Mataos 9
9
Yesʉs lé etiʼ mbʉmbʉʼ
(Markus 2.1-12; Lʉkas 5.17-26)
1Yesʉs ntɔʼ kable é byɛl, ze bâʼle to nkana ye. 2Abɛa nɛʼɛ, bé ze pyal nye e mbʉmbʉʼ, wé ndɨ mbwamle é tɔɔ. Jɔʼ Yesʉs a bee mpʉ bé a jyɛʼ taa buʼo yɔɔ boo nye e, nye e mbʉmbʉʼ ó: «Mwan wam, tʉmɨ nyʉl! Bɨbaa bɨ ebebe byo, bi pɛʼɔ!»
3No ó bʉʉ oyeʼle o motie bé a ze lɛɛ é mɨleme myɔɔ ó: «Mʉr nwa, nye ekʉ pyeh yɛɛ Zyɛm!» 4Mpʉ Yesʉs a be si dweʼe bɨjwɨʼ bé a be e bye é mɨmo si ɨ, no ó nye a ze dî e be ó: «Ebe yé bɨn ndɨ e bɨbebebebe mɨpɛhla mɨnɨ é mɨleme min ɨ? 5Yé ndɨ é kunbo lé esa? Zê yé é kunbo ó, go lɛŋɨ mʉr ó: “Bɨbaa bɨ ebebe byo, bi pɛʼɔ” ɛ? Zê yé é kunbo ó, go lɛŋɨ nye ó: “Mʉŋa si, laŋa” ɛ? 6Sa gwar, me muno ze lɛʼle bɨn dweʼle ó, Mwan mo Mʉr ó ndɨ e nkul mojwɨ̀ʼa é si nwaʼ é l'efu ó, nye pɛʼɛ bʉr bɨbaa Zyɛm lé eniʼe é lɔb mɨsyem myɔɔ ɛ.» Nye ntɔʼ ze lɛɛ e mbʉmbʉʼ ó: «Me lɛɛ e go ó: Mʉŋa. Nkɛŋɨ tɔɔ go. Go toʼ kwar go.»
7Mʉr nɨ nteme ntɔʼ mʉa si, ze to kwar we! 8Jɔʼ ntuntuma bʉr, yé a bee syɛɛla yaa ɛ, yé ze bil ekɛn, ntɔʼ dwiibɨ Zyɛm, ebe, nye a be ó si bana dwe bʉr mbi nkul mojwɨ̀ʼa waa.
Yesʉs lé ejebe Mataos
(Markus 2.13-17; Lʉkas 5.27-32)
9Yesʉs, nye osi duho é gumo yaa, nye mu lé elaa nɛʼɛ, nye ka bee ó, nuu mʉr a be die Mataos ɨ. Nye a kœb nye ó, ndindil é gumo nye a dɨ nʉa tœa ɛ. Yesʉs, nye e nye ó: «Duʼo me.» Nye ntɔʼ mʉa si, ntɔʼ taare lé edu nye.
10Jɔʼ bé a be lé ede é mbɛr mo Mataos ɨ, buobuo onwɨa o tœa ofih, le bʉʉ bʉr ofih bé a be é bul jwɨ̂ʼlɨ e mɨsyem ɨ, bé a si pyal, ze di si nteme lé ede, bé e boo nɔɔ, e l'ompʉn mo Yesʉs. 11Mpʉ oFarizyɛŋ, bé a bee sa yaa ɛ, bé ze dî e l'ompʉn be ó: «Ebe yé yeʼle win lé emɛʼle lé epuhba mobo bé e l'onwɨa o tœa ndwe e bʉr o ndɨ é bul jwɨ̂ʼlɨ e mɨsyem ɨ?»
12Yesʉs ze joʼo tia waa. Nye ntɔʼ lɛɛ e be ó: «Mɨnjɨh, myé ajɨ ejʉmba boo dɔbra. Mɨsyoblʉ myé ome ó lé ejɨ dʉm. 13Toʼ, to jwɨʼ ga sa Kalara Zyɛm ndɨ elɛɛ ɛ. Yé ó tila ó: “Me egwɨm ó, bɨn lɛʼla bʉr ncwɨncwɨa, abe ó, bɨn dweʼ me motwina.”» Yesʉs ze ko tɨʼ ó: «Ebe, me a baaze jebe ocɨcyel o bʉr. Me a ze jebe ó osyɛl o mɨsyem.»
Eti mode
(Markus 2.18-22; Lʉkas 5.33-39)
14Ompʉn mo Yʉanes ze dihle fum Yesʉs a be e. Bé ze dî e nye ó: «Ebe yé bɨh e l'oFarizyɛŋ lé eti mode, ompʉn bo bɛɛ l'ati mode ɛ?» 15Yesʉs, nye e be ó: «Jɔʼ mbœm mʉma lé ecyel zɔɔ ɛ, zê bɨn bé lé ejwɨʼ ó, ofo mo mbœm mʉma, bé óbɛm bʉ modwe, nye dina tɨʼ é duò zɔɔ ɛ? Tɨtoʼo! Yé ópyal jɔʼ ndɨ ó, mbœm mʉma óze pɛʼɔ é sama yɔɔ ɛ. Bé óti mode é jɔʼ yaa. 16Peh kan edwan l'apa dubɔ é modibe, l'apa kʉʼra ɛ, yé abe lé elarɔ é l'egʉa e mbor kan. ǃƗ mʉr si lar we é l'egʉa nɛʼɛ, é jɔʼ kan waa, wé ójwɨ̀ɔ ɛ, egʉa lé a larɔ e peh kan edwan yaa ɛ, lé óbâʼle kʉ bwaʼ ó bwaʼa, laa bim lé a taare be e. 17No nteme ó, bé abe lé elwan modwan monwoʼ é mɨnjʉ̌m bɨntaʼ ndɨ mɨsɛa e bɨkʉr bɨ otir ɨ. ǃBé si sa no nɛʼɛ, é jɔʼ monwoʼ maa, mé ógubla ɛ, mɨnjʉ̌m bɨntaʼ byaa, byé ódɨ tʉl, monwoʼ swɨɨ si, bɨntaʼ dwè ntuʼ. Bé elwan modwan monwoʼ ó, é bɨntaʼ ndɨ modwan ɨ. É jɔʼ yaa ó monwoʼ le bɨntaʼ, byé ódi mbɨmbɨa ɛ.»
Yesʉs lé etiʼ mwan mo Yarwis
(Markus 5.21-43; Lʉkas 8.40-56)
18Yesʉs dina lé elwib nɛʼɛ, nuu tamamʉr é kul oYʉden ze pyal, ntɔʼ bɨʼ mpom we si é mih me. Nye e nye ó: «Sile wam, wi dime mih é banana. Dam be no, ncʉʼ ga. Go toʼ, to kɛl nye mbo é nyʉl, nye nkʉʼ pàh.» 19Yesʉs ntɔʼ mʉa si, du nye, bé e l'ompʉn be.
20Bé mu zi e zi nɛʼɛ, nuu mʉma a be syoblʉ, motié lé esolo-solo nye é nyʉl, nye osi baran e l'esyɛb laa tɔɔ mɨmbu ewʉm e mɨmba ɛ, ntɔʼ pyal Yesʉs pie koo, ze dihle kunokuno e nye, cen mbo, kuna e mozeʼle mo kan we, 21ebe, nye a be ó lé ejwɨʼ é leme we ó: «ǃMe si kuna kuna e kan we nɛʼɛ, me bana kʉ tiʼe!» 22Yesʉs ze dwɛʼ pihe, bee mʉma waa. Nye e nye ó: «Mwan wam, tʉmɨ nyʉl! Buʼo yo, yi tiʼ go.» Taare é jɔʼ gwar yaa, mʉma waa ntɔʼ tiʼe.
23Jɔʼ Yesʉs a ze pyal é mbɛr mo tamamʉr é kul oYʉden ɨ, nye a kœb ó, olwɨɨ o mɨndie, e ntuntuma bʉr. Tɨʼ kʉ be é leŋe-leŋe. 24Yesʉs ze lɛɛ e be ó: «Pʉʼa ga wâ, ebe, esehe lɨ, lé adwè. Lé ó, é dwo.» Bé ze dwo nye é cacaca lé esoŋlo nye. 25Jɔʼ bé a be, bé mu si pyɛl ntuntuma bʉr kʉl ɨ, Yesʉs ntɔʼ ni mbɛr waa, mɛr ma mʉma waa é mbo, nye ntɔʼ mʉa si! 26Lɔɔ waa ze jala nkɔra yaa yiyɛh.
Yesʉs lé etiʼ ontim oba
27Jɔʼ Yesʉs a be lé emʉa ɨ gumo yaa, nye mu lé eto nɛʼɛ, ontim oba ze du nye, le ebahlɔ onkœme. Bé ó: «Mwan mo David ɔɔ! Jwɨʼɨ bɨh nkoo ɔɔ!»
28No ó, é jɔʼ Yesʉs a ni é mbɛr tʉŋlʉ ɨ, ontim baa ze dihle fum nye a be e. Yesʉs, nye e be ó: «Zê bɨn bé lé ebuʼla ó, me ó e nkul esa sa bɨn lé egwɨm ɨ?» Bé ntɔʼ bɨha e nye ó: «Eee, Da, go e nkul ekʉ sa!» 29No ó Yesʉs a ze kuna e be é mih. Nye e be ó: «Yé syɛŋɨ bɨn mpʉ buʼo yin ndɨ ɨ!» 30Mih mɔɔ ntɔʼ taare lé ebee! Yesʉs ze cyel be mpene, adwo ba ó: «Anyamle lɛɛ ga mʉr lɔɔ wi.» 31Dam be no, pyala bé a pyal kʉl ɨ, bé ntɔʼ to le emyɛʼ lɔɔ waa é lal waa wiwɛh.
Yesʉs lé etiʼ mʉr a be gʉ́ʼ ɨ
(Lʉkas 11.14-15)
32Jɔʼ bé e boo Yesʉs, bé a be, bé mu lé emʉa ɛ, bʉr ntɔʼ ze e nuu mʉr boo nye. Mʉr waa a si sia e l'eleme, eleme laa lé esa ó nye diʼe gʉ́ʼ. 33Pie Yesʉs a kʉ dwih eleme laa, mʉr a taare be gʉ́ʼ ɨ, ntɔʼ taare lé elwib. Ntuntuma bʉr yaa, yé ntɔʼ jehe lɔb waa mɨnʉm mɨmbeʼ, le elɛɛla ó: «Ebee bɨna lé ebee ga mbi wiʼ wâʼ é lal Ɨzraɛl ɨ, lé ó lɨ!» 34Sa gwar, oFarizyɛŋ bɛɛ, bé a be ó lé ekʉ boʼlo. Bé ó: «Nye e nkul edwih bʉr moleme monɨ ó, dumo e Njwɨɨ moleme!»
35Yesʉs ze to le etiʼbe bɨnkana e bɨnkana byɛh, e mokwar e mokwar mɛh, lé eto le eyeʼle bʉr é mompah mɨnjwɨʼla mɔɔ, le elɛɛ Mbɨambɨa Lɔɔ lé etiibe e jwɨ̀ʼa mo Da ɛ. Nye a be nteme ó lé etiʼ bʉr o b'a be e mosyɛb mɨmbi mimyɛh le bɨjyɛm mɨmbi mimyɛh ɛ. 36Ebee nye a bee mpampaʼ bʉr ɨ, leme we kʉ ze jwɨʼ be nkoo, ebe, bé a be ó si bul ntɨʼɔ, monyʉl si cyɛʼ. Bé a be ó mpʉ bɨntœme ndɨ abe e kobla ɛ. 37No ó nye a lɛɛ e l'ompʉn be ó: «Yé é buo mode ndɨ si tɨ é peme e. Sa gwar, bʉr o to é mɨngol ɨ, bé abuo. 38No ó, saʼ ga Mʉr peme mɨnjwɨʼla ó, nye loma osyɛl o mosa é buobuo lé eto é mɨngol é peme ye.»
Επιλέχθηκαν προς το παρόν:
Mataos 9: ozmBad
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2002, Wycliffe Bible Translators, Inc. All rights reserved.