OBUCHACHILO 7
7
Omuyembo kweyifula khushialo
1Mana OMWAMI Nyasaye naboolela Noa ari, “Injila muliaro, iwe halala nende abeyinzuyo boosi. Okhuba endutsi mbu, mubandu bolwibulolwo luno boosi, niwe wenyene khushialo oukholanga aka habwene. 2Winjilemwo nende tsisolo tsisiiyikhu, tsibili tsibili, isaatsa nende ikhasi, okhuula musaafu. Nebutswa winjilemwo nende tsisolo tsibili tsionyene, isaatsa neikhasi khu etsilali isiiyikhu tawe. 3Khandi winjilemwo nende amanyonyi kabili kabili, lisaatsa nende likhasi okhuula musaafu. Okhole orio kho mbu, buli oluyia olwa tsisolo nende amanyonyi bibeho mwoyo mana biibulane khandi khushialo. 4Olunyuma lwetsinyanga musaafu, ndalakwisia ifula khushialo khulwa tsinyanga amakhumi kane, eshiteere nende eshilo, khulwa okhumulula ebindu biosi ebiandalonga, ebiliho mwoyo khushialo.” 5Mana Noa nakhola buli shindu shinga olwa OMWAMI Nyasaye yamulaka.
6Olwa omuyembo kweifula kwetsa khushialo, Noa yali nemiyika ebikhumi bisasaba. 7#Mat. 24:38,39; Luka 17:27Mana Noa nende abasianibe halala nende omukhasiwe nende abakhasi babasianibe nibenjila muliaro okhwihonokokha okhurula khumuyembo kweyifula okwo. 8Buli oluyia lweisolo isiiyikhu nende eyilali isiikhu ta, nende buli oluyia lwelinyonyi, nende oluyia lwabuli eshindu eshimoolanga khwiloba, 9bienjila muliaro bibili bibili, halala nende Noa, shinga olwa Nyasaye yali nalachile Noa okhukhola. 10Mana olunyuma lwetsinyanga musaafu, omuyembo kweifula kwamala nikubaho khushialo.
11 #
2 Pet. 3:6
Khunyanga yekhumi namusaafu mumwesi kwakhabili, Noa nali nemiyika ebikhumi bisasaba, Nyasaye yakhola amaatsi akali hasi weliloba okhufutukha. Khandi niyekula amatirisha komwikulu. 12Mana ifula niyikwa khushialo khulwa tsinyanga amakhumi kane, eshilo neshiteere. 13Khu nyanga tsana eyo, Noa nende omukhasiwe, nende abasianibe, Shemu, Hamu nende Yafetsi halala nabakhasi babwe, benjila muliaro. 14Benjilamwo nende buli oluyia lwetsisolo nabulimo, nende buli tsimbia tsiosi tsiemiruko, nende buli oluyia lwabuli shindu eshimoolanga khushialo nende buli oluyia lwa linyonyi. 15Mana Noa niyenjila muliaro nende buli oluyia lweshilonje eshiali mwoyo, bibilibibili eshisaatsa neshikhasi. 16Mana Noa niyenjilamwo ninabio, shinga olwa Nyasaye yali namulachilisiye okhukhola. Mana OMWAMI Nyasaye nayekalila Noa muliaro elo.
17Omuyembo kweifula kwatsiililila okhuba khushialo khulwa tsinyanga amakhumi kane, nako amaatsi nikameetekha, ne nikachinguula eliaro nilichaaka okhwelema khumaatsi hekulu weshialo. 18Amaatsi nikayemba khushialo nikameetekha muno, nalio eliaro nilielema hekulu khumaatsi. 19Amaatsi nikayemba khushialo okhuula nikafuunikha ebikulu ebirambi biosi khushialo. 20Amaatsi nikameeta okhuba amanji, nikaba hekulu webikulu oburambi bwetsifuti amakhumi kabili natsirano. 21Ne buli shindu khushialo eshiali mwoyo, nishifwa. Amanyonyi koosi, emiruko, tsisolo nabulimo tsiosi, nende ebimoolanga khwiloba nibifwa khandi abandu nibafwa boosi. 22Buli shindu, eshialimwo obulamu shiafwa. 23OMWAMI Nyasaye namulula khushialo ebilonje biosi ebiali mwoyo. Khandi namulula abandu, tsisolo, ebimoolanga nende amanyonyi. Noa yenyene nende abayali ninabo muliaro, nibo abahonokokha okhumululwa. 24Mana amaatsi nikayemba khulwa tsinyanga eshikhunmi shilala nende amakhumi karano.
Επιλέχθηκαν προς το παρόν:
OBUCHACHILO 7: OLUPR
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε