Ləwke 24
24
Same ta Yɛsə kwa kwele le mpi
(MAT 28.1-10; MRK 16.1-8; ZHŊ 20.1-10)
1Masheke masheke vəa ŋkwa demase ne, cape mia shɛhɛ kadzeme kwele le n'yi ba'a 'wərdə nyi zeleve hɛ. 2Pa hɛ sləyi nahe pelɛ ketsəkwəmte geva seyi mɛa kwele. 3Shilimə hɛ kwa, ama kenakɛ geva ta Nde sleke ŋkwa Yɛsə hɛ kwa we. 4Ma mba mehele ta nci ketaze taze ne, hwehwa'a kweci mbeli bake mbe gare kwa tɛawetɛa ncake nca. 5Ma kwa nza ŋkɛ shewə hɛ va ghazlənə ne, pa hɛ ŋate ghə kadzembe hɛɗi. Ma ke mbelia shɛhɛ sha hɛ: «Wa raberə zele wəndə teghweme yɛ hwa mbelia kwahɛɗi wa? 6Mba teke we, nahe ŋkɛ kesame kwa kwele le mpi. Zəzəte mə ghena nya se ŋkɛ kageze ŋayɛ, kwa nza ŋkɛ mba mbe Galilɛ: 7katepamte nda Wəzege ta za mbeli ke ka jaɗafa, katebaŋe ŋkɛ mbeli te sheghwə kwa zleŋkwa, katesame ŋkɛ kwele te kwa maheke ta hɛ.»
8Tagha gɛ, pa hɛ zəzəte ghena ta Yɛsə. 9Cape hɛ sawa pelɛ kwele, pa hɛ lə kagezete nda ke mbeli nyi ketene meŋe kwetɛŋeghəmbe ba'a ke kweci mbeli. 10Mia shɛhɛ ne, Mari Magdala, Zhane ba'a Mari meghekɛa Zhake. Tsagha gezete nda kweci mi nyi kese le hɛ ke ka ghwene ta Yɛsə Kriste. 11Ma ka ghwene ta ŋkɛ nyi tagha nda gezete ghena shɛ mia shɛhɛ ne, kala gezhi newe hɛ hɛ, kese hɛ kayɛ ghena ta nci we. 12Te ŋkwa shɛnyɛ ne, pelɛhetɛme Piyɛre sate te ŋkwa, tereŋe tehwɛ kadzeme kwele. Wəmbɛne ke sha ŋkwa nya kwa ne, deke zlave ya kwa. Ntəŋə ŋkɛ kalə sha ghɛ, heɓake va wəsə nya kemenete geva.
Kwa hweŋkwa ta Ɛmawəs
(MRK 16.12-13)
13Te vecia shɛnyɛ, pa kweci ka təkwə təkwə Yɛsə bake slə kalə kadzembe meleme nya heka mbeli kaƐmawəs, gare kilemɛtre meŋe kwetɛŋeghəmbe yitea Zhɛrəzalɛm. 14Ntake hɛ kageze pɛtɛa wəshi nyi kemenete geva. 15Ma kageze ghena shɛ hɛ ba'a kaghəpə hɛ ne, pa Yɛsə le ghəa ŋkɛ kekave hɛ kwa hweŋkwa ba'a zlaɓete geva le hɛ. 16Kanewe newe Yɛsə hɛ, ama keɗepe hɛ kaYɛsə we, na kwete wəsə kefɛake hɛ keɗepe. 17Ma ke Yɛsə 'yɛwete ghena va hɛ: «Wa wəsə nya se yɛ kaghəpə te kwa hweŋkwa wa? Ghereŋe hɛ le kema teheɗe.» 18Ma ke kwete wəndə nya nza sləa ŋkɛ kaKelɛyopas: «Gha kwetɛŋe ŋa nde ɗepema wəshi nyi kemenete geva mbe Zhɛrəzalɛm dzeyi mbe hɛ nya na?» 19Ma ke sha hɛ: «Wa wəsə nya kemenete geva wa?» Ma ke hɛ shɛ: «Wəsə nya menete nda mbeli ke Yɛsə, nde Nazarɛt, nde mɛ ŋkwa ta Shala nya wəba. Nahe ŋkɛ kencɛte bereteke ŋkɛ mbe slene kwa kema ta Shala ba'a kwa kema ta mbeli pɛtɛ. 20Nahe mbeli nyi te ghəa ka dzeghe Shala ba'a mbeli nyi te ghəa n'yɛ kendeke nda fete kemte ba'a kebaŋete ŋkɛ te sheghwə kwa zleŋkwa. 21Ma zəzə n'yɛ ne, gheŋkɛ nde tembele ka Israyɛl. Zhɛne ne, mahekene hɛa ghena shɛ ghala menete geva ŋkɛ ɓeshi. 22Nahe kweci mi hwa ghen'yɛ ketazemte n'yɛ mehele: ɓeshi masheke masheke ne, cape hɛ kadzeme kwele, 23ama kesləyi geva ta ŋkɛ hɛ we. Pa hɛ zhɛneke ba'a gezete n'yɛ nahe ka ghwene ta Shala kencɛte nda geva ke hɛ ba'a kegezete nda ke hɛ nahe ŋkɛ kenza teghweme. 24Nahe kweci mbelia n'yɛ kese pelɛ kwele, nahe hɛ kesləyi pɛtɛa wəshi kala nya gezete nda mia shɛhɛ ke hɛ. Ama Yɛsə ne, kenakɛ ŋkɛ hɛ we.»
25Ma ke Yɛsə sha hɛ: «Ka dewə mehele, dzawe nda nza yɛ kayɛte ghena nyi gezete ka mɛ ŋkwa. 26Ashɛ nahe ŋkɛ kehite geva kasahwe titikwə Kriste kaba nda tedzembe zləvəa ŋkɛ ŋkɛ wəka?» 27Ntake ŋkɛ kancɛ nda nza ta ghena nyi kegezete geva te ghəa ŋkɛ mbe Ghena ta Shala ke hɛ, pa ghate te yɛ palepa ta Moyize kajive te ŋa pɛtɛa kweci ka mɛ ŋkwa.
28Ma kwa nza hɛ takwa takwa yitea meleme nya lə hɛ ne, pa Yɛsə gwekwete geva kala wəsə kenehe le hɛ. 29Njikə hɛ kakese ŋkɛ, ma ke hɛ shɛ: «Nza teke le ghen'yɛ, nahe tɛhwɛɗi kese, takwa takwa viɗi.» Pa ŋkɛ dzembe melemea shɛ le hɛ, pa ntishɛ le hɛ. 30Ntishɛ ŋkɛ kənəa ɗafa le hɛ, laŋe Yɛsə kelete ɗafa, pa səkwəte Shala ba'a neheve ɗafa shɛ, pa ŋkɛ ndeke nda ke hɛ. 31Tagha gɛ, pa ntsə ta nci ghwenemte geva ba'a pa hɛ ɗepete Yɛsə, ama bətə ŋkɛ zave nda za ke hɛ. 32Ma ke hɛ 'yɛwete kwelɛ ghəa nci: «Ashɛ hələməmə ke ghəa ŋa, vəa ŋkwa nya geze ɓə ghena ŋkɛ kwa hweŋkwa ba'a nya ncɛ ɓə ghena ta Ghena ta Shala ŋkɛ wəka?»
33Pelɛhetɛme hɛ sate te ŋkwa taghanyɛ ba'a zhɛneghe geva kadzembe Zhɛrəzalɛm. Se hɛ ne, tetsene mbeli nyi ketəkwə təkwə Yɛsə nyi ketene meŋe kwetɛŋeghəmbe. 34Ma ke hɛ sha hɛ: «Kaganda same Nde sleke ŋkwa kwa kwele, nahe Simon kenakɛ ŋkɛ.» 35Ma mbeli nyighɛ perə ne, njikə hɛ kancɛ nda wəsə nya kemenete nda geva ke hɛ kwa hweŋkwa ke hɛ ba'a tsema tsema ɗepete Yɛsə vəa ŋkwa nya neheve ɗafa ŋkɛ.
Yɛsə kancɛ nda geva ke mbeli nyi ketəkwə təkwə
(MAT 28.16-20; MRK 16.14-18; ZHŊ 20.19-23; SLN 1.6-8)
36Ma mba hɛ mbe geze ghena shɛ kala nya ne, vəkə Yɛsə hwa hɛ. Ma ke sha hɛ: «Kwelɛŋe pe yɛ.» 37Ntake hɛ kabare bare, baŋe ne mte yanakɛ hɛ, ke hɛ sha ŋa nci. 38Ma ke Yɛsə sha hɛ: «Wa raberə nda bare bare yɛ wa? Wa raberə nda nza ghəa ŋayɛ bake bake wa? 39Newe ma mə dzeve ta ɗa ba'a seɗa ta ɗa, 'ya shɛ ŋkɛ kaganda. Kwaɗakɛ ɗa mə newema yɛ, kwa ɗema 'yɛ'yɛ ba'a sli va mte kala nya newe slia geva ta ɗa nya yɛ we.» 40Ma kwa gezemte ŋkɛ kala nya ne, pa ncɛte nda dzeve ta ŋkɛ ba'a seɗa ta ŋkɛ ke hɛ. 41Ma kwa nakɛ ŋkɛ kashɛma hɛ shɛ yɛte kaba va nya nza hɛ fare fare ba'a heheɓake ne, ma ke Yɛsə 'yɛwete va hɛ: «Wəsə kezeme ya va gheyɛ teke tse na?» 42Pa hɛ ndeke nda mesla ta kelepe kepesa pesa. 43Pa ŋkɛ kelete ba'a zehwe kwa kema ta nci. 44Kwa sebe ta ŋkɛ, ma ke sha hɛ: «Ma vəa ŋkwa nya nza 'ya mba le gheyɛ ne, ma 'ya gezete ŋayɛ: ma wəsə nya kerafete geva te ghəa ɗa mbe wəsə mahalegəa Moyize, mbe yɛ palepa ta ka mɛ ŋkwa ba'a mbe palepa ta yɛ Cimə ne, kateyipə geva ŋkɛ kadzawa.» 45Pa ŋkɛ ghwenemte nda ghəa nci ke hɛ le ghena nya kala nya kezha fa ghena nya mbe Ghena ta Shala hɛ. 46Ma ke sha hɛ: «Ma ke rafete geva: katesa titikwə Kriste, katepesle ŋkɛ mbeli, katesame ŋkɛ kwa kwele le mpi te kwa maheke ta hɛ. 47Nahe ŋkɛ kehite geva kazlape ghena ta Shala mbeli ke mbeli te sləa ŋkɛ ke pɛtɛa hwelefefi, kategha geva ŋkɛ mbe Zhɛrəzalɛm. Kateheka ŋkwa mbeli kampi dzeve kezha kelemte geva jaɗafa te wənə. 48Gheyɛ ya kaka negha fete yitea ghena shɛ. 49'Ya le ghəa ɗa nde teghwene ŋayɛ wəsə nya meɗeyi Yiteyɛ ɗa kezha gheyɛ. Ama teke nza yɛ mbe meleme nya kaba hwa'a te və nya tekemave berete yɛ sawa pelɛ ghweme.»
Yɛsə kadzeme ghweme
(MRK 16.19-20; SLN 1.9-11)
50Pa Yɛsə hekakave hɛ shave mbe meleme, takwa yitea Bɛtani. Ma tagha ne, pa sletete dzeve, pa wəpikɛ hɛ. 51Ma vəa ŋkwa nya wəpi hɛ ŋkɛ ne, pa shavenyɛ hwa hɛ, pa dzeme ghweme. 52Ma ghenci gɛ ne, pa hɛ gwəɗəŋə yite. Pa hɛ zhɛneghe geva kadzembe Zhɛrəzalɛm, fare fare wənəa nci. 53Kanza hɛ keveci keveci mbe ghɛa Shala ba'a katsahe Shala hɛ.
Επιλέχθηκαν προς το παρόν:
Ləwke 24: BEKDC12
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
La Bible en langue Kapsiki avec les livres deutérocanoniques © Alliance Biblique du Cameroun 2012.