O LUKAS 19
19
O Yesus de o Zakheus
1Maöraha o Yesus womahi ädono o Yerikho mabereraika, Unanga wotagi gila-gila watilakuru o berera gënanga. 2O bereraka gënanga naga womatëngo o soungu wogaho-gahoko manga häeke wokaya-kaya. Ai romanga o Zakheus. 3Unanga woigo wïmäke o Yesus o naguna gënanga, mäkarana o nyawa yowöeholi deʼ unanga mahirete wopoluluku, hoünanga wakunua wïmäke o Yesus. 4Hoʼ, ünanga womapopäta wärorebe o nyawa mangangöe, daha wadöa o gota o utu moi, hupaya yakunu wïmäke o Yesus kiaka mahutuohi aha wakaino genangino. 5Maöraha o Yesus wadono o gota gënanga, ünanga womä lega womamataga daha wotemo, ”Zakheus, nouti itaiti! Hababu Ngohi kokiani totulu anitauika o wange nënanga.”
6O Zakheus womatai-taiti wouti deʼ wïbuhuku o Yesus de aimörene. 7O nyawa mata-mata yamäke o hali gënanga muläenge yokurubungu. Onanga yotemo, ”Hedeke! Unanga woiki wotamu o nyawa madorou manga tauika!”
8Ipaha aitauoka, o Zakheus womaoko deʼ wotemo o Yesusika, ”Jou, ahiarata mahononga aha ngohi tahihadaka o mihikini manyawaika; deʼ o nagona dika tärusioka, aha ngohi tofangu tohigilio onangika higali maiata!”
9Daha o Yesus wato, ”O wange nënanga ngona deʼ mata-mata anitau madol̄a ma Jou Madutu winihihalamati deʼ winihidöaka o ngango mahungi, hababu ngonaö o Abraham aidifauku. 10#Mat. 18:11 O Nyawa manga Ngohaka waino la wälingiri deʼ wahihalamati o nyawa yohihihanga o ngëkomo.”
O hitotero o tiwi gurasi
(Mat. 25:14-30)
11 #
Mat. 25:14-30
Magogiria o nyawa kayo ihe-ihenohi o Yesus woade-ade, Unanga wohiade-ade moi o hitotero. Hababu, o öraha gënanga Unanga naga watigiikaka o Yerusalemika, deʼ o nyawa yatobote ma Jou Madutu de majapatioka aha wopareta hokä o Koano o duniaka. 12O Yesus wato, ”Naga womatëngo o kokoano manga ngohaka woiki o berera magogurutika la iwitede wodadi o koano, ipaha wolioli. 13Wosobouahi, ünanga wä ahoko iwïlöleleani yangimoi, daha wahidöaka onangika o tiwi o gurasi o nyawa moi o gahumu moi. ’Ngohi toikohi ho nimahukunu de o tiwi nënanga,’ ünanga wätemo onangika. 14Mä aiberera manyawa gënanga iwïdohata unangika. Hoʼ, ünanga de wosoboka, önanga ihidingoto manga huhuloko la ihingahu, ’Ngomi mioluku o nyawa nënanga wodadi mia koano.’
15Mä o koano mangohaka gënanga iwitede wodadi o koano, ipaha wolioli aibereraika. De majapati ünanga wäahoko iwïlöleleani iwïhimanga la wohiöriki okia moi mautumu önanga yamäkeoka. 16Wolöleleani madodihiraka waino deʼ wotemo, ’Tuanga, o tiwi o gurasi o gahumu moi Tuanga nohihidöa-döakoka gënanga, tadadioka ngimoi.’ 17’Irahai,’ matuanga gënanga wato, ’ngona yolöleleani maoa! Karana o hali mahohumujuroka ngona yakunu honi ngaku, ngohi aha tonigoraka o kota ngimoi mapopareta.’ 18Wolöleleani mahinotoka waino deʼ wotemo, ’Tuanga, o tiwi o gurasi o gahumu moi nohi döa-döakoka gënanga, tadadioka motoa.’ 19Wolöleleaniika gënanga ma koano gënanga wïtemo, ’Ngona aha nodadi o kota motoa mapopareta.’ 20Wolöleleani mahomoa waino deʼ wotemo, ’Tuanga, nënanga anitiwi Tuanga; ngohi tagogono o lesooka. 21Ngohi tonï modongo Tuanga, hababu Tuanga o nyawa nototogowini. Tuanga nal̄ë okia naga koto ngonaua, deʼ Tuanga nal̄ë o hasili o ngï kiaka nodato-datomua.’ 22Makoano gënanga wïtemo unangika, ’Ngona yolöleleani madorou! Imadäene de anidemo-demo mahirete ngohi aha tonihukumu ngona. Ngona nohiöriki ngohi o nyawa yototogowini; ngohi tal̄ëokia naga kotongohiua, deʼ tal̄ë mahasili o ngï kiaka todato-datomua. 23Nako hokogënanga yadodoa ho ngona nohingohamua o tiwi gënanga o bangika hupaya o öraha kia ngohi tolioli ngohi yakunu tatarima ahitiwi dema bunga?ʼ 24Ipaha ma koano gënanga wätemo o nyawa imaoko-okoino genangoka, ’Nia l̄ë o tiwi gënanga unangoka deʼ nihidöaka wolöleleanika wamömäke-mäke o tiwi o gurasi ngimoi gënanga.’ 25Mä o nyawa gënanga yotemo, ’Tuanga, ünanga wamäkeoka ngimoi.’ 26#Mat. 13:12; Mark. 4:25; Luk. 8:18 Ma koano gënanga wohaluhu, ’Nio hohininga: o nyawa dema enangoka, unangika aha iholoi iwöeoli iwihidöaka. Mä o nyawa manga kia-kiaua, okianaga unangoka aha yal̄ëoli unangoka. 27Deʼ o öraha nënanga niaaoino nengino ahi haturü-haturü gënanga yoolu-oluku ngohi todadi manga koano. Niä toma önanga mata-mata ahi himangoka!ʼ ”
O Yesus wowohama o Yerusalemika hokä o koano
(Mat. 21:1-11; Mark. 11:1-11; Yoh. 12:12-19)
28Ipaha o Yesus wotemoka mata-mata gënanga manga himangoka Unanga womäjobo wodumutu o Yerusalemika. 29Maöraha itigi-tigi yadono o Betfage deʼ o Betania maberera o Zaitun ma Doporonoka, Unanga wähuloko yahinoto iwinöninïki yoiki yohira. 30”O kapongo nanga himangika genangika nioiki,” o Yesus wätemo onangika, ”öraha okia ngini niwohama dokengika, ngini aha nia mäke moi o keledai mangohaka ilikoika. O keledai gënanga komaiwahi o nyawa yöbarene. Niahohe o keledai gënanga deʼ niao nenangino. 31Nako o nyawa inïleha nginika, ’Yadodoa hongini niahohe o keledai gënanga?ʼ niahetongo, ’Ma Jou wöparalu.’ ”
32Yahinoto iwinöninïki gënanga yoiki, deʼ yamäkeika mata-mata imatero hokä waheto-hetongoka. 33Magogiriaka önanga yahohe o keledai mangohaka gënanga, madutu wätemo onangika, ”Yadodoa ho ngini niahohe o keledai gënanga?”
34Onanga yohaluhu, ”Ma Jou wöparalu.” 35Daha önanga yao o keledai mangohaka gënanga o Yesusika. Ipaha önanga ihinao manga juba o keledai gënanga maporetuku, deʼ o Yesus iwihidöa o keledaiil̄e. 36Magogiriaka o Yesus wakaino de wobarenuku o keledai gënanga, o nyawa manga ngöe manga juba ihihohe o ngekomika.
37Maöraha o Yesus ngade womahiädono o Yerusalemika, o Zaitun ma Doporonoka mangëkomo iuti-uti, mata-mata iwinöninïki yowöe-wöe gënanga yomuläenge yopöa-pöaka iwihigiriri ma Jou Madutu deʼ yotemo tarimakasi Unangika karana mata-mata i hëra-hëranga önanga yahakihioka. 38#Mzm. 118:26 Onanga yopöaka, ”Iwihi barakati ma Koano woböa-böa de ma Jou airomanga! O lolä o horogaka, deʼ iwihigiriri ma Jou Madutu!”
39O nyawa yowöe-wöe manga hidogoronaka gënanga yamuruono naga o Farisi manyawa iwitemo o Yesusika, ”Bapa Guru, ininöninïki Bapa nähuloko imarïdi.”
40O Yesus wohaluhu, ”Ningaku! Nako önanga imarïdi, o helewo-o helewo nënanga aha ipöaka.”
O Yesus wögari o Yerusalem
41Maöraha o Yesus kawotigimonga de o Yerusalem, deʼ wölega o berera gënanga, Unanga wögari. 42Wato, ”Hiokö, hokokia maoa nako o wange nënanga ngona nohiöriki okia yakunu inïgao o dame! Mä orahanënanga ngona konamäkeua. 43Ngona aha namäo moi maöraha, kiaka anihaturü yodiai o dadatoko-dadatoko inihi gilolitino; önanga aha inihigiloliti deʼ inihidehoto de hagala o libuku. 44Onanga aha iniwedere ngona kamamoi de ani berera manyawa; deʼ koiwa moi o helewo aha önanga yamal̄aika imateke tapal̄uku marioka, hababu ngona nolegaikaua o öraha ma Jou Madutu woböa la wonihihalamati ngona!”
O Yesus wowohama ma Jou ai Tauika
(Mat. 21:12-17; Mark. 11:15-19; Yoh. 2:13-22)
45O Yesus wowohama ma Jou ai Tauika deʼ muläenge wäduhu imahohuku-hukunu genangoka. 46#Yes. 56:7; Yer. 7:11 ”Ma Jou Ai Demo ma Buku magoronaka,” wätemo onangika, ïtulihi hokonënanga: Ma Jou Madutu wotemo, ’Ahi tau aha idadi o niniata mangï matau.’ Mä ngini niadiai yoora-ora manga igutu!”
47 #
Luk. 21:37
O wange higetongo o Yesus wodotoko ma Jou ai Tau magoronaka. O imam-imam manga häeke, deʼ o agama maguru-guru, de o Yahudioka mangatutuda, yomau iwitoma Unanga, 48mä yamäkeua mangëkomo la yadiai o hali gënanga, karana o nyawa mata-mata hoko genangika dika iwihigihene Unanga, deʼ yatauru manga hininga Ai demo-demoika.
Επιλέχθηκαν προς το παρόν:
O LUKAS 19: TLB
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε