Luka 24
24
Watwanzi na Petro wakagula dikabuli ja Yesu
1Disiku ja ichanduso ja juma, imitondo nghani, wasola na mavuta gaja ganogile gawagongomanye, wagenda kuli ikabuli. 2Wajona dija idibwe dikwenhusigwa kulawa ha umulango wa ikabuli. 3Vuwengile hawauwene mtufi wa Mndewa Yesu. 4Wakanganya nghani na unzonza uja; mhunde walawililwa na wanhu wabili wavalile nguwo zimelemetaga. 5Aluja luwengilwe na ikidumbo wavinamiza vihanga vyao hasi, baho waja wawalongela, “Impile momzahila kwa wafile? 6Kamduhu muno, heyo kazuswa; geseni gaja gayamulongeleni, viyakalile kuja Galilea! 7Viyalongile, Mwana wa Munhu vimgamba yageligwe mmikono ya wanhu wene gamatozo, wamuwambe mdibiki; ilawa baho siku ja ikadatu kozuka.” 8Bahaja wamana kugagesa malonga gake. 9Wabwela kulawa kuna dikabuli, wawapetela waja Mulongo umwe na Imonga, na wayagwe wose gaja gose. 10Awo wawapetele wanahina mbuli zija wakala Maria Magdalena na Yoana na Maria mamo wake Yakobo, na wayagwe hamonga nawo. 11Komu womana kugelegeza mbuli zino zogamba mchalango, hawazivumile. 12Petro kenuka yomana kukimbila, kavika kuli dikabuli, kainamila kasungulila, kayona isanda iiyeka; ilawa baho kagenda na zake, kuno yokangawila munda na kitupe dija diyawene.
Wanahina wabili wetinghana na Yesu mnzila Emao
13Siku ija wayawo wabili wakala mmwanza, weza kukiwambo kikemagwa Emao; kamba munhu yahalawa na Yerusalemu, uchozi wake zovika saa mbili. 14Na hewo wakala wokipetela gaja gose gakalile galawilile. 15Avija vuwokala wousimulila kuno wokiuza, Yesu mwenyecho kawakwenhukila, kachola hamonga nawo. 16Komu meso gawo gakala kamba gagubikwa, hawadahile kumtambula. 17Vivo yawauzile, “Mbuli gani hizo zimsimulila hano hanzila?” Womana kwima, kuno wokunza vihanga. 18Miyage imonga twaga jake Kleofa, kedika kamulongela, “Gweye uli yeka kwa muhenza muna Yerusalemu, uleke kugatanga gali muno siku zino?” 19Kawauza, “Galihi?” Wamulongela, “Mbuli za Yesu wa Nazareti; hiyo kakala Tulandagu mwene mhiko za kusanghana na za kulonga ha Mulungu na wanhu wose. 20Avija Watambika Wakulu na Wakulu zetu vuwamgela mkitala cha kumkoma, wamuwamba mdibiki. 21Na tweye tukala tutamanila kamba heyo yuyo yonda yawakombole Waisraeli; viyemela lelo siku ja ikadatu, vizisongile kulawilia mbuli hizo. 22Kabili kuna watwanzi wa kumwetu, awo watusinhusa, wagendile hana dikabuli imitondo nghani, hawauwene mtufi wake. 23Wabwela walonga kamba walawililwa na malaika, walongile kamba mgima. 24Na wayagwe wakalile hamonga na tweye wachola kuli ikabuli, wavona vivija kamba waja watwanzi vuwalongile, komu heyo hawamuwene.”
25Kawalongela, “Mweye hamvitangile, wene miyoyo migaga ya kuleka kutogola gose gawalongile Watulandagu. 26Che, havimwandame Kristo kugeligwa mumgaduko na kwingila kuundewa wake? 27Kasonga kuwalongela kulawa Mose na Watulandagu wose, kawapetela muna gamandiko gose mbuli zija zimwandame mwenyecho.”
28Wamkwenhukila kija kiwambo kiwakalile wochola, na heyo kaitenda kamba konda kubasiliza. 29Komu wamuhembela nghani walonga, “Kala hamonga na tweye, kwa mzoko imisi imala, zuwa diswa.” Kengila mngʼanda kakala hamonga nawo.
30Aluja luyakalile nawo hana gamandiya, kasola mgate kaupulila, kaumogola, kawengha. 31Baho gabunzuka meso gawo, wamtanga; mhunde kayangayuka havihanga vyao. 32Wamana kuilongela, “Che, mizoyo yetu kileka mana ikala igungʼunda mgati, haja hayakalile yolonga na tweye mzila na kutupetela jandiko?”
33Wasegela kipigiti kikija, wabwela Yerusalemu, wawavika waja Mulongo umwe na Imwe, wailundiza na hewo wakalile hamonga nawo. 34Walonga, “Mndewa kazuka kwelikweli! Na heyo kamulawila Simoni.”
35Na hewo wawapetela mbuli zose na unzonza uja wa mnzila, na vija viyailavilize kumwao haja hayaumegile umgate.
Yesu yazukile kawalawilila wanahina wose
36Lola, aluja luwokala osimulila mbuli zija, Yesu mwenyecho kema zugaga hagatigati yawo, kawalongela, “Tindiwalo na diwe kumwenu!” 37Wasinhuka wadumba nghani, wagiza mzimu uwengile. 38Kawalongela, “Vilihi vumdungwadungwa hivo? Kabili habali ngelegeza kamba hizo zomwingilani mmoyo? 39Galoleni maganza gangu na magulu gangu mvitange, Iyo nene mwenyecho! Mbabaseni mulole, kilumbo mzimu kabule lukuli lwa mnofu hebu mizege, kamba vumbona niye vinili nayo.” 40Viyamalile kulonga higo, ka walagusila maganza na migulu. 41Komu vuwakalile bado hawanatogola, viyemela wodenghelela kuno wokanganya, kawalongela, “Munacho chakuja hano?” 42Baho wamwinghile kibendu cha somba yakalangigwe. Kakisola, kakija hakihanga chao.
44Imala baho kawalongela, “Gano gago malonga gangu ganimulongeleni, vinikalile hamonga na mweye, kamba gavikizwe gose nyandikilwe muna Inzuma ya Mose na Walaguzi na Ndenghelelo.” 45Baho kawagubulila nzewele zao, wadimanye jandiko. 46Kawalongela, “Vivo yandikigwe kamba Kristo kogaduswa na kuzuka siku ja ikadatu. 47Avo ngholo zose zibwililisilwe Longa kwa twaga jake, wagaluke na kusegezelwa matozo, kusongela Yerusalemu. 48Na mweye mwemwe wakalangama wa mbuli zino. 49Loleni nomgalilani kilaga cha Tata wangu; komu kaleni muno mkiwambo kwiza mgeligwe mhiko kulawa uchana!”
Yesu kakwela kuulanga yomoteza wanahina
50Imala baho kalawa nawo, kawagala Betania, aho kenula mikono yake, kawamoteza. 51Aluja luyakalile yowamoteza, yomana kwinega nawo, kasoligwa uchana kuulanga. 52Aho baho wamfugamile mavindi; imala baho wabwela Yerusalemu, kuno wodenghelela nghani. 53Na hewo mazuwa gose wakala mdihekalu womtuniza Mulungu.
Επιλέχθηκαν προς το παρόν:
Luka 24: ZAM75
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
New Testament in Zaramo © United Bible Societies, 1975.