San Mateo 8
8
Jesús beonie ttu benni raca cuerpu gueni yiesusu te láni lepra
(Mr. 1:40-45; Lc. 5:12-16)
1Atti beadi Jesús lo lhilhiha nna ixeru benni denocane. 2Nianna ubiga ttu unbiyuu raca cuerpu gueni nu anca attiba yiesusu te láni lepra atta du Jesús. Atti bedútteba xibini lo Benniha ráne:
—Benni bananie neti, gansi cuinalu aca lelu nna guaguabalu isagüe quia-ni.
3Jesús becatteba nee utane cuerpu gue nua, atti ráttebe na:
—Guaracaba lasia. ¡Beacatte nnanna!
Snaba lania nna bitúa yiesusu lána lepra raca unbiyuuha. 4Laniala rá Jesús unbiyuuha:
—¡Binarga! Tsa nuttu nu quixxiꞌenlu. Nu unlalu nna güia guatsá du lo bixxudiha qui ugüiana lu nna chiba beacalu. Bijatte úna nu daa lolu utelu gue Tata Do Iyyabaaha, beni attiba rába lo ca ley bocaꞌana Moisés, qui ugüia ca benni lu nna chiba bitúa isagüe gueluha.
Jesús reonie ttu nu riben sina gue soldado beaca lasni Roma
(Lc. 7:1-10; Jn. 4:43-54)
5Atti utaꞌa Jesús lheꞌesi Capernaum, ttu soldado beaca lasni Roma, nu baninna ttu gayua (100) ca soldado bisínna lo Jesús, udú ditibana unnabana lo Benniha ráne:
6—Xa Tata, uncuiti riben sina quiaha nna tsaba te nua lheꞌe yoꞌo quiaha de daa yatti itúbana. Tsitsiba ratena de yatterba nu rdacana. 7Jesús becabie gueni re na:
—Neti nna guayaꞌaba qui eyonia nua.
8Soldadoha nna becabina rána:
—Xa Tata, neti nna lägabi elha ralha gaꞌalu lheꞌe yoꞌo quiaha. Niba na dulu, careꞌaba ttu tisa unnee nna nu riben sina quiaha nna eyacabana. 9Cumu neti nna ancaguaba nu rudo tisa gue ca nu rinnabiacana neti, anáguaba rinnabiaguaba ca soldado quia-na lhe. Atti rpea ttu ca unná: “Güia nía”, tsiabunna. Atti rpea attuna: “Utá nii”, gua ritabana. Atti runia mandadu nu riben lo sina quia-na bixa unna unba nua nu upea na.
10Atti bienin Jesús nu rá nua nna bebanbanie gue nua. Laniala bodequi loe re ca benni dia denalha:
—Neti nna gualíbatia ria: niba ttu ca benni quia anca benni Israel bittu chi guattiꞌaya ria tsitsi leni atti ria le unbiyuu-ni.
11Neti unní ria le, ixeru benni dittu daa daca atta riria bisa-na, daca atta radi bisa-na lhe ebíacana roꞌo mexa qui edí baacana ttu elha go tsee len Abraham lhe Isaac lhe Jacob lhe gansi chi bisía sá innabia Tata Do Iyyabaaha. 12Ttiaca ca nu ralhacana cuiacana nía, ca benni chi gaꞌana innabia Tata Do Iyyabaaha, cueabe cana udelhe cana lheꞌe atta anca chulhaha, atta cuescana lhe goni lo layacani lhe.
13Laniala rá Jesús soldado gue Romaha, nu banani adí ca soldadoha:
—Beyya. De güia lelu güeyacaba uncuitiha nna aníaba aca.
Uncuiti riben sina gue soldadoha nna snatteba lania beacana.
Jesús beonie nan gue nuila gue Pedro
(Mr. 1:29-31; Lc. 4:38-39)
14Jesús güiattebe lheꞌe yoꞌo gue Pedro. Nía bilánie nan gue nuila gue Pedro tebi lo taꞌa yuꞌubi xilhá. 15Lee nna utanattebe ná biꞌiniha. Xilháha nna beríattebana latibi. Biꞌiniha nna guadhattebabi, betebi nu go Benniha.
16Atti chi dia raquela nna uchetteba ca benni ixeru ca nu yuꞌu be xxegüi lheꞌe cuerpu guecani lo Jesús. Benniha nna careꞌaba leni ttu tisa bebequie ca be xxegüiha, beonie iyába ca nu raniha lhe. 17Anía uca qui guaxxína nu rá ca tisa utixxiꞌa profeta Isaías atti rábi: “Bennihaba bexxúa cueꞌe ca isagüe gueriha, utúe iyába nu rateri loni lhe nu rdacari lhe.”#8:17 Isaías 53:4
Ca benni raca lecabi sanalhacabi Jesús
(Lc. 9:57-62)
18Atti biláni Jesús attulade re ca benni chi bebiꞌa nocane, benttebe mandadu ca biꞌini rudheti ca tisa ruleꞌe tsia lencabi Benniha attu ladu gue indattooha. 19Ttu ca nu ruleꞌe nu rá lo ca ley bocaꞌana Moisés, ubigana rána Jesús:
—Maestro, neti raca lasia etenalha lu gaxaba ladu tsialu.
20Jesús becabie re na:
—Ca beda-na guasiaba liscani gaxa retaꞌacana, ca binni-na lhe gua siaba xcuadi guecani, ttiaca neti Benni unbiyuu daa iyyabaaha läga anca gaxa quixxa iquia.
21Attu ca nu rudheti ca tisa ruleꞌe Benniha nna ráne:
—Benni banani neti, begüeelhaxa neti eyyaꞌaya sacatsia tata quiaha, lenla nna etenalha lu.
22Jesús becabie re nua:
—Begüelha ca nu anca attiba nu yatti lo Tata Do Iyyabaaha ucatsicana ca nu yatti guequinna. Lu nna utá betteno neti.
Jesús benie bebe si beha lhe indattooha lhe
(Mr. 4:35-41; Lc. 8:22-25)
23Laniala nna utaꞌa Jesús lheꞌe barcoha. Ca biꞌini rudheti ca tisa ruleꞌe nna diaguabacabi len Benniha. 24Ttiaca tturba biríaru ttu iyya be idí uyuꞌuna lo indattooha. Indattooha nna udulítteba loni, tsaba chi ruttona iqui barcoha, ttiaca Jesús tebe tiꞌedhie. 25Nianna güiatteba ca biꞌini rudheti ca tisa ruleꞌe Jesús guadibáncane rácane:
—¡Benni banani riꞌitu, bodilháchi riꞌitu qui chi diari rettiri lheꞌe inda-ni!
26Jesús becabie re:
—¿Biaca rasixxattinle? ¿Si itú ttuaba bittu chi ria tsitsi lele neti?
Laniala guadhattebe bedhaca dise beha lhe indattooha lhe. Nianna siba beacatteba lo indattooha. 27Ca biꞌiniha nna rebantsitsiabaquinbi rácabi:
—¿Nú benni biꞌini du-ni? Nuarca axtaba be-na lhe indattoo-na lhe rudocana tisa guee.
Jesús bebequie ca be xxegüi yuꞌu lati chupa ca unbiyuu
(Mr. 5:1-20; Lc. 8:26-39)
28Atti bisína Jesús attu ladu gue indattooha daca lo yu gue yiesi te láni Gadara, lheꞌe atta sia ca baaha biría chupa ca unbiyuu yuꞌu be xxegüi lheꞌe cuerpu guecani guatsácana Jesús. Ca unnuha nna tsitsiba de nu runcana, larcala tsa läganu ritena lo neda te nía. 29Lacana nna uresiꞌattebacana rácana:
—¿Bittu ettegaꞌa guelu len riꞌitu, Jesús, Xiꞌini Tata Do Iyyabaaha? ¿Si dachilu qui utelu elha disa guetu, inqui chi isíala sá atti dhítu elha disa nna?
30Gaxxa gaba nía yuꞌu ixeru ca cutsi go. 31Ca be xxegüiha nna bencana ruegu lo Jesús rácane:
—Gansi ebeabalu riꞌitu nna begüeelhachi tsiatu qui etaꞌatu lheꞌe ca cutsi-na.
32Jesús becabie re cana:
—Gualtsia.
Ca be xxegüiha nna beríattebacana lheꞌe cuerpu gue ca unbiyuuha, atti utaꞌattebacana lheꞌe ca cutsiha. Iyába ca unnuha nna bigaattebacana diacana bitoetticana roꞌo ttu belhaꞌa daa nía biyinnacana lheꞌe indattooha. Níaba utti ca nua de gopicana inda.
33Ca nu rapa ca cutsiha nna bigaattebacana deyyacana lheꞌe yiesiha. Atti chi besincana nna utixxiꞌattebacana gue iyába nu chi uca, gue nu uca len ca benni uyuꞌu be xxegüi lheꞌe cuerpu guecaniha lhe. 34Laniala nna iyába ca benni seꞌe lheꞌe yiesiha güiacana atta du Jesús. Atti biláquinna Benniha nna benttebacana ruegu loe qui eríe lo yu guecaniha.
Επιλέχθηκαν προς το παρόν:
San Mateo 8: zaq
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2021, Wycliffe Bible Translators, Inc. All rights reserved.