MATAYO 15
15
Yesu egharusha ishagho la kusagura menda
(Mrk. 7:1-23)
1Niho Vafarisayo na vaandiki vefuma Yerusalemu vakamswia Yesu, vekiti, 2“Hanini varateri vako vekonda viziomo vya vazima? Ambu vekila kijo teveoja mikono.” 3Akagharusha, akavati, “Hanini na unywi mwekonda iamoro la Mrungu vuntu vwa menda enyu? 4Mrungu eazere kuti, ‘Vikia vaveo na mlala wenyu shima, na, Enemrara vavee kana mlala wavo nafwe.’ 5Mira unywi muti, Mntu ekimti vavee kana mlala wavo kuti, ‘Kila chekitara kukughenja, chaoka itasi,’ 6huvo kive asimvikiewa vavee na mlala wavo shima; mukavusha kiteto cha Mrungu vuntu vwa viziomo vya vazima venyu. 7Unywi valung’ong’o, ni chedi kila Yesaya erotie he mburi yenyu, ekiti,
8‘Ava vantu venishimia na myomo;
Mira ngoro javo jiho hae nami;
9Navo venitasa sutwa,
Vekicheja michejire ya maazero a kivantu.’” 10Akaitanga mavungano, akavati, “Sikijeni, mutwarije! 11Kila cheingia he momo, sicho chemgera mntu kivivi, mira kila chefuma he momo, nicho chemgera mntu kivivi.” 12Niho varateri vakwe vakamswia, vakamti, “Wemanyije iti Vafarisayo vekinasikie kila kiteto, vavihiwa?” 13Akagharusha, akavati, “Kila chesihandiwe ni Vava wangu wa uko wanga kinejutwa. 14Vashigheni avo ni matuntu, verongorira matuntu vaghenji. Mira ituntu lekirongorira ituntu mghenji, vose veri venegwa he ikongo.” 15Petro akagharusha, akamti, “Tuhererejije uo mfwanano.” 16Yesu akavati, “Kave na unywi mhaka iki temunatwarija? 17Temumanyije iti kila chevechija he momo kivechija he ndeni, na kutaghwa he choo? 18Mira vila vyefuma he momo, vifuma he ngoro; ivyo nivyo vyemjiraja mntu. 19Ambu he ngoro hefuma madunganyo mavivi: kukoma, kushinda, kushisha, kuiva, kuchungija mongo na viraro. 20Ivyo nivyo vyemjiraja mntu, mira kula na mikono yesiojijwe, tekumjiraja mntu.”
Kubanjwa kwa m’bora Mkanani
(Mrk. 7:24-30)
21Yesu akavuka uko akatonga mondo wa Tiro na Sidoni. 22Aho hekina mche wa Kikanani, efuma he mihaka ya lila isanga, akamzia, akamwiyaghia ekiti, “Mfumwa, mwana Davidi, univoneie! Mwana wangu wa kibora egurirwe ni mpepo.” 23Naye temgharushe ni. Varateri vakwe vakamswia, vakamsemba vekiti, “Mwaghanye ambu etukekesa aho nyuma.” 24Naye akagharusha, akati, “Situmiwe hangi mi esire he magonji a nyumba ya Israeli etekie.” 25Naye akaza, akamdunkutia ekiti, “Mfumwa, nighenja!” 26Mira ye akagharusha, akati, “Si chedi kughuha kijo cha vana uviritie maguro.” 27Akati, “Yee Mfumwa, mira hata maguro erala vibendo vila vyegwa hala si he meza ja vazuri vao.” 28Niho Yesu akagharusha, akamti, “Mcheku, mwitikijo wako ni m’baha, nakikuokie sa vuntu wekundie.” Mwana wakwe akabanda saa ila ila.
Vajinki vebanjwa
(Mrk. 7:31-37)
29Yesu akavuka uko, akafika mbaimbai ya bahari ya Galilaya; akakwea he ntuvi, akaikaa si. 30Mavungano mangi vakamswia: veholoje, matuntu, vesiidimateta, venye viema na vangi vajinki, vakavavika he maghu akwe Yesu, naye akavabanja; 31niho lula luvungano lukamaka vekivona iti vesiidimateta veteta, venye viema vebanda, veholoje vetonga, na matuntu vevona; vakamkaza Mrungu wa Israeli.
Kuighushwa kwa vantu viku vine
(Mrk. 8:1-10)
32Yesu akaitanga varateri vakwe, akati, “Niondia luvungano, ambu iki ni misi mitatu verena nami, neri vesina chala, nami sikunda kuvaaghanya vesinala, vakaresempukia nzieni.” 33Varateri vakwe vakamti, “Tuvonia hi mikate mijinki aha nyika, yekoloka kuighusha luvungano lubaha huvu?” 34Yesu akavati, “Muna mikate mingahi?” Vakati, “Mfungate na vusamaki vughere.” 35Akavaazera luvungano vaikae si. 36Akaghuha ila mikate mfungate na vula vusamaki, akaanjela, akavibendua, akavainka varateri vakwe, varateri navo vakainka mavungano. 37Vakala vose, vakaighuta; vakatoa vibendo vyeshele, vakaizuja vikapu mfungate. 38Na vala velie neki va kiume viku vine, kushigha vache na vana. 39Akavaaghanya mavungano, akaingia he ngilawa, akatonga mondo wa Magdala.
Επιλέχθηκαν προς το παρόν:
MATAYO 15: CHSUNT67
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Chasu New Testament © Bible Society of Tanzania, 1967.