मत्ती 2
2
भविष्यवक्ता यरूशलेम जो आये
1हेरोदेस राजा जैहणै यहूदिया परदेस मन्ज राज्य करू करदा थू ता बैतलहम ग्राँ मन्ज यीशु रा जन्म भुआ। तैस टैमैं पूर्व दिशा थऊँ कई ज्योतिषी मणु जैड़ै तारै रा अध्ययन करदै थियै, यरूशलेम मन्ज ईच्ची करी पुछणा लगै, 2कि “यहूदी रा राजा जसेरा जन्म भुआ, सो कड़िआ? क्ओकि अहै पूर्व दिशा मन्ज अक्क तारा हेरूआ जैड़ा तसेरै जन्म रै बारै मन्ज दसदा ता अहै तैस बच्चै जो प्रणाम करना आये।”#गिण. 24:17.
3राजा हेरोदेस अतै यरूशलेम शहर रै कैई मणु जैहणै ऐह हुणु कि अक्क नौआ राजा पैदा भूआ ता सो ड़री गै। 4ता राजै प्रजा रै सब प्रधान याजका अतै शास्त्री जो हैदी करी तियां थऊँ पूछु, “पवित्रशास्त्र कै बलदा कि मसीहा रा जन्म कड़ी भूणा चहिन्दा?” 5तिऐं राजै सोगी बल्लू, “यहूदिया रै बैतलहम ग्राँ मन्ज जैड़ा यहूदिया परदेस मन्ज हा” क्ओकि भविष्यवक्तै लिखुरा कि
6“हे बैतलहम रै मणुओ, तुहै जैड़ै यहूदिया रै परदेसा मन्ज हिन,
तुसै कसी भी तरीकै, यहूदा परदेस रै अधिकारी थऊँ हल्कै ना हिन;
क्ओकि तूसु थऊँ अक्क ऐसा राज्य करनै बाळा अधिकारी नकैणा,
जैस मेरी इस्त्राएली प्रजा री रखबाळी करनी हा।” #मीका 5:2.
7ता राजै तियां ज्ञानी मणु जो चुपचाप हैदी करी तियां थऊँ पूछु कि, “तारा ठीक कस टैमैं हुजुरा?” 8राजै तियां ज्ञानी मणु जो ऐह बली करी बैतलहम जो भैजु कि, “गच्छा, तैस गोबरू रै बारै मन्ज ठीक-ठीक पता करा। अतै जैहणै सो मुळी गाला ता मिन्जो ईच्ची करी खबर दिन्यै ताकि अऊँ भी गिच्ची करी तैसिओ प्रणाम करूं।”
9ज्ञानी मणु तसेरी गल्ला हुणी करी चली गै, अतै जैडा तारा तिऐं पूर्व दिशा मन्ज हेरूरा थू सो तंयारै अगो-अगो चल्लु; अतै जैड़ी सो गोबरू थू तैस घरा रै ऊपर पुजीकरी रूकी गो। 10तैस तारै जो हेरी करी सो बड़ै खुश भुएै। 11तिऐं तैड़ी पुजीकरी गोबरू जो तसेरी माता मरियमा सोगी हेरू, अतै हैरा झुकाई करी गोबरू जो प्रणाम करना लगै, फिरी अपणा-अपणा झोल्ळू खोली करी तैसिओ सोना, लोबान, अतै गन्धरस भेंट करू। 12तियां ज्ञानी मणु जो सुपना भुआ कि हेरोदेसा बलै फिरी करी मत गान्हदै, ता सो होरी बत्ता मितै अपणै देशा जो फिरी गै।
यूसुफ रा मिस्त्र देशा जो गाणा
13ज्ञानी मणु रै गाहणै थऊँ बाद प्रभु रा अक्क स्वर्गदूत यूसुफ रै सुपनै आ अतै बल्लू, “उठ, ऐस गोबरू जो अतै सेरी मौआ जो लेई करी मिस्त्र देशा जो नह्ही गा; अतै जैहणै तक अऊँ ना बल्लू तैहणै तिकर तैठिये ही रैंह; क्ओकि राजा हेरोदेस ऐस गोबरू री तोपा पेऊरा कि ऐसिओ मरवाई देय्आ।”
14ता सो राती ही ऊठु अतै गोबरू अतै तसेरी माता जो लेई करी मिस्त्र देशा जो चली गो, 15अतै राजा हेरोदेस रै मरनै तक तैठिये ही रैऊ। ठेरैतांये कि सो बचन जैड़ा प्रभुऐ भविष्यवक्ता रै द्वारा बलुरा थू सो पुरा भोआ “मैंई अपणै पुत्रा जो मिस्त्र देशा थऊँ हैदुरा।” #होशे 11:1.
16जैहणै राजा हेरोदेस जो पता लगा कि ज्ञानी मणु तैस सोगी धोखा करूआ, ता सो बड्डा क्रोधित भुआ, अतै सपाई जो भैजी करी ज्ञानी मणु रै दसुरै ठीक-ठीक टैमां रै मुताबक बैतहलम ग्राँ अतै तठेरै नेड़ै तेड़ै री जगह मन्ज दूँ साला थऊँ हल्कै सबी बच्चै जो मरवाई दिता। 17ता जैडा बचन यिर्मयाह भविष्यवक्तै बलुरा थू सो पुरा भुआ कि
18“रामाह ग्राँ मन्ज, रूण-कलत पेऊरा;
राहेल अपणै गोबरू तांऐ रोऊ करदी थी,
अतै शान्त भूणा ना चाहन्दी थी,
क्ओकि सो मरी गच्छुरै थियै।”
अतै जैहणै तिकर हेरोदेस ना मरू सो तैठिये रैऊ।
ठेरैतांये कि ऐह बचन जैडा भविष्यवक्तै बलुरा थू पुरा भोआ
कि “मैंई अपणै पुत्रा जो मिस्त्र थऊँ हैदुरा।”#होशे 11:1.
मिस्त्र देशा जो फिरी करी ईणा
19राजा हेरोदेस रै मरनै थऊँ बाद, जैहणै यूसुफ अतै तसेरा परिवार मिस्त्र देश मन्ज ही थियै ता प्रभु रा अक्क स्वर्गदूत यूसुफ रै सुपनै आ अतै बल्लू, 20“उठ, गोबरू अतै सेरी मौआ जो लेई करी इस्त्राएल जो फिरी गा, क्ओकि जैडा ऐस गोबरू जो मारना चाहन्दै थियै सो मरी गै हिन।”
21तिनी उूठी करी गोबरू अतै तसेरी मौआ जो लैऊ, अतै इस्त्राएल जो फिरी आ। 22पर जैहणै तैसिओ ऐह पत्ता लगु कि हेरोदेसा रा पुत्र अरखिलाउस यहूदिया परदेस पुर राज्य करू करदा, ता सो तैड़ी गाणै थऊँ डरू। पर सुपनै मन्ज प्रमात्मैं री चेतावनी पाई करी गलील परदेसा जो चली गो, 23अतै नासरत नां रै शहरा मन्ज गिच्ची बसु, ताकि ऐह बचन पुरा भोआ, जैडा भविष्यवक्तै बलुरा थू; कि “तैस नासरी कहलाणा।” #लूका 18:7.
Επιλέχθηκαν προς το παρόν:
मत्ती 2: GBKNT
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
This work is licensed under Creative Commons Attribution-ShareAlike 4.0 License.