Yohane 20
20
Chiyuka chaku Yesu ku nyifwa
(Mateyu 28.1-8; Marko 16.1-8; Luka 24.1-12)
1Kweni pa zuŵa lachimoza la Sabata Mariya waku Magdala watuŵa ku kuunda ndi mlenjulenji, po kwenga kweche mdima, ndipo wanguwona mwa watuzgikako ku muunda wo. 2Wanguchimbiya kuza kwaku Simoni Petro ndi ku msambizi munyake, mweniyo Yesu wamwanjanga, “Watuzgamo Ambuya mumuunda wo, wanena nawo, ndipo kuti tiziŵa cha po ŵaŵaŵika.” 3Viyo wangutuwa Petro, ndi msambizi munyake yo, ŵanguna ku muunda. 4Wo ŵaŵi ŵachimbiriyanga pamoza: kweni msambizi munyake yo wanguchimbiya kwakurutiriya Petro, ndipo wangudanjiriya ku muunda wo; 5pakulingirizgamo ŵawona saru za bafuta zakurarikikapo: ndikweni kuti wanguseremo cha. 6Watuza Simoni Petro, wakumrondo, wangusere mu muunda, wanguwona zabafuta zakurarikika, 7ndichakuleske, cho chenga pa mutu pake, charkurarikika pamoza ndi zabafuta cha, kweni chakupeteka pade pakuchija. 8Viyo so wanguseremo msambizi munyake nayo, yo wangudanga kufika ku muunda, ndipo wanguwona, ndi wanguvwana. 9Chifukwa ndipo wenga ŵandaziŵe lembo lo lakuti kungumwenere kuyuka ku ŵakufwa. 10Viyo ŵasambizi ŵanguwere so kwako.
Yesu wawoneka kwaku Mariya Magdala
(Mateyu 28.9-10; Marko 16.9-11)
11Kweni Mariya wamanga ku muunda kubwaro, wakuliya: ndipo wachitenje wanguŵerama kulingirizgamo mu muunda wo; 12ndipo wanguwona ŵangelo ŵaŵi ŵakuvwara vituŵa wakujapo, yumoza kuchiri ku marundi, po lingura thupi laku Yesu. 13Ndipo yaŵa wangunena nayo, “Wamunthukazi, uliyanji?” Waŵanene, “Pakuti ŵamtuzgamo Mbuyangu, ndipo kuti ndiziŵa cha ko ŵamuŵika.” 14Wanguti wakamba viyo, wangung'anamukiya kuvuli, ndipo wangumuwona Yesu wakumapo, kweni wengavi kuziŵa kuti ndi Yesu. 15Yesu wanena nayo, “Munthukazi we, uliyanji? Upenja yani?” Iyo, pakupima kuti ndiyo mweni-munda, wanena nayo, “Bwana, asani ndiwe wamunyamuwamo, ndinene po wamuŵika, nkhamtuzgepo.” 16Yesu wanena nayo, “Mariya!” Pakung'anamuka iyo wanena nayo mu chiHebere, “Raboni!” Ko nkhuti, Msambizgi. 17Yesu wanena nayo, “Reka kundiko, chifukwa ndindakwere ku Ada; kweni kanga ku ŵabali ŵangu, kaŵanene, ndikwere ku Ada Auskemwe, kwaku Chiuta wangu ndi Chiuta winu.” 18Mariya Magdala wanguza kuŵanene ŵasambizi, “Ndaŵawona Ambuya”; ndipo wanguŵanene vyo Ambuya angumunene.
Yesu wawoneka ku ŵasambizi ŵake
(Mateyu 28.16-20; Marko 16.14-18; Luka 24.36-49)
19Viyo kwati kwaŵa mazuru, pa zuŵa liya lachimoza la sabata, penipo visasa vingujarika mo mwenga ŵasambizi, chifukwa cha kopa ŵaYuda wanguza Yesu, wanguma mukati mwawo wangunena nawo, “Chimangu chikuŵiyeni!” 20Ndipo wachikamba chenichi, wanguŵarongo manja ghake ndi liŵaghara lake. Viyo ŵangukondwere ŵasambizi wo, ŵachiŵawona Ambuya. 21Yesu wanguŵanene so, “Chimangu chikuŵiyeni! Mo Dada wanditumiya ine, nane so ndikutumani.” 22Ndipo wati wakamba ichi, wanguŵauziriya wanguti kwaku wo, “Rondeni Mzimu Wakupaturika. 23Asani mungaŵareke vilakwa vya ŵanyake, viŵarekekiyenge; ne mukhozga vya ŵanyake, vikakhozgekanga.”
Yesu ndi Tomase
24Kweni Tomase, yumoza wa chumi ndi ŵaŵi wo, wakuzumbulika Didumo, pengavi pamoza nawo penipo wanguza Yesu. 25Viyo ŵasambizi ŵanyake wangumnene, “Taŵawona Ambuya!” Kweni iyo wanguŵanene, “Kwambura kuti ndawona mu manja ghake mabamba gha mizumali yo, ndi kuweskamo munwi wangu mo mizumali yingukhomeka, ndi kuŵika janja langu mu liŵaghara lake, kuti nkhavwananga cha.”
26Ndipo pavuli pa mazuŵa ghankhonde ndi ghatatu ŵasambizi ŵake ŵenga mwenimo so, ndi Tomase pamoza nawo. Wanguza Yesu vyati vyajarika visasa vyo, ndipo wanguma mukati mwawo, wanguti, “Chimangu chikuŵiyani.” 27Sono wanena ndi Tomase, “Hanawo kuno munwi wako, ndi lereska manja ghangu; hanalo janja lako, ŵika mu liŵaghara langu: ndipo ungaŵangu wambura kuvwana cha, kweni wakuvwana.” 28Wangwamuka Tomase, wangunena nayo, “Ambuyangu ndi Chiuta wangu!” 29Yesu wanena nayo, “Kumbi wavwana, chifukwa wandiwona? Mbamwaŵi wo ŵavwana wenga wandandiwone.” 30Viyo visimikizgu vinyake vinandi wanguchita Yesu pa maso pa ŵasambizi ŵake, vyenivyo virive kulembeka mu buku lenili. 31Kweni vyenivi vyalembeka, alinga kuti muvwane kuti Yesu ndiyo Kristu, Mwana waku Chiuta: ndikuti mwaŵakuvwana muŵendi umoyo mu zina lake.
Επιλέχθηκαν προς το παρόν:
Yohane 20: TongaMw
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Bible Society of Malawi