MARCOS 2
2
Dejja jeojji shahuama'yo jeo'yoajja jaa Jesosaa jeomeeca'yapoa
(Mt 9.1-8; Lc 5.17-26)
1-2Majoya aje quijje pea pojjajo Jesosa poeo'oyapoa Capernaúm meshiyasijje. Jesosa poe'yonaje oja equijo ani'yo shajja-ajjamajje queahuisoneecuana jjachichaquicapoa oja equijotii. Jamajjeya equi cuiocapoa cuaa, esecuejjani cuiopea-aicañapoa. Majo nequiya Jesosaa Eyacuiñajjija esohui huohuicapoa cuana. 3Majoya aje cuatro dejjacuaa pea dejja jeojjishahuama'yo, jeo'yoajja daqui equecuaquinijo jaa dojonobia-ajjaquicapoa Jesosa nequiyasijje. 4Ma equijo ona queahuiso ejjachichaqui anicajojoya dejja jeo'yoajja midojonobiaquicapoa cuaa Jesosa nequiyasijje. Jamajjeya oya dojosohuaquicapoa equijamacoohuasijje Jesosa nequi cojjaneiyasijje. Majoya equijamacoo cajjajeamajje dejja jeo'yoajja daqui equecuaquinijo jaa jeaoqueacapoa cuaa jjonojo Jesosa nequi cojjaneiyasijje. 5Jesosaa dejja jeo'yoajja ojaya epeejjicuana pea-ai jjashahuabaqui'yani ojonei bacapoa. Jamajje ohuaya jama acapoa dejja jeo'yoajja ba'a: —Ecue bacua, eyaya mique mimishicuana jjeyanei cuijea'yonaje, chama'yo.—
6Majotii aniya Moisesja tehuehuohuijji poanicuana jjashahuabaquiapoa oja esohuiquipajjetii jama ba'a: 7—¿Apiojji shai jiquio dejja jama mimime poani? De, oya queamimishinee jama mimime poani Eyacuiñajjijo. Oya Eyacuiñajji jayojja pea-ai poani poso jjabaquiani. Eyacuiñajji caca oe oeneiya mimishicuana cuijeaca'yani. Ohuaya pojjeama— jama jjashahuabaquimeya poa cuana Jesosajo. 8Jesosaja ebatii poa macuanaja ejjashahuabaquijji queaquehua ojo, jamajjeya oya jama poa onijje ba'a: —¿Yajjajje acuae quiana ejo queaquehuanee jjashahuabaquiani? 9Queacamajaneenee dejjaja mimishi cuijea'yojji. Queacamajaneenee dejja jeojjishahuama' ejeomee'yojji pea-ai. 10Jamajjeya jjeya quiaa queaja'a bameeje Eyacuiñajjiya eya Dejjapojji epo queaca'anee nequimeecani dejjacuanaja mimishicuana cuijea'yojji jiquio meshijo nequi— jamaya poa.
11Majotii aniya Jesosaa dejja jeo'yoajja jama acapoa ba'a: —Nequisohua'yocue, mique daqui equecuaquini dojo'yocue, miquea equiyasijje poqui'yocue.—
12Jesosaa jama acajje dejja jeo'yoajja nequisohuanana'yapoa ojjañacuana majo ejjachichaqui anicajo. Majoya daqui equecuaquini poani bebo'yomajje oya cuayaqui'yapoa. Dejja jeo'yoajja nequisohuaje'yo bacapoa queahuisocuaa. Jamajjeya o jeoje'yo bamajje Eyacuiñajji bihuiacapoa cuaa jama ba'a: —Eyacuiñajji queaca'aneetii poani. Esejaya bajjimaneinei ohua jama acaje.—
Jesosaa pea dejja Leví bajjani iyaacapoa
(Mt 9.9-13; Lc 5.27-32)
13Majoya aje Jesosa poquio'oyapoa baesahuahuasijje. Queahuisoneecuana jjachichaquicapoa o anijo. Jamajjeya Jesosaa sohuihuohuicapoa cuana. 14Jesosaa poquijeya oe dejja Leví bajjani Alfeoja bacuaejja bacapoa Israelcuiñajjicuanaja bejjo Roma emeshimeseja yajji chichapoquiajji equisisijo eanioque ani. Jesosa jama poa onijje ba'a: —Enijje po'yocue.— Ohua jama acajje Leví nequisohuapoa onijje epo'yojji.#2.14 Nota: Leví bajjani beca poa. Ojaya pea bajjani Mateo poa.*
15Majoya aje pea pojjajo Jesosa o shajja-ajjajji poanicuananijje poquiapoa Levija equiyasijje ijjiaijjiaa. Leví, pea onijje Roma emeshimeseja yajji bejjo chichapoquiajji dejjacuana, pea dejja mimishicuana pea-ai ojee Jesosanijje, o shajja-ajjajji poanicuananijje pea-ai mesajo eanioque ani ijjiaijjiaca-aniapoa. Queahuisonee Jesosanijje nequipoquinaje jamajjeya queahuisonee majo ijjiaijjiaca-aniapoa. 16Fariseo dejjacuaa, Moisesja tehuehuohuijji poanicuaa pea-ai Jesosa dejjamimishicuananijje ojee ijjiaijjiani bamajje o shajja-ajjajji poanicuana jama huohuiajjame acapoa ba'a: —¿Apiojji acuae mi sohuihuohuijji poani dejja bejjo chichapoquiajji poani dejjacuananijje, dejjamimishicuananijje pea-ai ojee ijjiaijjiani?—
17Jesosaa oya jama poaje shajja-ajjamajje jama huohuime acapoa cuana ba'a: —Joya yajayaja poani, manojjima eshicuijjibajji poani dejjajo jjashicuimeequica-ajja. Emanocuana caca oe jjashicuimeequicajji ojo. Oya jayojja eya poeyanaje jiquio oyaneitii queapame ba'yani jjabaquijjicuana sa-ajjaa pojjeama. Eya caca poeyanaje joya queamimishi poani jjabaquijjicuana sa-ajjaa.—
Jesosaa huohuicapoa bobi ijjiajjimanei yajjijo Eyacuiñajjinijje emimipopoquijji
(Mt 9.14-17; Lc 5.33-39)
18Oe pojjajo Juan ma ona iñajeanobiajji poani shajja-ajjajji dejjacuaa bobi ijjiapojjima' aniapoa Eyacuiñajjinijje emimijji. Fariseocuana shajja-ajjajji poanicuaa bobi ijjiapojjima' anipea-aiapoa. Macuana jama poani bamajje pea dejjacuana poquiapoa Jesosa huohuiajjaa jama ba'a: —Juan shajja-ajjajji poanicuana, fariseocuana shajja-ajjajjicuana pea-ai bobi ijjiapojjima' aniani Eyacuiñajjinijje emimijji. ¿Yajjajje acuae mi shajja-ajjajji poanicuana jama pea-ai po-ajja?—
19Jesosaa saja-acapoa cuana jama ba'a: —Bacue, fiesta ejjahuanaquijjijo joya poquije eiyaacuana queabihui poani dejja ejjahuanaquijji yanijo. Ma pojjajotii queabihui pomajje bobi ijjiapojjima' anica-ajja so'o. 20Majoya quijje dejja ejjahuanaquijji dojocaje cuaa. O chamajo ojaya epeejjicuana bobi ijjiapojjima' anije so'o queayeno poani ejjabameequijji.—#2.20 Nota: Jesosaa jama saja-ameya acapoa cuana queaja'a ebajji o jiquio meshijo eshe nequi bobi ijjiapojjima' aca-ajja o shajja-ajjajji poanicuanaja. O chamajo ca bobi ijjiapojjima' anicajji. Jama poanijjeya jiquio esohui.
21Majoya Jesosaa pea esohui huohuipea-aicapoa ba'a: —Jiquiajjaya ba'a: Daquichii huiñajo daqui eyacua isaca-ajja o jaca'yojji. Jama aca'yajje daqui eyacua peajja poaje'yo. Ejaca'yo daquichii jama pojjeama pea-ai poaje'yo, hua-ama. 22Oya jayojjaya uvajjajjana' eyacua shoca-ajja ejeechii esocojo. Majo shocajo ejeechii cuiapojojeacaje sesena'majje. Majoya uvajjajjana' jjashojeajeajeyoquije, ejeechii pea-ai jeajeacaje cuaa. Jamajjeya uvajjajjana' eyacua shocajji ejee eyacuaneijo pea-ai.—#2.22 Nota: Jesosaa pea esohui huohuicapoa eyacua ma ecua Moisesya yahuajo tehuecapoa jama pojjeama. Jiquio ecua daqui eyacuaa daquichii jacaca'yoajja, oya jayojja Moisesja tehuecuana Jesosaja esohui eyacua jayojja jama pojjeama poani.*
Jesosaa huohuicapoa ejomishocajji epojjajo
(Mt 12.1-8; Lc 6.1-5)
23Majoya aje quijje ejomishocajji sábado epojjajo Jesosa poquiapoa anosoaiyiye ebanahuasijje o shajja-ajjajji poanicuananijje. Poquijeya o shajja-ajjajji poanicuaa anosoai sejjacananapoa eijjiajji. 24O shajja-ajjajji poanicuaa sejjacaqui bamajje fariseo dejjacuaa Jesosa huohuiajjacapoa jama ba'a: —Shajja-ajjacue, ¿apiojji mi shajja-ajjajji poanicuana jama chacochacoani jiquio ejomishocajji epojjajo? ¡Jama poca-ajja jjeya jiquio pojjajo!—
25-26Jesosaa saja-acapoa cuana jama ba'a: —¿A'a quianaja ajjima' esohuicuana etehue jaa ma yahuajonei Davidya, onijje nequicapoa dejjacuaa pea-ai acapoa queashoenee pomajje? Ma shequiajajoya yahuajonei Abiatar bajjani dejja Eyacuiñajji Eyacuiñajjija daquiequijo chacochacopoquiani ebionei etii poa. David nobiquiapoa Eyacuiñajjija daquiequi aniyasijje. Ma daquiequijo ani pahuicuana Eyacuiñajjiyasijje quia, Davidya ijjiacapoa. Ma onijje nequica dejjacuana quiapea-aicapoa. Eyacuiñajjija esohui Moisesja tehue ca jama poani ba'a: “Eyacuiñajjija equi-aijo chacochacopoquiani dejjacuanajanei ma pahui ijjiacajji.” Jamaya Eyacuiñajjija esohui poani. Ma pahui ca Davidja, onijje nequicaja pea-ai ijjiaca-ajja poa.—
27Majoya Jesosaa pea esohui acapoa ba'a: —Jiquio epojja ejomishocajji Eyacuiñajjiya acapoa ojjañacuana queabihui ba'epoquijji. Ohuaya dejjacuana, eponacuana pea-ai panacapoa ejomishocajji epojjajo chacochacojjimatii epojji pojjeama. 28Jamajjeya eyaya Dejjapojji epohua Emeshimesenei poaniya huohuipoquiajetii yajja pocajji quiana ejomishocajji sábado epojjajo.—
Επιλέχθηκαν προς το παρόν:
MARCOS 2: ESE
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Copyright Mision Nuevas Tribus, 2006