Yohanes 9
9
Yesus kase sembu satu orang yang buta
1Waktu Yesus sementara bajalang, Dia lia satu orang yang so buta dari lahir. 2Turus, Yesus pe murit-murit batanya pa Yesus, “Guru, bikiapa kong orang ini lahir buta? Dia buta karna dia pe dosa sandiri atau gara-gara dia pe orang tua pe dosa?”
3Yesus jawab, “Dia buta, bukang karna dia pe dosa deng bukang lagi gara-gara dia pe orang tua pe dosa, tapi supaya orang-orang dapa lia Tuhan Allah pe kuasa yang bakarja pa dia pe hidup. 4Tuhan Allah yang utus pa Kita ada kase tugas yang torang musti biking. Torang musti biking tugas itu skarang, karna ada dia pe waktu nanti torang tara bisa biking tugas lagi. Itu bole kase sama deng kalu masi siang, orang masi bole bakarja, tapi kalu so malam, so tarada orang yang bisa bakarja lagi. 5#Mat. 5:14; Yoh. 8:12 Jadi selama Kita masi ada di dalam dunia, Kita ini tarang dunia yang kase tarang manusia pe hati.”
6Abis Yesus bilang bagitu, Dia buang luda di tana, kong kase campur Dia pe luda itu deng tana sadiki sampe tana itu jadi pece. Abis itu, Dia kase goso pece itu pa orang buta itu pe mata. 7Kong Dia bilang pa orang buta itu, “Pigi suda, kong cuci ngana pe muka di kolam Siloam.” (Siloam itu pe arti, ‘Yang dapa utus’.) Pe dengar itu, orang itu pigi cuci dia pe muka di situ. Kong waktu dia mo bale pa dia pe ruma, dia so bisa dapa lia.
8Turus dia pe birman-birman deng orang-orang yang tau dulu dia itu tukang minta-minta, dorang baku bilang, “Dia itu ka, yang tuhari jaga dudu minta-minta?”
9Ada yang laeng bilang, “Butul! Dia itu suda!”
Kong ada lagi yang bilang, “Bukang dia. Itu orang laeng yang pe muka persis sama deng dia.”
Tapi orang yang tuhari buta itu bilang, “Ini kita suda.”
10Kong dorang tanya pa dia, “Bagimana sampe ngana pe mata skarang so bole dapa lia?”
11Dia jawab, “Orang yang pe nama Yesus itu, Dia baluda di tana kong biking pece, abis itu Dia kase goso pece itu pa Kita pe mata. Turus, Dia suru kita pigi di kolam Siloam la kita cuci muka di situ. Kong kita pigi. Pe abis cuci muka, kita so bole dapa lia.”
12Kong dorang bilang pa dia, “Kong di mana Dia skarang?”
Orang itu jawab, “Kita tara tau.”
Orang-orang dari aliran Farisi baku malawang tentang Yesus kase sembu orang di hari Sabat
13Kong dorang bawa orang yang tuhari buta itu pa orang-orang Yahudi dari aliran fanatik yang pe nama Farisi. 14Waktu Yesus kase sembu pa orang buta itu, itu pas di hari Sabat, hari yang orang agama Yahudi tara bole bakarja. 15Jadi, orang-orang dari aliran Farisi itu batanya ulang pa orang yang so sembu itu, bagimana sampe dia pe mata bole dapa lia.
Turus dia jawab, “Ada Orang yang goso pece pa kita pe mata. Abis itu, kita cuci kita pe muka, kong kita so bole dapa lia.”
16Kong ada dari dorang yang aliran Farisi itu bilang, “Orang yang kase sembu pa orang ini, tara mungkin Tuhan Allah yang utus, barang Dia tara iko aturan agama tentang hari Sabat.”
Tapi yang laeng bilang, “Kalu Dia orang berdosa, tara mungkin dia bisa biking mujizat macam bagitu.” Kong dorang deng dorang baku malawang tara abis-abis.
17Jadi dorang batanya ulang pa orang yang dulu buta itu, “Ngana ini yang Dia so kase sembu ngana pe mata to? Jadi menurut ngana, Dia itu sapa?”
Dia jawab pa dorang, “Dia itu Nabi yang jaga kase turus Tuhan Allah pe pasáng pa orang-orang.”
18Tapi dorang itu tetap tara percaya orang itu perna buta kong skarang so dapa lia. Jadi dorang pangge dia pe papa deng mama, 19kong dong tanya, “Dia ini ngoni pe ana to? Ngoni bilang kata, dia lahir buta, tapi bagimana kong skarang dia so bisa dapa lia?”
20Kong dia pe papa deng mama jawab, “Memang butul, dia ini torang pe ana. Dia so buta dari lahir. 21Tapi bagimana sampe dia so dapa lia skarang, itu torang tara tau, deng sapa yang biking sampe dia bisa dapa lia, itu me torang tara tau. Coba bapa-bapa tanya sandiri suda pa dia. Dia itu so basar, jadi dia bisa jawab sandiri.” 22Dia pe orang tua bilang bagitu, karna dorang tako pa pemimpin-pemimpin agama Yahudi. Barang, pemimpin-pemimpin agama Yahudi itu so baku ator, kalu ada orang yang mangaku Yesus itu Mesias, Raja yang Tuhan Allah janji mo kase slamat pa manusia, orang itu dapa larang maso di ruma ibada agama Yahudi. 23Itu yang biking sampe dia pe orang tua bilang, “Dia itu so basar, tanya sandiri suda pa dia.”
24Jadi dorang pangge ulang pa orang yang perna buta itu kong bilang pa dia, “Ee! Ngana musti basumpa pa Tuhan Allah pe muka, yang ngana mo bilang ini butul. Barang, torang tau Yesus itu orang berdosa.”
25Orang yang dulu buta itu jawab, “Orang itu berdosa ka tarada, kita tara tau. Tapi yang kita tau, tempo hari kita buta, tapi skarang kita so bisa dapa lia.”
26Kong dorang batanya lagi pa dia, “Apa yang Dia biking pa ngana kong? Bagimana sampe ngana pe mata bisa dapa lia?”
27Orang itu jawab pa dorang, “Tadi to, kita so bilang, tapi ngoni tara mau percaya. Bikiapa kong ngoni mo dengar ulang? Kaapa ngoni lagi mau jadi Dia pe murit?”
28Kong dorang hina pa dia bagini, “Ee, ngana itu yang jadi Orang itu pe murit, tapi torang ini nabi Musa pe murit-murit. 29Torang tau, Tuhan Allah so bicara pa nabi Musa, tapi tentang Orang itu, torang tara tau Dia itu datang dari mana.”
30Kong orang itu kase jawab pa dorang, “Paling ane suda ngoni ini. Masa ngoni tara tau dari mana Dia datang, padahal Dia so kase sembu kita pe mata sampe kita so bisa dapa lia. 31Torang tau, Tuhan Allah tara dengar orang berdosa pe doa, tapi Dia cuma dengar pa sapa saja yang hormati pa Dia, deng yang hidup biking apa yang Dia mau. 32Dari pertama Tuhan Allah biking dunia sampe skarang ini, bolong perna torang dengar ada orang yang kase sembu pa orang yang buta dari lahir sama deng kita ini. 33Jadi kalu Orang yang kase sembu pa kita itu tara datang dari Tuhan Allah, Dia pasti tara bisa biking apa-apa!”
34Kong dorang bilang pa dia, “Ee, ngana ini so berdosa memang dari ngana lahir, kong masa ngana mo ajar pa torang lagi?” Kong mulai waktu itu suda, dorang larang pa dia maso di ruma ibada agama Yahudi.
Yesus rasa kasiang pa orang banya yang tara tau apa yang butul
35Yesus dapa dengar, orang yang dulu buta itu so dapa larang maso lagi di ruma ibada agama Yahudi. Kong Yesus pigi baku dapa deng orang itu, turus bilang pa dia, “Ngana percaya pa Anak Manusia yang dari sorga?”
36Dia bale batanya, “Bapa, Dia itu sapa? Tolong bilang pa kita supaya kita bole percaya pa Dia.”
37Yesus bilang pa orang itu, “Ngana bukang cuma ada lia pa Dia, tapi ngana me so bicara deng Dia skarang. Anak Manusia itu, Kita suda.”
38Orang itu bilang pa Yesus, “Tuhan, kita percaya.” Turus dia berlutut semba pa Yesus.
39Kong Yesus bilang, “Kita datang di dunia ini supaya kase tunju sapa yang butul deng sapa yang sala. Orang yang bolong kanal pa Tuhan Allah, Kita kase kanal Tuhan Allah pa dorang supaya dorang jadi sama deng orang buta yang bole dapa lia. Kong orang yang bilang kata, dong sandiri so kanal Tuhan Allah, dorang akan jadi sama deng orang buta.”
40Pe dengar Yesus bilang bagitu, babarapa orang Yahudi dari aliran Farisi bilang pa Dia, “Jadi menurut Bapa, torang ini me buta lagi?”
41Yesus jawab pa dorang, “Kalu ngoni buta, itu berarti ngoni tara tau apa yang butul, jadi waktu ngoni biking dosa, ngoni tara tau ngoni ada biking dosa. Tapi ngoni bilang kata, ngoni mangarti yang butul, kong ngoni tetap biking dosa, jadi Tuhan Allah bilang ngoni masi tetap ada dosa.”
Επιλέχθηκαν προς το παρόν:
Yohanes 9: PB MMU
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Perjanjian Baru Bahasa Melayu Maluku Utara @ Lembaga Alkitab Indonesia 2020