CARETANA PARA RASUL ATOR MAMOLAN
ATOR MAMOLAN
Caretana Para Rasul paneka terrosanna Kabar Bagus se etotorragi Lukas. Tojjuwanna Caretana Para Rasul paneka se nomer settong enggi paneka abirji'agi parkara kadi ponapa para moredda Isa – kalaban pimpinanna Errohna Allah – mabalattra Kabar Bagus parkara Isa “e Yerusalim, e saantero Yudea, e Samaria, sampe' ka konco'na bume” (1:8). Ketab paneka aesse caretana pargerrakan Kristen se emolae e antarana oreng Yahudi pas atamba lebar daddi agama kaangguy oreng sadunnya. Se nganggit ketab paneka arassa parlo jugan kaangguy mayakin para maos ja' reng-oreng Kristen banne babaja politik subversi monggu ka karaja'an Roma, namong ja' agama Kristen paneka panyamporna'anna agama Yahudi.
Caretana Para Rasul paneka ebagi daddi tello bagiyan. E dhalem bagiyan se tatello' gapaneka katon ja' dhaera kennengnganna oreng aberta'agi Kabar Bagus parkara Isa sareng kennengnganna oreng maddek gereja sajan atamba lebar: (1) parmola'anna pargerrakan Kristen e Yerusalim saamponna Isa epaongga ka sowarga; (2) Kabar Bagus atamba balattra ka ra-dhaera laen e Palestina; sareng (3) Kabar Bagus sajan balattra pole ka ra-nagara e sabingkerra Tase' Tengnga kantos gan Roma.
Settong parkara se khas sareng parlo e dhalem ketab Caretana Para Rasul paneka enggi paneka lalampa'anna Errohna Allah se rabu kalaban kobasana ka attassa reng-oreng se parcaja e Yerusalim e are Pentakosta. E dhalem sadajana kadaddiyan se ecathet e dhalem ketab paneka nyata ja' Errohna Allah paneka ros-terrosan mimpin sareng makowat gereja sareng pin-pamimpinna. Berta se eajarragi agama Kristen e man-jaman parmola'an paneka erengkes epadaddi pan-saponapan kotbah. Kadaddiyan-kadaddiyan se ecathet e dhalem ketab paneka noduwagi jugan saponapa kobasana berta gapaneka e dhalem odhi'na reng-oreng Kristen sareng e dhalem rapedda reng-oreng se ataretanan e gereja.
Essena Ketab
Asadhiya kaangguy paberta'an 1:1-26
a. Papakon se dhi-budhi ban janji dhari Guste Isa 1:1-14
b. Gantena Yudas 1:15-26
Paberta'an e Yerusalim 2:1–8:3
Paberta'an e Yudea ban Samaria 8:4–12:25
Pangladinna Paulus 13:1–28:31
a. Parjalanan se kapeng settong kaangguy mabalattra Kabar Bagus 13:1–14:28
b. Parembagan e Yerusalim 15:1-35
c. Parjalanan se kapeng dhuwa' kaangguy mabalattra Kabar Bagus 15:36–18:22
d. Parjalanan se kapeng tello' kaangguy mabalattra Kabar Bagus 18:23–21:16
e. Paulus menangka tahanan e Yerusalim, Kaisareya ban Roma 21:17–28:31
Επιλέχθηκαν προς το παρόν:
CARETANA PARA RASUL ATOR MAMOLAN: MAD
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε