KAJADIAN 3
3
Manusa ngalanggar parentah
1Aya sato damelan Gusti Allah anu pangjailna, nya eta oray. Eta oray ngomong kieu ka awewe tea, ”Na enya saur Allah, anjeun teu meunang ngadahar bubuahan nu aya di ieu taman?”
2Jawab awewe, ”Bubuahan di ieu taman, ti tangkal mana bae oge meunang didahar, 3kajaba ti tangkal anu di tengah-tengah taman. Geus dielingan ku Allah yen teu meunang didahar, dicabak ge ulah, sabab mun ngadahar eta tangtu paeh.”
4Ceuk oray, ”Teu kitu. Hamo matak paeh. 5Allah sasauran kitu teh pedah uninga, yen upama aranjeun ngadahar eta buah kapinteran, aranjeun bakal mapakan Mantenna, bisa terang kana hade jeung goreng.”
6Seug tangkal teh ku eta awewe dipelong, pohara endahna, buahna bangun pohara ngeunahna. Ceuk pamikirna, tada teuing ahengna mun bisa terang kana sagala hal. Tuluy bae metik buahna seug didahar. Sok carogena dibere, tuluy milu ngadahar. 7Harita keneh, sanggeus ngadahar eta buah, duanana kaancikan ku pangarti, sarta terus sadar yen taranjang. Tuluy maranehna ngantet-ngantetkeun daun kondang dipake apok.
8Pasosore, waktu Gusti Allah ngaroris ka eta taman, ku maranehna kadarengeeun, tuluy bae nyarumput kana sela-sela tatangkalan. 9Nu lalaki ku Gusti Allah digentraan, ”Maneh di mana?”
10Walonna, ”Ku abdi kakuping Anjeun aya di taman. Abdi nyumput margi ngaraos gimir rehna taranjang.”
11Allah mariksa, ”Nyaho ti saha yen ditaranjang? Na maneh ngadahar buah anu ku Kami dilarang?”
12Walonna, ”Sumuhun, dipaparin ti awewe paparin ti Anjeun tea.”
13 Gusti Allah mariksa ka awewe, ”Naha maneh mana kitu?”
Ari walonna, ”Neda eta buah teh margi ditipu ku oray.”
Allah nibankeun hukuman
14Ti dinya Gusti Allah nimbalan ka eta oray, ”Eta kalakuan maneh kudu dihukum. Ti antara sasatoan, ngan maneh nu ku Kami rek disapa. Ti semet ieu maneh baris ngengsod ku beuteung maneh sarta saumur-umur bakal ngahakan kekebul. 15Maneh jeung eta awewe baris silih pikaceuceub. Bangsa manusa jeung bangsa oray baris mumusuhan sapapanjangna. Manusa baris ngaremukkeun hulu maneh, ari maneh mo weleh ngarah-ngarah rek macok keuneung manusa.”
16Ti dinya Mantenna nimbalan ka awewe tea, ”Kanyeri maneh ku Kami rek ditambahan sajeroning eukeur kakandungan, kitu keneh kanyeri dina waktu ngajuru. Sanajan kitu maneh mo weleh cumantel ka salaki, sanajan kudu tetep kumawula ka dinya.”
17Timbalana-Na ka lalaki, ”Maneh geus kabawakeun ku pamajikan ngadahar buah anu ku Kami dilarang. Ku sabab eta, ieu bumi baris keuna ku panyapa. Mun hayang kaala hasilna geusan dahareun maneh sacukupna, maneh saumur-umur kudu digawe tisusut-tidungdung. 18Sabab tanah teh baris ngabijilkeun jujukutan, hama jeung bangsa cucuk, nepi ka maneh kapaksa kudu ngadaharan tutuwuhan leuweung. 19Maneh kudu luut-leet kesang heula sangkan bumi bisa mere hasil. Kitu bae sapapanjangna, nepi ka maneh mulang deui kana taneuh, asal maneh tea. Ku sabab maneh dijieun teh tina taneuh, nya kudu balik deui ngajadi taneuh.”
20Ku Adam, bojona dijenenganan Hawa, tegesna indung sakabeh kaom manusa. 21Aranjeunna ku Gusti Allah dipangdamelkeun anggoan tina kulit sato, sina diaranggo.
Adam jeung Hawa diusir ti jero taman
22Geus kitu Gusti Allah ngandika, ”Ayeuna manusa teh geus nyaho ka nu goreng jeung ka nu hade, teu beda ti urang. Ku sabab eta teu meunang deui ngadahar buah tina tangkal kahirupan, bisi harirup sapapanjangna.” 23Tuluy manusa teh ku Gusti Allah diusir kaluar ti Taman Eden, sangkan ngusahakeun tanah nu jadi asal wiwitanana. 24Di beulah wetan eta taman, di hareupeun panto asup, Mantenna nempatkeun sababaraha mukarabin, kalayan make pedang hurung muter nguwak-ngawik ka unggal jihat, megatan sing saha anu rek ngadeukeutan kana tangkal kahirupan.
Επιλέχθηκαν προς το παρόν:
KAJADIAN 3: LAISUN
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
@LAI 1991