Ləwke 15
15
Ghena keyipə pa te təmə nya kezanyɛ
(MAT 18.12-14)
1Pɛtɛ ka tsehe jaɓeregwale ba'a ka jaɗafa tsenete geva yitea fa ghena va Yɛsə. 2Kandəghwə ndəghwə ka Fariziyɛn ba'a ka rafe wəsə mahalegə. Ma ke hɛ: «Wa raberə nda beke wəndə nya le ka jaɗafa ba'a zeme ɗafa ŋkɛ le hɛ wa?» 3Pa Yɛsə gezete nda kwete ghena keyipə pa ke hɛ. Ma ke: 4«Pa timɛti gwəmsə va kwete wəndəa ŋayɛ. Pa kwete zanyɛ kwetɛŋe. Ashɛ wəndəa shɛ kasərə nyi meslimsə meslighəmbe nyi ketene te ɓerama kezha lə kazele nya kezanyɛ wəka? 5Ma kesepate ŋkɛ ne, kazlama ŋkɛ, kave ŋkɛ yitea welɛa ŋkɛ. 6Ma kwa sheke ŋkɛ ne, pa hekake ka mcɛhɛnyɛ ba'a ka ghedəkwə, ma ke sha hɛ: Zlama mə le 'ya ɓeshi. Nahe 'ya kesepate təməa ɗa nya kezanyɛ! 7Ma 'ya sha gheyɛ: Tsagha tezlama mbeli nyi pelɛ ghweme yitea nde jaɗafa kwetɛŋe nya kezhɛrete nza ta ŋkɛ. Za ma tezlama hɛ yitea wəndəa shɛ ke kweci mbeli nyi tiɗiɗi meslimsə meslighəmbe nyi tsakɛma hɛ mpi nda dzeve ke Shala.
Ghena keyipə pa te cɛdɛ nya kezanyɛ
8Keɗema ne, dala slibə meŋe ya va kwete male, nda zanyɛ slibə kwetɛŋe, kateɗema nde kandə ghwə kwa paterela ta nta, katsale ŋkwa nya kwa cɛa nta ba'a kazele ŋkɛ le mehele hwa'a te və nya tesləyi ŋkɛ nde na? 9Ma vəa ŋkwa nya tesləyi ŋkɛ nde ne, katsene ka mcɛhɛ nta ba'a ka ghedəkwəa nta nde, ma ke sha tegeze nda ke hɛ: Zlama mə le 'ya, kwa nza ŋkɛ nahe 'ya kesləyi dala ta ɗa nya kezanyɛ. 10Ma 'ya sha gheyɛ: tsagha tezlama ka ghwene ta Shala yitea nde jaɗafa kwetɛŋe nya kezhɛrete nza ta ŋkɛ.»
Ghena keyipə pa te wəzege nya kezanyɛ
11Ma ke Yɛsə sha hɛ zhɛkwa: «Ŋwale tezhili ya bake va kwete wəndə. 12Ma ke wəzege nya ɓɛhwɛ sha yitenyɛ: Yita, ɗave ɗa zhike ŋa ɗa wəshi kezeme ghə. Pa yitenyɛ neheve nda pɛtɛa wəshia ŋkɛ ke hɛ. 13Kwa sebe ta hɛ ɓɛhwɛ ne, pɛtɛ wəzege nya ɓɛhwɛa shɛ pamte wəshia ŋkɛ, ntəŋə ŋkɛ slənyɛ le cɛdɛa ŋkɛ kalə kadzembe kwete meleme cakeɗake. Pa ŋkɛ menete mefətekwə te ŋkwa shɛ, pa bezemte cɛdɛa ŋkɛ pɛtɛ. 14Ma vəa ŋkwa nya kiɗi wəshi yitea dzeve ta ŋkɛ ne, pɛkwe ma nya ndiremi te hɛɗia shɛ, tagha gɛ, nahe titikwə kekeseve ŋkɛ. 15Ntəŋə ŋkɛ kalə kamene nda slene ke kwete wəndə nya mbe melemea shɛ, pa wəndəa shɛ ghwenakɛ ŋkɛ kalə kaya gərədə. 16Kaɗe ŋkɛ kabehe ghəa ŋkɛ le rəghwə nyi zeme gərədə, ama wəndə shɛ keɗave nda we. 17Ntake ŋkɛ kazəzə ghena mbe ghəa ŋkɛ. Ma ke: Ndagwara kapesle ka mene slene ta yiteyɛ ɗa yitea wəsə kezeme we, newe 'ya kamte va ma teke gi! 18Jara lə 'ya sha yiteyɛ ɗa. Ma 'ya sha tegeze nda: Yita, nahe 'ya kebezemte nda ghena ke Shala ba'a ke gha. 19Kehi 'ya kanza kawəzege ta ŋa ɓiyitsa we. Veyi ɗa kala kwete wəndəa ka mene slene ta ŋa. 20Ntəŋə ŋkɛ kalə sha yitenyɛ.
Ma mba ŋkɛ cakeɗake ne, nahe yitenyɛ kenakɛ ŋkɛ, ntake heli kazhɛ nda yite. Tereŋe ŋkɛ te hwɛ kalə shɛ, pa həməwəve ŋkɛ ndeɗekə. 21Tagha gɛ, ma ke wəzege ta ŋkɛ shɛ: Yita, nahe 'ya kebezemte nda ghena ke Shala ba'a ke gha. Kehi 'ya kaheka ɗa na kawəzege ta ŋa ɓiyitsa we. 22Ma ke yita sha ka mavashia ŋkɛ: Yana mə le lekwesa nya ganyɛ, seɗete nda mə. Vate nda mə ŋgwedɛba te dzeve, seɗame nda mə tsahwa mbe seɗa. 23Keleke mə mɛare ba'a henemte mə. Zeme ɓəmə wəsə kezeme ba'a mene ɓəmə gəsəkə. 24Kwa nza ŋkɛ nahe wəzege ta ɗa nya kese kemte mte, nahe ŋkɛ kekemave mpi zhɛkwa. Nahe ŋkɛ kese keza za, nahe ŋkɛ kesləyi geva ɓiyitsa. Pa gəsəkə nya wəba ba'a farefa ta wənə menete geva tsagha.
25Ma nda menete geva wəshi nyi kala nyi ne, kwamte wəzege ta ŋkɛ nya wəba. Ma vəa ŋkwa nya sheke ŋkɛ ba'a nya nza ŋkɛ takwa takwa yitea ghɛ ne, pa fate gaka ta wəshi ketsa ba'a yɛ wetse. 26Daŋe ŋkɛ hekakɛ kwete wəndəa mbeli nyi kemene nda slene ke yitenyɛ, ma ke shɛ: Wa menete geva ɓeshi wa? 27Ma ke wəndəa shɛ shɛ: Nahe wəza meyɛ ŋa kezhɛneke geva. Nahe yiteyɛ ŋa kehenekɛ mɛare, va nya kemave wəzege ta ŋkɛ ŋkɛ lɛŋe lɛŋe. 28Mɓɛke wəzege nya wəba hwepete wənə. Hɛreɗɛ ŋkɛ ɗema dzeki ghɛ. Pa yitenyɛ shave, ma ke shɛ: Təhwə təhwə dzeki ghɛ gi! 29Ma ke sha yitenyɛ: Va kwele kwele 'ya kamene ŋa slene, kegha 'ya kaɗema fa ghena nyi gezete na we. Kegha na kandeke ɗa ya zhɛgwəa kwe ŋkɛ kezha mene gəsəkə 'ya le ka mcɛhɛ ɗa we. 30Ama kwa zhɛneke geva wəzege ta ŋa nya kelə kazamte wəshia ŋa le mi mefətekwə hwa ŋkwa ne, gheŋkɛ yahene nda mɛare nya hɛnɛhɛ na. 31Ma ke yitenyɛ shɛ: Wəzege ta ɗa, gheɓə le gha ghalanza, yayata wəsə nya va 'ya ne, ŋa ŋa ŋkɛ wəka? 32Ama ndeɗekə ŋkɛ sha gheɓə kamene gəsəkə ba'a zlama ɓeshi, kwa nza ŋkɛ nahe wəza meyɛ ŋa nya kese kemte mte, nahe ŋkɛ kekemave mpi zhɛkwa. Nahe ŋkɛ kese keza za, ama nahe ŋkɛ kesləyi geva zhɛkwa.»
Επιλέχθηκαν προς το παρόν:
Ləwke 15: BEKDC12
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
La Bible en langue Kapsiki avec les livres deutérocanoniques © Alliance Biblique du Cameroun 2012.