Mateo 3
3
Yoane Kabatisha
(Mk 1:1-8; Lk 3:1-9, 15-17; Yn 1:19-28)
1Um-manda yalye wisile Yoane kabatisha angalusuunda un-nyika ya Yudea, ati: 2“Fipelini, kuno uweene-wamwiyulu uwupalamila.” 3Kuno wiyo uwino watasilwe na kalausha Isaya, ati:
“Iswi lyi umwi lilulaisha un-nyika.
Teyanyangini isila ya Mweene;
ololini muno alupita.”
4Yoane nawe wali nu mweenda wa mafumbu ya ntwangamweendo, nunkowa wa nkwela umu-nsana waakwe. Ni chulya chakwe chali makaanta nu uchi wa nchundu. 5Apano yanjilile a mu Yelusalemu na amu Yudea syooshi, ni nsi syoonsi isha mbali mbali yi Yodani. 6Nawe wayabatisha unduusi lwi Yodani, nakuno angi yaluilongwela amaifyo yao. 7Leelo pano wawine ayinji um-aFaliseo na aSadukeo yalwisilu ulubatisho lwakwe, wayanenile, waati: “Mwe ana ya soka, uwini wino atamusokesha ukwituka ichilakali chino chilwiisa? 8Ali sêkini ifisêke fya kufipela. 9Mutachelengula umyeeso yiino, fino tuli na tata, ali Ablaamu; kuno ndumunena, fino Leesa angakatusisha Ablaamu ana um-mafiinga ya. 10Ni mpasa itiwikwa apa mashiinda ya fiti; ichiti choosi chitalusêka ifisêke fisiifu, chilukomwa nu kusumbilwa um-mootou. 11Nemwi ndumubatisha na maasi uku kufipela, leelo wino alwiisa ichisila chane, wene ali na maka ukunduta neene, wino ntalingine nanti ukuseenda infwato shaakwe; wene alumubatisha uku Mweso Nswefu nu ku mooto. 12Wino ulupe luli umwikasa lyaakwe, nawe aluswefya nkani ulwano lwakwe; nu kukonganika ingano yaakwe un-ntanta, leelo chileshe alumocha nu mooto untashima.”
Yesu wabatishiwa
(Mk 1:9-13; Lk 3:21-22)
13Liyo kwene Yesu wiisa ukufuma uku Galilea, wafika nu ku Yodani kuli Yoane, kuti abatishiwe nawe. 14Leelo Yoane wakasime ukundesha, waati: “Chingasiipa, nene ukubatishiwa neewe, newe wiisa kuli neene?” 15Leelo Yesu wannena, waati: “Sumila uleka chiombeke, kuno ifino chiine, ukuti tufikilishi ichuumi choosi.” Nga pano wasumila. 16Nawe Yesu pano wabatiisiiwa, liyo kweene wapita ukufuma um-maasi; nga lola, iyulu lyayulika, walola Mweso wi Leesa ulwika wa nkuunda ulwiisa pali wenewe. 17Nga lola, iswi ukufuma umwiyulu, lyaati: “Alawi uMwanaane, unkundikwa waane, wino wansiipila.”
Επιλέχθηκαν προς το παρόν:
Mateo 3: FNT1988
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
New Testament in Fipa © United Bible Societies, 1988. Bible Society of Tanzania.