Luka 20
20
Ubatizo wa Yohana ulawa kwahi
1Ikala siku dimwe viyakalile yolanguliza wanhu mna dingʼanda ja Mulungu, kuno yopeta mbuli zinogile, Watambika Wakulu na waja Wana Nzuma hamonga na Walala, mhunde wamulawila. 2Wamulongela, “Tulongele kosanghana magweka gano kwa lwamu lulihi; kabili yuyo yalihi yakwinghile lwamu luno?” 3Kedika kawalongela, “Na niye nowauzani mweye mbuli imwe, nongeleni! 4Ubatizo wa Yohana ulawa kuulanga hebu kwa wanhu?” 5Womana kuiuzagiza wenyego kwa wenyego wolonga, “Kamba tuhalonga ulawa kuulanga, kolonga kumbe vilihi hamumtogole? 6Na kamba tuhalonga ulawa kwa wanhu, kwiza wanhu wose wotutowa na mabwe, kwa mzoko wamtogola Yohana senhambo heyo Mtulandagu.” 7Wedika, “Hatutangile kuulawile.” 8Na Yesu kawalongela, “Na niye siwalongela, kwa lwamu lulihi nosanghana magweka gano.”
Wanghulima wa mitongoni wehile
9Kasonga kuwalongela wanhu hala dino, “Munhu imonga kahanda mgunda wa mitongoni, kaweka wanghulima, kagenda isi iyagwe, kakala hiko nghani. 10Na ikikomo cha ukuhuna kamtuma mtumigwa wake kwa waja wanghulima, giladi wamwinghe galo ja umujo wa imitongoni; waja wanghulima wamtowa, wamuwinga mikono iyeka. 11Yomana kumtuma nyakadala iyagwe; yuja nayo wamtowa, wamgela kinyala, wamuwinga mikono iyeka. 12Yomana kutuma waikadatu; yuja wamgela milonda, wamwasa kunze. 13Baho bwana wa umgunda wa imitongoni kalonga, Nhendeze? nomtuma mwanangu, mnogelwa wangu, nogamba yuno wo-mtegeleza. 14Komu waja wanghulima vuwamuwene, wailongela wenyego kwa wenyego, Yuno yuyo Muhala tagwa, leka tumkome, giladi uhalali tuusole tweye! 15Womana kumwasa kunze ya umgunda, wamkoma; basi bwana mwene mgunda wa imitongoni kowatendaze? 16Kokwiza kuwakoma wanghulima waja, na uja umgunda wa imitongoni kowengha wayagwe.” Vuwagahulike gaja walonga, “Aka kakaka! sukugatwandame gano.” 17Kawabunhulila meso kalonga, “Icho kilumbo kilihi, kileka longa dino jandikigwe, Dibwe diwalemile wazengaga ngʼanda, ajo digalamka dibwe kulu da kukingolobweda. Munhu wowose yahadigwila uchana dibwe hijo, kobenekabeneka; na wowose yonda dimgwile, domtimbinyula timbinyu.”
Vilingana kuliha kodi ya serkali
19Waja wana nzuma na watambika wakulu wagelegeza kumgoga kipigiti kicho kilumbo wavitanga kamba hala dijo walongelwa wawo, komu wadumba iwanhu. 20Womana kumsepasepa, wamgalila wasepi wokala wokiitenda kamba wanhu wa ihoko, giladi wamgoge muna inongelo yake, kwiza wamgele kuli ulwamu mu mhiko za utawala wa luwali. 21Wamuuza walonga, “Mkulufunzi, tuvimanya kamba kolonga na kulanguliza goya, wala hulola vihanga, komu kolanguliza nzila za Mulungu kwa ihoko. 22Che, hambwe ilumba tweye tumwinghe kodi Mtawala, hebu viha?” 23Bali heyo kaumanya ubala wao kawalongela, 24“Ndagusileni mhiya za kodi; cha nani kihanga kino na utango uno?” Wamwidika, “Wa Mtawala Kaisari.” 25Kawalongela, “Chevule! vya mtawala mwingheni mtawala, na vya Mulungu mwingheni Mulungu!” 26Avo walemelwa kumgela mkitala kwa nongelo zake hameso ga wanhu; wasinhuka nyidikilo zake, wavudala.
Wafile wozuka wogamba kamba malaika
27Imala baho waja Masadukeo wayagwe, wanhu walongaga kamba kuduhu kuzuka kwa wafile, wamgendela wamuuza. 28Walonga, “Mkulufunzi, Mose katwandikila kamba munhu yahadanganikilwa na ndugu yake mwene pinga, komu kabule mwana, na yamsole ino pinga, giladi yamgolele ndugu yake mulelo. 29Basi kukala na ndugu saba; yuja wa ichanduso kakala na pinga, yomana kadanganika yali bule mwana. 30Aija waikabili kengilila yuja ipinga, kadanganika na heyo yali bule mwana. 31Keza waikadatu kengilila, vivija wose fungate, wamala wafa, hawalelile wana. 32Kimambukizo pinga yuja yomana kudanganika. 33Avo ako kuna ukuzuka, kwiza kokuwa sano da yalihi? Kwa mzoko kakala yasoligwe na wose fungate.”
34Yesu kawalongela, “Wana wa ulumwengu uno wasolaga na kusoligwa. 35Komu waja wopetigwa kamba viwandama kuupata ulumwengu uja na kuja ukuzuka kulawa kwa wafile, hawasola pinga wala hawasoligwa. 36Wala kudanganika viyagwe hawadaha, kilumbo wogalamka kamba malaika, na hewo wana wa Mulungu vuwali wana wa nzuko. 37Komu wafile wozusigwa; kileka Mose yandike mbuli za kibiwi kija viyamulongile Bwana kumbe yuyo Mulungu wa Abrahamu na Mulungu wa Isaka na Mulungu wa Yakobo. 38Mulungu siyo Mulungu wa iwafile, komu wa iwapile, kwa mzoko wose wokala kumwake.”
39Baho Wana Nzuma wayagwe wedika wamulongela, “Mkulufunzi, kulonga goya.” 40Lulawile baho kahi hawagesile kumuuza mbuli viyagwe.
Daudi kamtuniza mwanage
41Kawalongela, “Wanhu walongaze kamba Kristo heyo Mwanage Daudi? 42Kwa mzoko Daudi mwenyecho kalonga mkitabu cha Ndenghelelo,
Mndewa kamulongela Mndewa wangu,
Ikalile kuna umkono wangu wa ukulume,
43Hata vonda niweke wandumu wako wagalamke kigoda cha kwikila migulu yako!
44Avo Daudi yahamkema Kristo Mndewa wake, vilihi kabili yagalamke mwanage?”
Teganya wanhu wokitopa
45Wanhu wose vuwakalile womtegeleza, kawalongela wanahina wake, 46“Iteganyeni na WanaNzuma wagesaga kuzulula, wavalaga miguwo mitali na kulamusigwa na wanhu muli gamasoko, na kukala kuulongozi muna gamakanisa, na vigoda vya kuulongozi halusona. 47Wajaga ngʼanda za iwagane, na kwa kubalaganya hewo wapulaga kipigiti kitali; awo kwiza wopata kitala kikulu.
Επιλέχθηκαν προς το παρόν:
Luka 20: ZAM75
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
New Testament in Zaramo © United Bible Societies, 1975.