Matio 3
3
Jâŋ Mbabtis né shwóŋó nò Ssé
(Malékuse 1.2-6; Lukase 3.1-6; Jâŋ 1.19-23)
1Á zye ńnéŋe, Jâŋ Mbabtis kẅɛɛ nkwòŋo tsẅɛ Jẅidea, ńně sá’a ngie: 2Pi kúbe mà gẅi, á nue àfʉ̀’ gie Ssé ge nyɛ lefùɔ sé tsoté tà ne ḿbɔ́ɔnte. 3Jâŋ lɔgɔ pú’u, ńgwɔ́ nyìŋ gẅie *ntsẅì nkʉ̀ Ssé Esǎya la gɔɔn nò ńtí yé ngie:
«Ngyè nyìŋ kwɔ̌’ fó nkwòŋo tsẅɛ, ńgɔɔn ngie: Pi nyɛte mánzsè Cʉ̀apʉ̀a,
ńgÿo melyěen nzsè mé e tyé ndʉŋ ndʉŋ».
4Jâŋ laa nkwòŋo tsẅɛ, ḿma’ nzsǒ, mbà mé la lɔg menoŋ kamel ḿbá’, ńdɔgɔ *ngùb nɔ̀ɔn ńtʉ́me zẅɛ̌’ yé, àyé mmó léjÿó e gwɔ́ ngǐm ńgÿo nŋwá’ tsẅɛ. 5Epʉ̀a ně fóo Yerósalem, éfóo Jẅidea, mbɔɔ ná pàga ngwòŋ gie áa ngʉ̀ŋe ntse Jurdeŋ, ńtóo, ńgyá Jâŋ, 6ńtyé mvfò mânyìŋ ntsèm, ńzẅíŋe meno tepoŋ mɔ́b, á nu’u wɔ́b tsɛ̀ɛ ntse Jurdeŋ.
7Jâŋ gyá pá’ pʉ̀a ná nùɔ pà *farisay paa pʉ̀a ná nùɔ pà *sadukay tó yɔ́b tà ńgyɔ́ɔn, pá’ à ge nu’u wɔ́b ntse, ńgɔɔn né pɔ́b ngie: ngẅɛ̀ mennú, pàpá’ legye, àwɔ́ zɔ piŋ shwóŋó gẅi lékÿo ngɔ́’ gie pi lyɛbté tà é ne ńge gwe á ná pi. 8Pi gÿo pɔ́ menò mbòŋo mie e nyɛɛ ngie pi kubé mà. 9Pi pɔ́ɔn lélɔg pɔ́ ndà’ ncwò gẅi ńgɔɔn ngie: Peg ee ngẅɛ̀ Ábalam. Tà mèŋ n ké shwóŋó gẅí, e Ssé ku’u lésele metóon pɔ̀ɔn ńdɔg ńgÿo ngẅɛ̀ Ábalam 10Mé ně ńzɔɔn ndá’ ńkaa ńzɔɔn lélɔg ńkɔ́’ɔ yɛ̌ yɛ̌ tÿǒ wɔ́ gie á té zém ntɔ̌ɔn mbòŋo wɔ́, éfó ssé kɔ́’ɔ yé, e ké ma’ pɔ́ mmɔ̌g
11Mèŋ, n gẅiin yɔ́ɔn pɔ́ ndà’ lénu’u gẅi tsɛ̀ɛ ntse, lélɔg ńnyɛ ngie pi kubé mà. Tá nyìŋ gẅie aa nzèm mèŋ ńne ńtóo, ge tó yé néŋ pʉ̀a mbwó Zẅìge Ndʉalʉ̌a, é néŋ pʉ̀a tsɛ̀ɛ mmɔ̌g. À cʉa wɔ̀ɔn, tà mèŋ n tè ku’u lésẅɛ melɔ̌ɔn mé wɔ́. 12À ge tó tyɛ́te shúm sie mé lagá nká’. E néŋ sé mbòŋo tsɛ̀ɛ nkìŋ. E cʉ́’ kʉ̀ŋe, à pÿɛɛ tsɛ̀ɛ mmɔ̌g gẅie é té ńdá’a ḿbyé wɔ́.
Mé nu’ú Yěsô ntse
(Malékuse 1.9-11; Lukase 3.21-22; Jâŋ 1.29-34)
13Yěsô leen ńké fó Galilea ńtóo ncwò ntse Jurdeŋ, ńgyá Jâŋ légwɔ́ gie Jâŋ ge nu’u yé ntse. 14Jâŋ ně ńdʉ’ʉ, ńně ńgɔɔn né yé ngie: Gù zɔ gẅiin lénu’u wɔ̀ɔn ntse, ɔ̀ pǐŋ ńtó ngie mèŋ n nu’u gú tsɛ̀ɛ ntse lá? 15Tá Yěsô tsɔ́’ɔ mbwo yé ngie: Zẅíŋ ngie á gwɔ́ pú’u, fʉ̀’ɔɔn, mélà’mie pɔ́gɔ lɔɔn ńgÿo pú’u, tá á lɔgɔ ńgwɔ́ mmó gie e Ssé né ńzɛ́te. Jâŋ leen ńké ńzẅíŋ, 16ńnu’u yé ntse. Yěsô gwɔ́ tá ńkẅɛ, ncwò tÿǒ lepwó tsɔ́’ɔ ńtyé. Á gyá Zẅìge Ssé fó tÿǒ ésẅɛ́’ ńgwɔ́ pá’ kàpʉŋ la, ńtó ńnéŋe ná yé. 17Ngyè fó tÿǒ lepwó ngie: Wɔɔn aa Míŋ wɔ̀ɔn, mèŋ n kwoŋo yé tɛ’, aa wɔ̀ɔn lekág
Επιλέχθηκαν προς το παρόν:
Matio 3: NGBM
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Nouveau Testament en Ngienboum © Alliance Biblique du Cameroun, 2007.