လံာ်စီၤမိၤရှ့အခီၣ်ထံးတဘ့ၣ်. ၃၀
၃၀
1ဒီးနီၢ်ရၤဃ့လးထံၣ်ဘၣ်ဝဲလၢ အတဆံးစၢ်န့ၢ်ဘၣ် အဖိလၢစီၤယၤကိာ်အဂီၢ်ဘၣ်. ဒီးနီၢ်ရၤဃ့လးန့ၣ်သး က့ၣ်အဒီပုၢ်ဝဲၢ်မုၣ်, ဒီးစံးဘၣ်စီၤယၤကိာ်, ဟ့ၣ်ယၤ လၢဖိတဖၣ်တက့ၢ်. မ့တမ့ၢ်ဘၣ်ဒီးယမ့ၢ်တၢ်သံလီၤ.
2ဒီးစီၤယၤကိာ်သးထီၣ်နီၢ်ရၤဃ့လး, ဒီးစံးဝဲဒၣ်, ယဲ ဒၣ်အံၤ, ယအိၣ်လၢယွၤအလီၢ်, လၢအတြီဃာ်ဒၢလီၢ် အတၤသၣ်ဒီးနၤဧါ.
3ဒီးစံးဝဲဒၣ်, ကွၢ်ကွၢ်, ယကုၢ်ပိာ်မုၣ်နီၢ်ဘံၤလဟၤ တဂၤအံၤ, လဲၤနုာ်ဆူအအိၣ်တက့ၢ်. ဒီးကဆံးစၢ်န့ၢ် ဝဲလၢယခီၣ်လ့ၢ်ခိၣ်အဖီခိၣ်, ဒီးယကန့ၢ်ဘၣ်ယဖိစ့ၢ် ကီးလၢအီၤလီၤ.
4ဒီးဟ့ၣ်အီၤလၢအကုၢ်ပိာ်မုၣ် နီၢ်ဘံၤလဟၤလၢအမါ, ဒီးစီၤယၤကိာ်လဲၤနုာ်ဆူအအိၣ်လီၤ. 5ဒီးနီၢ်ဘံၤလဟၤ န့ၢ်ဒၢထီၣ်,ဒီးဆံးစၢ်န့ၢ်အဖိခွါလၢစီၤယၤကိာ်အဂီၢ် လီၤ.
6ဒီးနီၢ်ရၤဃ့လးစံးဝဲဒၣ်, ယွၤစံၣ်ညီၣ်ယကွီၢ်, ဒီးက နၣ်စ့ၢ်ကီးယကလုၢ်, ဒီးဟ့ၣ်လီၤယၤလၢယဖိခွါလီၤ. မၤသးဒ်န့ၣ်ဒီး ယုၢ်ဝဲအမံၤလၢစီၤဒၣ်လီၤ.
7ဒီးနီၢ်ရၤဃ့လးအကုၢ်ပိာ်မုၣ်နီၢ်ဘံၤလဟၤန့ၣ်ဒၢထီၣ် ကဒီးတစု, ဒီးဆံးစၢ်န့ၢ်အဖိခွါခံဂၤတဂၤ လၢစီၤယၤ ကိာ်အဂီၢ်လီၤ.
8ဒီးနီၢ်ရၤဃ့လးစံးဝဲဒၣ်, ယကနိဒီးယဒီပုၢ်ဝဲၢ်မုၣ်လၢ ယွၤအတၢ်ကနိတဖၣ်, ဒီးယမၤနၢၤတၢ်လီၤ. ဒီးယုၢ်ဝဲ အမံၤလၢစီၤနးသၤလံလီၤ.
9ဒီးနီၢ်လ့ၤအၤထံၣ်ဝဲလၢအဆံးစၢ်န့ၢ်တၢ်န့ၣ်ဆိတ့ၢ်ဝဲ, ဒီးဟံးန့ၢ်အကုၢ်ပိာ်မုၣ်နီၢ်စံၤလပၤ ဒီးဟ့ၣ်အီၤလၢစီၤ ယၤကိာ်လၢအမါလီၤ.
10ဒီးနီၢ်လ့ၤအၤအကုၢ်ပိာ်မုၣ် နီၢ်စံၤလပၤန့ၣ်ဆံးစၢ်န့ၢ် အဖိခွါလၢစီၤယၤကိာ်အဂီၢ်လီၤ. 11ဒီးနီၢ်လ့ၤအၤစံးဝဲ ဒၣ်, ပှၤတဖု, ဒီးယုၢ်အမံၤလၢစီၤကးလီၤ.
12ဒီးနီၢ်လ့ၤအၤအကုၢ်ပိာ်မုၣ် နီၢ်စံၤလပၤဆံးစၢ်န့ၢ်အဖိ ခွါလၢစီၤယၤကိာ်အဂီၢ်ခံဂၤတဂၤလီၤ. 13ဒီးနီၢ်လ့ၤအၤ စံးဝဲဒၣ်, ယဘၣ်တၢ်အမုာ်လီၤ. အဂ့ၢ်ဒ်အံၤ, ပှၤပိာ် မုၣ်တဖၣ်ကကိးယၤလၢ ပှၤဘၣ်တၢ်အမုာ်လီၤ. ဒီး ယုၢ်ဝဲအမံၤလၢစီၤအၤရှ့ၢ်လီၤ.
14ဒီးကူးဘုကၠူၣ်အမုၢ်နံၤတဖၣ်န့ၣ် စီၤရူၤဘ့ၣ်လဲၤတၢ်, ဒီးထံၣ်န့ၢ်ဒူးဒးသၣ်လၢပျီပူၤ, ဒီးဟဲက့ၤစိာ်ဝဲဆူအမိၢ် နီၢ်လ့ၤအၤအအိၣ်လီၤ. ဒီးနီၢ်ရၤဃ့လးစံးဘၣ် နီၢ်လ့ၤ အၤ, ဟ့ၣ်စာ်ယၤလၢနဖိခွါအဒူးဒးသၣ်တနီၤတက့ၢ်.
15ဒီးစံးဘၣ်အီၤ, နဟံးထီၣ်ကွံာ်ယဝၤန့ၣ်မ့ၢ်တၢ်အဆံး ဧါ, ဒီးနကဟံးထီၣ်ကွံာ်စ့ၢ်ကီးယဖိခွါအဒူးဒးသၣ်ဧါ. ဒီးနီၢ်ရၤဃ့လးစံးဝဲဒၣ်, အဂ့ၢ်မ့ၢ်ဒ်န့ၣ်ဒီးကမံဃုာ်ဒီးနၤ ခဲမုၢ်နၤအံၤလၢနဖိခွါအဒူးဒးသၣ်အဃိလီၤ.
16ဒီးလၢမုၢ်ဟါန့ၣ်စီၤယၤကိာ် ဟဲက့ၤထီၣ်လၢပျီပူၤ, ဒီးနီၢ်လ့ၤအၤလဲၤသဂၢၢ်အီၤ, ဒီးစံးဝဲဒၣ်, နဘၣ်ဟဲဆူ ယအိၣ်လီၤ. အဂ့ၢ်ဒ်အံၤ, ယမၢလဲနၤလၢယဖိခွါအဒူး ဒးသၣ်လီၤ. ဒီးမံဃုာ်ဝဲဒီးအီၤလၢမုၢ်နၤန့ၣ်လီၤ.
17ဒီးယွၤကနၣ်နီၢ်လ့ၤအၤအကလုၢ်, ဒီးအဝဲဒၣ်ဒၢထီၣ် ဝဲ, ဒီးဆံးစၢ်န့ၢ်အဖိခွါလၢစီၤယၤကိာ်အဂီၢ် ယဲၢ်ဂၤတ ဂၤလီၤ. 18ဒီးနီၢ်လ့ၤအၤစံးဝဲဒၣ်, ယွၤဟ့ၣ်လီၤယၤလၢ ယဘူးယလဲလၢ ယဟ့ၣ်ယကုၢ်ပိာ်မုၣ်လၢယဝၤအဃိ လီၤ. ဒီးယုၢ်ဝဲအမံၤလၢစီၤယံးစၣ်ကၢ်လီၤ.
19ဒီးနီၢ်လ့ၤအၤဒၢထီၣ်ကဒီးတစု, ဒီးဆံးစၢ်န့ၢ်အဖိခွါ လၢစီၤယၤကိာ်အဂီၢ်ဃုဂၤတဂၤလီၤ. 20ဒီးနီၢ်လ့ၤအၤစံး ဝဲဒၣ်, ယွၤနီၤဟ့ၣ်ယၤလၢတၢ်နီၤဟ့ၣ်အဂ့ၤလီၤ. ခဲက နံၣ်အံၤယဝၤကအိၣ်ဃုာ်ဒီးယၤ လၢယဆံးစၢ်န့ၢ်အဖိ ခွါဃုဂၤအဃိလီၤ. ဒီးယုၢ်ဝဲအမံၤလၢစီၤစဘူလိၣ်လီၤ.
21လၢခံက့ၤဒီးဆံးစၢ်န့ၢ်အဖိမုၣ်တဂၤ, ဒီးယုၢ်ဝဲအမံၤ လၢနီၢ်ဒံနၤလီၤ.
22ဒီးယွၤသ့ၣ်နီၣ်ထီၣ်က့ၤနီၢ်ရၤဃ့လး, ဒီးယွၤကနၣ်အ ကလုၢ်, ဒီးအိးထီၣ်အဒၢလီၢ်န့ၣ်လီၤ. 23ဒီးအဝဲဒၣ်ဒၢထီၣ် ဒီးဆံးစၢ်န့ၢ်အဖိခွါ, ဒီးစံးဝဲဒၣ်, ယွၤမၤပူၤမၤဖျဲးယၤဒီးတၢ် ဒုၣ်ဒွဲၣ်ယၤလီၤ. 24ဒီးယုၢ်ဝဲအမံၤလၢ စီၤယိၤသးလီၤ. ဒီးစံးဝဲဒၣ်, ယွၤကဟ့ၣ်ဒံးယၤလၢဖိခွါအဂၤတဂၤလီၤ.
25ဒီးနီၢ်ရၤဃ့လးဆံးစၢ်န့ၢ်စီၤယိၤသးဝံၤဒီး, တၢ်မၤအ သးလၢစီၤယၤကိာ်စံးဘၣ်စီၤလၤဘၣ်, ပျၢ်ယၤဒ်သိးယ ကက့ၤက့ၤဆူယလီၢ်ဒၣ်ယဲ, ဒီးဆူယကီၢ်ဒၣ်ယဲန့ၣ်တ က့ၢ်. 26ဟ့ၣ်ယၤလၢယမါသ့ၣ်, ဒီးယဖိသ့ၣ်တဖၣ်လၢ ယမၤနတၢ်လၢအဃိ, ဒီးဒုးဟးထီၣ်ယၤတက့ၢ်. အဂ့ၢ် ဒ်အံၤ, နသ့ၣ်ညါယမၤတၢ်လၢယမၤလၢနဂီၢ်လီၤ.
27ဒီးစီၤလၤဘၣ်စံးဘၣ်အီၤ, ယဘၣ်ဘျုးဘၣ်ဖှိၣ်လၢန မဲာ်ညါစ့ၢ်ကီးဧါ. ယဖးတၢ်ဒီးယသ့ၣ်ညါလၢယွၤဆိၣ် ဂ့ၤယၤလၢနဃိလီၤ. 28ဒီးစံးဝဲဒၣ်, ပာ်နဘူးနလဲဒီးယ ကဟ့ၣ်ယဲလီၤ.
29ဒီးစံးဘၣ်အီၤ, ယမၤနတၢ်, ဒီးနဆၣ်ဖိကီၢ်ဖိအဒၢ အိၣ်ဒီးယၤ ဒ်လဲၣ်ဒ်လဲၣ်န့ၣ်နသ့ၣ်ညါလီၤ. 30အဂ့ၢ်ဒ် အံၤ, လၢယတချုးဟဲဒံးဘၣ်န့ၣ်နတၢ်အိၣ်ဝဲစှၤမးလီၤ. ဒီးဖျိးထီၣ်လံအါအါကလဲာ်လံ. ဒီးယွၤဆိၣ်ဂ့ၤနၤလၢ ယခီၣ်အဃိလီၤ. ဒီးခဲကနံၣ်အံၤယကမၤစ့ၢ်ကီးလၢယ ဟံၣ်ဒၣ်ယဲအဂီၢ်အကတီၢ်ဖဲလဲၣ်.
31ဒီးစံးဘၣ်အီၤ, ယဘၣ်ဟ့ၣ်နၤလၢမနုၤတမံၤလဲၣ်.ဒီး စီၤယၤကိာ်စံးဘၣ်အီၤ, နတဘၣ်ဟ့ၣ်ယၤလၢတၢ်နီတ မံၤဘၣ်. နမ့ၢ်မၤတၢ်အံၤတမံၤလၢယဂီၢ်ဒီး, ယကကွၢ်, ဒီးပၢၤကဒီးနသိဒီးမဲာ်တဲးလဲးလီၤ.
32တၢ်လၢမုၢ်မဆါတနံၤအံၤ ယကလဲၤခီတူာ်နသိဒီး မဲာ်တဲးလဲးခဲလၢာ်, ဒီးဟီထီၣ်ကွံာ်ဖဲန့ၣ်ကယဲၢ်ဆၣ်ဖိ ကီၢ်ဖိလၢအကံၣ်စံၣ်ဘှဲ, ဒီးကံၣ်ဖျၢၣ်သလၢၣ်တဒုလၢ် လၢ်, ဒီးကယဲၢ်ဆၣ်ဖိကီၢ်ဖိလၢအဃး လၢသိတဖၣ် အကျါ,တဒုလၢ်လၢ်, ဒီးတၢ်လၢအကံၣ်ဖျၢၣ်သလၢၣ်, ဒီးကံၣ်စံၣ်ဘှဲလၢမဲာ်တဲးလဲးအကျါန့ၣ်လီၤ. ဒီးတၢ်န့ၣ် ကမ့ၢ်ယဘူးယလဲလီၤ. 33ဒီးတုၤနဟဲလီၤလၢယဘူးယ လဲအဂ့ၢ်ဒီး, ယတၢ်တီတၢ်လိၤကအုၣ်အသးလၢယဂီၢ် လၢမုၢ်တနံၤခဲကိာ်န့ၣ်လီၤ. ကယဲၢ်တၢ်လၢအတကံၣ် စံၣ်ဘှဲဘၣ်, ဒီးတကံၣ်ဖျၢၣ်သလၢၣ်ဘၣ်လၢမဲာ်တဲးလဲး အကျါ, ဒီးတဃးဘၣ်လၢသိအကျါဘၣ်န့ၣ်, ကကဲ ထီၣ်တၢ်ဟုၣ်တၢ်ဒီးယၤလီၤ.
34ဒီးစီၤလၤဘၣ်စံးဝဲဒၣ်, ကွၢ်ကွၢ်, မ်တၢ်မၤအသးဒ် နကလုၢ်အသိးန့ၣ်တက့ၢ်.
35ဒီးတၢ်လၢမုၢ်နံၤန့ၣ်ဟီထီၣ်ကွံာ် မဲာ်တဲးလဲးအဖါလၢ အကံၣ်တပလူာ်တပလူာ်, ဒီးကံၣ်ဖျၢၣ်သလၢၣ်, ဒီး ကယဲၢ်မဲာ်တဲးလဲးအမိၢ်လၢအကံၣ်စံၣ်ဘှဲ, ဒီးကံၣ်ဖျၢၣ် သလၢၣ်, ဒီးကယဲၢ်တၢ်လၢအအိၣ်ဒီးတၢ်အဝါလၢအ လိၤ, ကယဲၢ်တၢ်လၢအဃးလၢသိအကျါခဲလၢာ်, ဒီး ဟ့ၣ်ဝဲလၢအဖိခွါတဖၣ်အစုပူၤလီၤ. 36ဒိးပာ်သၢသီကျဲ လၢအကစၢ်ဒၣ်ဝဲဒီးစီၤယၤကိာ်အဘၢၣ်စၢၤလီၤ. ဒီးစီၤ ယၤကိာ်ကွၢ်စီၤလၤဘၣ်အသိဒီးမဲာ်တဲးလဲး လၢအအိၣ် လီၤတဲာ်တဖၣ်န့ၣ်လီၤ.
37ဒီးစီၤယၤကိာ်ဟံးန့ၢ်နီၣ်ဘိလၢ သ့ၣ်လံးဘန့ၤအသံ ကစဲာ်, ဒီးလၢသ့ၣ်လူးစး, ဒီးလၢသ့ၣ်ဧၢ်မိၣ်, ဒီးကုၣ် လီၤအဘိဝါလၢအလိၤ, ဒီးဒုးအိၣ်ဖျါထီၣ်တၢ်အဝါလၢ အလိၤလီၤ. 38ဒီးတုၤသိဒီးမဲာ်တဲးလဲးတဖၣ်ဟဲအီထံဒီး, ပာ်နီၣ်ဘိလၢအကုၣ်လီၤတဖၣ်လၢနီၣ်အီထံအပူၤ, လၢ ကျိးဧိၤကျးဧိၤအပူၤ လၢသိဒီးမဲာ်တဲးလဲးတဖၣ် အမဲာ် ညါ, ဒီးတုၤအဟဲအီထံဒီး, ဒၢထီၣ်လီၤ.
39ဒီးသိဒီးမဲာ်တဲးလဲးတဖၣ် ဒၢထီၣ်လၢနီၣ်ဘိတဖၣ်အ မဲာ်ညါ, ဒီးဖှံလီၤသိဒီးမဲာ်တဲးလဲးတဖၣ်လၢအကံၣ်တပ လူာ်တပလူာ်, ကံၣ်စံၣ်ဘှဲ, ဒီးကံၣ်ဖျၢၣ်သလၢၣ်လီၤ.
40ဒီးစီၤယၤကိာ်နီၤဖးသိဖိတဖၣ်, ဒီးပာ်သိဒီးမဲာ်တဲး လဲးသ့ၣ်တဖၣ်အမဲာ်ဆူ တၢ်လၢအကံၣ်တပလူာ်တပ လူာ်, ဒီးကယဲၢ်အဃးလၢစီၤလၤဘၣ်အသိဒီးမဲာ်တဲး လဲးအကျါလီၤ. ဒီးပာ်အဆၣ်ဖိကီၢ်ဖိအဖုဒၣ်ဝဲတဖၣ် လၢတၢ်တပူၤဒၣ်, ဒီးတပာ်ဘၣ်တပူၤဃီဒီးစီၤလၤဘၣ် အသိဒီးမဲာ်တဲးလဲးတဖၣ်ဘၣ်. 41ဒီးဖဲဒၣ်တၢ်အဂံၢ်ဆူၣ်အဘါဆူၣ်တဖၣ် ဒၢထီၣ်ဝဲတဘျီလၢ်လၢ်န့ၣ်တၢ်မၤအသးလၢ စီၤယၤကိာ်ပာ်နီၣ်ဘိတဖၣ်လၢကျိးဧိၤကျးဧိၤအပူၤ လၢသိဒီးမဲာ်တဲးလဲးအမဲာ်ညါဒ်သိးအကဒၢထီၣ်လၢနီၣ်ဘိတဖၣ်အကျါလီၤ.-
42မ့မ့ၢ်ဘၣ်လၢတၢ်အဂံၢ်စၢ်ဘါစၢ်ဒီး, တပာ်ဘၣ်ဝဲလၢ အပူၤဘၣ်. မၤသးဒ်န့ၣ်ဒီး တၢ်လၢအဂံၢ်စၢ်ဘါစၢ်တ ဖၣ်န့ၣ် မ့ၢ်စီၤလၤဘၣ်အတၢ်, ဒီးတၢ်လၢအဂံၢ်ဆူၣ်အ ဘါဆူၣ်န့ၣ်မ့ၢ်စီၤယၤကိာ်အတၢ်လီၤ.
43ဒီးတၢ်လၢပှၤတဂၤန့ၣ် ဖျိးထီၣ်အါအါကလဲာ်, ဒီး အိၣ်ဒီးသိဒီးမဲာ်တဲးလဲးအါဖု, ဒီးကုၢ်ပိာ်မုၣ်, ဒီးကုၢ် ပိာ်ခွါ, ဒီးကီၤလၤအူး, ဒီးကသ့ၣ်ယီၤသ့ၣ်တဖၣ်လီၤ.
Επιλέχθηκαν προς το παρόν:
လံာ်စီၤမိၤရှ့အခီၣ်ထံးတဘ့ၣ်. ၃၀: KSWM
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Sgaw Mason Bible © Bible Society of Myanmar, 1853.