Mataos 8
8
Yesʉs lé etiʼ zɨzam
(Markus 1.40-45; Lʉkas 5.12-16)
1Yesʉs ze fulo é l'ecwɨʼ, mpampaʼ bʉr lé edu nye. 2No ó, nuu mʉr a dihle gumo Yesʉs a be e, zam é nyʉl é korodo. Nye ze bɨʼ mpom we si é mih me. Nye e nye ó: «Da, ǃgo si mɛʼle nɛʼɛ, go óbɛm pɛʼ me sa ndɨ elœʼ me é mih mo Zyɛm ɨ.» 3Yesʉs ntɔʼ syɛm mbo, ze kuna e nye. Nye e nye ó: «Mɨ kpɛl! Sa ndɨ elœʼ go é mih mo Zyɛm ɨ, yi pʉʼa go.» Cye e cye yaa, zam kʉ ze sie nye é nyʉl! 4Yesʉs ze lɛɛ e nye ó: «Anyamle lɛɛ mʉr mpʉ go tiʼe e. Sa gwar, toʼ boo opara. Toʼ, to lɛʼle be mpʉ nyʉl go mu ɨ. Go à dwe mɨndwɛa Moyiz a lɛɛ ó, go lɛʼla be, bé nkʉʼ pubo go e. Yé ósa ó, bʉr gʉŋa ó, gɨ tiʼe.»
Yesʉs lé etiʼ syɛl mosa
(Lʉkas 7.1-10)
5Jɔʼ Yesʉs a be si ni Kapernaʉm ɨ, nuu njwɨɨ nter bɨzima bɨ Rom ze dihle kunokuno e nye. Nye ntɔʼ jwɨʼla e nye ó, nye gulɨ nye. Nye e nye ó: 6«Da, syɛl mosa ndɨ me mpʉ mwan ɨ, nye ó ambɨa ja kaʼ mbɛr. Nye ó mbʉmbʉʼ; sa nɨ, yi ntaa nye é nkul.» 7Yesʉs ze lɛɛ e nye ó: «Me to ó tiʼ nye banana.» 8Njwɨɨ nter bɨzima waa, nye e Yesʉs ó: «Da, mbi bɨbla mʉr me ndɨ ɨ, yé ajala ó, go niʼe ɨ modwii mam. Lɛŋɨ njɨ ekan egwar, syɛl mosa wam tiʼa. 9Me mʉr tɨ, me ó e bʉr o ndɨ ejwɨ̀ʼ me e. Me nteme, me e bɨzima é mojwɨ̀ʼa mam. Me elɛɛ e yiʼ ó, yé toʼ, yé ntɔʼ to. Me e yʉʉ ó, yé ntaʼ, yiha ntɔʼ ze. Me eka lɛɛ e syɛl mosa wam ó: “Saʼ sa yiʼ”, nyɛɛ sa-sa saʼ.»
10Ejoʼo Yesʉs a joʼo mokan maa ɛ, nye kʉ ze jehe nye nʉm mbeʼ, ze dwibra, dwɛʼ bʉr o b'a du nye é koo pihe e. Nye ó: «Me elɛɛ bɨn cyecye ó nɛɛ: Ebee me lé ebee mʉr lé ekʉ jyɛʼ taa buʼo ye boo me e, lé ó lɨ. Abe e mʉr Ɨzraɛl ndɨ esa no. 11Me elɛɛ bɨn ó nɛɛ, bʉr é buobuo, bé ófwal, lé eduho nko dobo lé emʉa ɛ, le nko lé lé eja ɛ. Bé óni é jwɨ̀ʼa mo Da, ntɔʼ kœb bɨdia byɔɔ tɨ, gumo bé ódi si lé ede e, bé e boo Abraham, e Ɨzak ndwe e Yakɔb. 12To kœb ó, oYʉden, bʉr o b'a jala le edi é jwɨ̀ʼa yaa ɛ, bé ópɨmɔ é jwɨ̀ʼa yaa. Bé óbyɛʼɔ kʉl é l'edurʉ le ankom-nkom, fum byé ódɨ time le elwaare moje e.»
13Yesʉs ntɔʼ lɛɛ e njwɨɨ nter bɨzima waa ó: «Toʼ kwar go. Yé syɛŋɨ mpʉ buʼo yo lé ekpɛl ɨ.» É jɔʼ gwar yaa, syɛl mosa we ntɔʼ tiʼe!
Yesʉs lé etiʼ mɨsyoblʉ é buobuo
(Markus 1.29-34; Lʉkas 4.38-41)
14Pie tɨ, Yesʉs ze to mbɛr mo Pyɛr, to kœb ó, tǐ mʉma mo Pyɛr a be ó njaʼa si lé esyɛb, nyʉl lé eduo é bɨl-bɨl. 15Nye ze kuna e nye é mbo. Esyɛb laa ntɔʼ sie é kɛŋ! Mʉma nɨ ntɔʼ mʉa si, ze taare lé esea e be.
16É bii kʉʼ yaa, bʉr ntɔʼ ze e buobuo bʉr o b'a sia e moleme e. E lwib nʉm, Yesʉs ntɔʼ dwih bʉr moleme maa le etiʼ nteme mɨsyoblʉ mimyɛh. 17Yé a syɛɛlɨ no ó, lé edira lɔɔ Da a bɛa lɛɛ é nʉm mo ngwiha mɨlɔb we Ezayi ó: «Nye a si pɛʼ bɨjyɛm ga bina, pɛʼ bɨna ga mosyɛb é monyʉl.»
Mʉr lé ejala le edu Yesʉs ɨ
(Lʉkas 9.57-60)
18Ebee Yesʉs a bee ntuntuma bʉr lé ebʉmra nye é nka ɛ, nye ze lɛɛ ó, bé ntaŋa maŋ, to é l'ebʉm e maŋ e nkɔm-nkɛɛ. 19No ó nuu yeʼle motie a ze dihle gumo nye a be e. Nye e nye ó: «Yeʼle, me ódu go gumo yiyɛh go óto e.» 20Yesʉs ntɔʼ bɨha e nye ó: «Onyamosʉʼ, bé ó e mokul; bɨnɔn e mɔʼ. Sa gwar, Mwan mo Mʉr, nye abe e simsim gumo nye kɛlɨ lʉ.»
21No ó nuu mʉr a be nteme mpʉn we e, a ze lɛɛ e nye ó: «Da, paʼ kʉ bir me. Mɛm paʼ taare to dɨl sɔŋ wam.» 22Yesʉs ze bɨha e nye ó: «Duʼo me. Birɨ odwè, bé dɨlɨ mɨmuu myɔɔ.»
Yesʉs lé ebâm e nkuo
(Markus 4.35-41; Lʉkas 8.23-35)
23Yesʉs ntɔʼ kable é byɛl, ompʉn be, ze du nye. 24Abɛa nɛʼɛ, bwaʼbwaʼ nkuo ze kuulo é maŋ. Oboʼo o maŋ ze bere kaʼ kʉ, byɛl aka nyin. Tina, yé ó, Yesʉs é dwo é tuʼ. 25Ompʉn be, ze dihle fum nye a be e, ntɔʼ jɨmɔ nye é dwo. Bé e nye ó: «Da, tiʼɨ bɨh! Bɨh muno ze dwè ó yi!» 26É jɔʼ yaa ó nye a ze lɛɛ e be ó: «Ebe yé bɨn lé ejoʼo bʉa mpʉnʉ nɨ ɨ? A twaʼbe buʼo yin ɛ!» Nye ze mʉa si, bâm e nkuo le maŋ. Sa yiyɛh ze di é gʉʼʉʉ. 27Bʉr baa ze jehe nye mɨnʉm mɨmbeʼ, ntɔʼ dîŋɔ ó: «Wiʼ mbi mʉr, wé zé, ndɨ, nkuo e maŋ, bana sa nye mojoʼo wi?»
Yesʉs lé efo moleme
(Markus 5.1-20; Lʉkas 8.26-39)
28Jɔʼ Yesʉs a pyal é l'ebʉm e maŋ e nkɔm-nkɛɛ, é lal Gadarɛn ɨ, bʉr oba ze duho é mbaa mofoo, to bɔma e Yesʉs. Bé a be ó bʉr o b'a sia e moleme e, moleme mɔɔ, é bul feha. Bʉr, bé a baaka dihbe ecwɨɨ fum bé a be e. 29Bé ntɔʼ lɛɛ okʉkʉ ó: «Mwan mo Zyɛm, go esaa yé e bɨh wâ? Zê go lé eze kab bɨh bɨntɨʼa é jɔʼ etiʼ e mɨlɔb l'apa pyal ɨ?»
30Tɨʼ kunokuno e l'empàh e gumo yaa, bwaʼbwaʼ daa le onkʉ, lé a be ó lé ede. 31No ó moleme maa, mé a jwɨʼla e Yesʉs ó: «Yé be ó, go fo ó bɨh nɛʼɛ, cenɨ bɨh yɛɛ é daa le onkʉ lɨ.» 32No ó nye a lɛɛ e me ó: «Toʼ ga be.» Mé ntɔʼ mʉa é monyʉl mo bʉr oba baa, to niŋɔ é monyʉl mo onkʉ. Ka twɨra nɛʼɛ, daa le onkʉ laa ze buma e mɨkam, lé efulo ecwɨʼ. Ecwɨʼ laa, lé a be nteme ó akoo. «Mpululu», bɨbɛh ntɔʼ lʉŋa é maŋ, le esie lé edwè.
33Obɔʼlʉ be onkʉ bɛɛ, ze nkɔŋa e mɨkam, toŋɔ nkana, ze taŋle baa b'a be tɨʼ sa yiyɛh ndwe e bɨsa lé etiibe e bʉr o b'a sia e moleme e. 34No ó bʉr o nkana bɨbɛh, bé a ze tɨbla, to bɔma e Yesʉs. Jɔʼ bé a bee nye e, bé ze jwɨʼla e nye ó, nye pʉʼa é nkɔra yɔɔ, jaa to.
Επιλέχθηκαν προς το παρόν:
Mataos 8: ozmBad
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2002, Wycliffe Bible Translators, Inc. All rights reserved.