli bonene abo Yohana ayetamu babili, abatuma aha Mukama ati, “N'iwe owo bagamba kwija, anga tutegeleze ondijo?” 20Entumwa kazagobire ahali Yesu zimugambira ziti, “Yohana yatukutumaho ati, ‘N'iwe owo bagamba kwija, anga tutegeleze ondijo?’ ” 21Omu saa egyo Yesu ashangwa natamba endwara zingi, naiza ebiyengo, nabinga amasitani, nakiza n'abaigazi b'amaisho. 22Abahorora ati, “Mugende mubarulire Yohana ebyo mwabona n'ebyo mwahulira: Abaigazi b'amaisho nibabona, abalema nibatambuka, ababembe bakizire, abaigazi b'amatwi nibahulira, abafu nibahimburwa, n'abanaku bayegesiibwe amakuru garungi. 23Baberwa abatalikunyanga.”
24K'entumwa za Yohana zabaire zagenzire, Yesu abanza kugambira embaga ahali Yohana ati, “Omw'irungu mubaire mugiire kulebayoki? Kulebayo orubingo orulikuchundwa omuyaga? 25Isi mubaire mugire kubonayoki? Kubonayo omuntu ajwete emyendo y'ehalili? Leba, abajwetege, abaikairege, bali omu bikaare by'abakama. 26Isi aho mubaire mugiire omw'irungu kubonayoki? Omurangi? Ego, mbagambire, nangu kushagaho omurangi. 27Ogu n'iwe bahandikireho bati,
‘Leba ndituma entuma yange ekwebembere,
ogwo n'iwe alikutekatekera omuhanda.’
28Mbagambire, abakazairwe abakazi ow'okushaga Yohana taliho. Kyonkai kandi omuke bwoli omu bukama bwa Ruhanga ogwo muhango kushaaga Yohana.” 29Abantu bona n'abashoza kabahuliire ekigambo ekyo basingiza Ruhanga, nobona bakaba babatiziibwe Yohana. 30Kyonkai Abafarisayo n'abeegesa b'Amateka, tibakunzire Yohana k'ababatiza, kityo bayanga ebyo Ruhanga yabaire abatekatekeire.
31“Mbwenu si lero, abantu b'omuzarwa ogu mbashushanise naki, nibashushaki? 32Nibashusha abaana abashuntamire omu katare nibetangana bakwese,
‘Twabatelera emilere, timwazina,
twachura, timwalira.’
33Aha rw'okuba Yohana Omubatiza aizire atali wa kulya mukate anga kunywa divai, inywe muti, ‘Ainamu eisitani.’ 34Omwana w'Omuntu yaija nalya nanywa, muti, ‘Leba ow'omururu, entamiizi, munywanyi w'abashoza n'abafakare!’ 35Kyonkai abalikukunda obumanyi nibajulira okwo buli bumanyi nyakabara.”
Yesu omwa Simoni Omufarisayo
36Omufarisayo omoi ashaba Yesu kulya omwa wenene. Ataaha omw'Omufarisayo ogwo ashuntama kulya. 37Omukazi omoi w'omu kigo ekyo, ayabaire ali mufakare, kayahuliize okwo Yesu ali omw'Omufarisayo nalya ekyakulya, aija n'echupa y'eibare y'amajuta g'okwesiiga, 38yamwemelera enyuma aha maguru nalira, amaguru ga Yesu yagajobesa amalira, yamara yagaragaza n'eishokelye, amaguru ago yaganywegera, yashuba yagasiiga amajuta. 39Aho Omufarisayo ayabaire amuraliize kayaboine ebyo atekeleza ati, “Kuba omuntu ogu ali murangi, yakumanyire omukazi ogu ayamukwataho wa ngeliki, enshonga mufakare.” 40Yesu amuhorora ati, “Simoni, nyina eky'okukugambira.” Simoni amushubamu ati, “Ni kihai, Mwegesa?” 41Yesu ati, “Omuntu omoi akaba natonga abantu babili. Ogu namutonga edinari 300, kandi asigaire namutonga edinari 50. 42Kabalemirwe kumshashura bombili yabagarulira. Mbwenu omuli bombili abo aramugonza kushaaga n'ohai?” 43Simoni ahorora ati, “Owo agaruliire bingi kushaaga.” Yesu agambira Simoni ati, “Waramurage.” 44Nikwo kuhinduka alebire omukazi akabaza Simoni ati, “Omukazi ogu nomubona? Kanataha omwawe tiwampa maizi ga kunaba maguru. Kyonkai wenene amaguru gange yagajobesa amalira, yamara yagaragaza n'eishokelye. 45Tiwannywegera, kyonkai kwema aizire takalekeire kunnywegera gange. 46Tiwansiiga majuta mu mutwe, kyonkai wenene yasiiga amaguru gange amajuta. 47Aha rw'ekyo ninkugambira okwo yagarulirwa amafuge gangi, enshonga yagonza muno, kyonkai kandi omuntu agarulirwa bike n'okugonza agonza kuke.” 48Yesu ashuba agambira omukazi ogwo ati, “Amafu gawe gagarulirwa.” 49Aho abantu abo yabaire ainabo aha kifuko babanza kwebaza bonene bonkai bati, “N'ohai ogu, ayagarulira n'amafu?” 50Yesu agambira omukazi ati, “Okwesiga kwawe kwakurokora; ogende n'emilembe.”
Επιλέχθηκαν προς το παρόν:
Luka 7: RHAY01
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Ruhaya DC Bible © Bible Society of Tanzania, 2001.