तोलिङ्सोमु 4
4
कयिन नु हाबिल
1आदम्मे़न् मे़ल्लिङ्गे़न् कुमेत् हब्बाःन्नु इप्से़, हे़क्क्याङ् कुमेःत्ते़न् मे़न्छुक्मा पोःक्खे़ खे़ब्याङ् कयिने़न्#४:१ कयिन—कन् मिङ्ङे़न् हिब्रुओ “आङ्गाॽ खोसुङ्” पाःप्मनाबा हे़क्के पोङ्ॽ॥ सावाःन्दु॥ हे़क्क्याङ् पाःत्तु, “यहवे दाङ्बाल्ले़ फाॽराङ्ङाङ् ये़म्बित्छा साधिक् कत्तुङ्॥” 2याङ्सि खे़ल्ले़ कयिने़ल्ले़ कुन्साॽ हाबिल्ले़न् कत्तु॥
हाबिल्ले़न् मे़ल्लुक् चागे़राम्बा पोःक्खे़, हे़क्क्याङ् कयिने़न् खाम्बेःक्मो याःन्गे़मबा के़जाबा पोःक्खे़॥ 3कुभा ये़म् ले़क्ते़आङ् एगाङ् कयिने़ल्ले़ योॽबाःल्ले़ फत्छुबा कुभा पोगुगे़न् कुजाजिॽ चोभा हे़क्के यहवे दाङ्बाओ तारु॥ 4हे़क्क्याङ् हाबिलरे़ कुमे़ल्लुक् लुप्पोलाम् के़रे़क्नुःल्ले़ तगि के़धाप्पा मे़ल्लुक्साःत्तिल्ले़ कुसोःत्ते कुसोत् के़बप्पा सान् तारु॥ यहवे दाङ्बाल्ले़ हाबिल्ले़न् नु खुने़ॽ तोःन्दुबा चोभान् ताःक्तु, #हिब्रु ११:४ 5कर कयिन्ने़न् नु खे़ल्ले़ तोःन्दुबा चोभान् मे़दाःक्तुन्॥ खे़ल्ले़चोगुल्ले़ कयिन्ने़न् चाॽरिक् कुयाःक्ले़ॽरे़, हे़क्क्याङ् खे़ल्ले़ कुनामाक्ते़॥
6खे़ब्याङ् यहवे दाङ्बाल्ले़ कयिने़न् मे़त्तु, “खे़ने़ॽ थेआङ् के़याःक्ले़ॽबाबे? थेआङ् के़नारान् माक् लॽबाबे? 7खे़ने़ॽ नुबा के़जोगुल्ले़ थे खे़ने़ॽआङ् ताःक्मा के़लाॽबा के़म्बोङ्ने़म्बि? कर खे़ने़ॽ नुबा याःम्बक् के़न्जोगुन्ने़भग्र लायोल्ले़ के़लाम्धेःप्पुङ्ङो के़सुक्काङ् युङ्लो॥ खे़ल्ले़ कुनिङ्वाॽइन् खे़ने़ॽ ले़प्माङ् पत् कर खे़ने़ॽ खे़न् के़युक्तुरए पोङ्॥”
8कयिने़ल्ले़ कुन्साॽ हाबिल्ले़न् मे़त्तु, “फे़रे़ॽ आन्छिॽ प्याङ्सिगे़न् इक्ताप्पो पित्छि॥”#४:८फे़रे़ॽ आन्छिॽ प्याङ्सिगे़न् इक्ताप्पो पित्छि—कन् पाःन्छेःक्वाहाॽ हिब्रुओ मे़बत्ने़न्॥ हे़क्क्याङ् खे़ङ्हाॽ प्याङ्सिगे़न् इक्ताप्पो वये़सिल्ले़ कयिन्ने़ल्ले़ कुन्साॽ हाबिल्ले़न् हिप्तुआङ् से़रु॥ #मत्ति २३:३५; लुका ११:५१; १ युहु ३:१२
9खे़ब्याङ् यहवे दाङ्बाल्ले़ कयिन्ने़न् सेःन्दोसु, “के़न्साॽ हाबिल्ले़न् आत्तो वाॽ?”
खे़ल्ले़ मे़त्तु, “आङ्गाॽ मे़निआन्॥ आङ्गाॽ आन्साॽ ओगे़मे़प्पाआबि?”
10यहवे दाङ्बाल्ले़ मे़त्तु, “खे़ने़ॽ थे के़जोगुबाबे! के़न्साॽरे़ कुमाक्खिल्ले़ खाम्बेःक्मोलाम् आङ्गाॽ तुवा चोःक्कार याक्॥ 11हे़क्क्याङ् आल्ल खे़ने़ॽ साक्मुरा के़ध्ये़आङ् खाम्बेःक्मोलाम्बा के़म्नाःत्ते़आङ् के़वाॽ, थेआङ्भे़ल्ले़ खाम्बेःक्माल्ले़ के़न्साॽरे़ कुमाक्खिन् के़हुक्कोलाम्बा ताःक्मारे़ लागि खे़ल्ले़ कुमुरान् हन्दुआङ्वाॽरो॥ 12खे़ने़ॽ इक्ताप्पो याके़मःल्ले़ खे़ल्ले़ पोगुगे़न् कुजा फत्छु के़म्बिने़न्॥ खे़ने़ॽ इक्सादिङ् खाम्बेःक्मो नासिङ्मा मे़ङ्घोए ताक्के़बे़ॽबाआङ् के़वाॽबा के़बोङ्॥”
13कयिने़ल्ले़ यहवे दाङ्बान् मे़त्तु, “कङ्ग आङ्गाॽ थःप्माए मे़सुक्कान्बा साॽरिक् के़साक्पा खुम्दिङ् पोःक्खे़॥ 14ओमे़त्ते़ॽओ, आइन् खे़ने़ॽ कन् लाजेॽलाम्बा के़लःत्ताङ् के़देसाङ्ङाङ् वाॽ, हे़क्क्याङ् खे़ने़ॽ के़मिक्साओलाम् आङ्गाॽ चिङ्सिङ्मा के़बोङ्बा पोःक्खे़आङ् वाॽ॥ आङ्गाॽ इक्सादिङ् खाम्बेःक्मो नासिङ्मा मे़ङ्घोम्नाबा ताक्के़बे़ॽबाआङ् के़वाॽबा पोङ्आ, हे़क्क्याङ् आङ्गाॽ याप्मि के़दुम्बा आत्तिन्हाॽरे़साङ् मे़से़त्तारो॥”
15कर यहवे दाङ्बाल्ले़ खे़न् मे़त्तु, “हे़क्के मेःन्, हाःत्ले़ खे़ने़ॽ के़से़त्, खे़ल्ले़ कुले़क्वा नुसिले़ङ् थारिक् खुम्दिङ् खोसुॽ॥” हे़क्क्याङ् यहवे दाङ्बे़ल्ले़ कयिने़न् हाःत्ले़आङ् मे़से़रुल्ल फाॽआङ् कयिने़ल्ले़ कुधक्को लत्छा मिक्सेःन्धिक् फत्छुबिरु॥ 16खे़ब्याङ् कयिने़न् यहवे दाङ्बाल्ले़ कुदगिलाम् लःन्दे़बेआङ् अदनलाम् नाम्गे़न् पिसाङ्बा नोद मे़प्मनाबा लाजेॽओ वाॽमा हेःक्ते़॥
कयिने़ल्ले़ कुस्सा कुएहाॽ
17कयिने़न् मे़ल्लिङ्गे़न् कुमेःत्तिन्नु इप्से़, हे़क्क्याङ् कुमेःत्ते़न् मे़न्छुक्मा पोःक्खे़आङ् हनोक्के़न् सावाःन्दु॥ कयिने़ल्ले़ लत्छा ये़क्यक्थिक् चोगु हे़क्क्याङ् कुस्साःल्ले़ कुमिङ्ङो खे़न् ये़क्यक्किल्ले़ कुमिङ् हनोक युक्खु॥ 18हनोक्के़ल्ले़ कुस्सा इरादे़न् कत्तु॥ इरादे़ल्ले़ कुस्सा महुयाएल्ले़न् कत्तु॥ महुयाएल्ले़ल्ले़ कुस्सा मतुसेलान् कत्तु॥ मतुसेलाःल्ले़ कुस्सा ले़मे़क्खे़न् कत्तु॥
19ले़मे़क्के़ल्ले़ मे़ल्लिङ्गे़न् कुमेत् ने़त्छि वये़सि॥ थिक्के़ल्ले़ कुमिङ् आदा हे़क्क्याङ् वेॽसमाल्ले़ कुमिङ् सिल्ला वये़॥ 20आदाःल्ले़ याबाल्ले़न् कत्तु॥ खे़न् साःङ्गाहिम्हाॽओ के़युङ्बा नु थक्सा के़हिङ्बाहाॽरे़ खुन्छिॽ थाःक्थे़बा वये़॥ 21खे़ल्ले़ कुन्साॽरे़ कुमिङ् युबाल वये़॥ खे़ङ्ग तुङ्ना के़हिप्पा नु मुफ्रामा के़मुङ्बा के़रे़क्ले़ खुन्छिॽ थाःक्थे़बा वये़॥ 22सिल्लाःल्ले़ तुबल कयिने़न्#४:२२ तुबल कयिने़न्—उनाहुरिबा लत्छा पाःन्ले़ङ्ङो के़रे़क् कासा नु फे़न्जेल्ले़ फे़जुम्भे़या के़धक्पाहाॽरे़ खुनिॽ थाःक्थे़बा वये़॥ कत्तु॥ खे़न् के़रे़क् परिक्ले़न् कासा नु फे़न्जेल्ले़ फे़जुम्भे़या के़धक्पा वये़॥ तुबल कयिने़ल्ले़ नामा मे़प्मनामा कुन्साॽ मे़न्छुमाधिक् वये़॥
23ले़मे़क्के़ल्ले़ मे़ल्लिङ्गे़न् कुमेःत्हाॽ मे़त्तुसि,
“आदा नु सिल्लाए, आबाःन्निन् खे़प्से़त्छे़ॽ,
खिन्छिॽ ले़मे़क्के़ल्ले़ कुमेःत्छे,
आङ्गाॽ पाःत्तुङ्बा पाःन्निन् नुरिक्काङ् खे़प्से़त्छे़ॽ,
आङ्गाॽ याप्मि के़घाःम्बा थाङ्बे़न् मनान् से़रुङ्लो॥
24कयिन के़से़प्पे़ल्ले़ नुसिले़ङ् कुले़क्वा खुम्दिङ् खोसुने़भग्र, #मत्ति १८:२२
ले़मे़क्के़न् के़से़प्पे़ल्ले़ नुबोङ्ङाङ् नुसिले़ङ् कुले़क्वा खुम्दिङ् खोसुरो॥”
सेत नु एनोस
25आदम्मे़न् मे़ल्लिङ्गे़न् कुमेःत्तिन्नु इप्से़, हे़क्क्याङ् कुमेःत्तिल्ले़ ये़म्बित्छा साधिक् कत्तु॥ हे़क्क्याङ् “कयिने़ल्ले़ से़रुबा हाबिलरे़ कुले़क्वाओ निङ्वाॽफुमाङ्ङिल्ले़ वेॽ अङे़ःक्वाधिक् पिराङ्लो” पाःत्तुआङ् खे़न् अङे़ःक्वान् सेत#४:२५ सेत—कन् मिङ्ङे़ल्ले़ कुबेन् हिब्रुओ “पिराङ्ङाङ् वाॽ” हे़क्तङ्बाए खे़म्दे़त्॥ मिङ् वाःत्तु॥ 26सेःत्ते़ल्ले़आङ् साधिक् कत्तु, हे़क्क्याङ् खुने़ॽ खे़न् एनोस मिङ् वाःत्तु॥
खे़न् ये़म्माङ्धो मे़न्छाम् याप्मिहाॽरे़ यहवे दाङ्बाल्ले़ कुमिङ्ङो माङ्से़वा चोःक्मा मे़हेःक्तुरो॥
Επιλέχθηκαν προς το παρόν:
तोलिङ्सोमु 4: LIF
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2009, 2023, Wycliffe Bible Translators, Inc. All rights reserved.