Markus 3
3
Tona nakoyo palena sabingga nipakabelo i Yesus ri eo penonto
Matius 12:9-14; Lukas 6:6-11
1Naupu sia i Yesus nesua vai ri banua petupu. Ri sia naria saito langgai nakoyo palena sabingga. 2Bara sako-ndua toFarisi ri sia nompariara pakabelo-belo ala rakitara i Yesus mompakabelo tona haitu ri eo penonto, ala mamala rapangadura. 3Nanguli i Yesus ka tona nakoyo palena haitu, <<Kaimo!>> 4Pade i nipekutanaNa toFarisi naria ri sia, <<Nangoseaka atura-atura agama nuapa nipaloga ka kita ri eo penonto, movia mabelo atau madaa? Mompakasalama tona atau mompatesi?>>
Tapi ira ledo nadota nesana. 5Jadi i Yesus neili nangganoto tona ri sia. Narau mpuu raraNa tapi nabuku muni raraNa nanggita ira nakaa gaga bagara. Ledo ntoto naasi matara nanggita tona nakoyo palena. Bo nanguli Ia ka tona haitu, <<Odomo palemu!>> Niodo ntona haitu mpuumo palena, bo nabelomo. 6Naupu haitu nesuvumo toFarisi lako ri banua petupu haitu bo hau nosimpotesa ante tona nosabingga ka Magau Herodes, mangelo dala mompatesi i Yesus.
I Yesus nompatuduki todea bo nompakabelo tona nadua
7I Yesus ante anaguruNa hau ri Rano Galilea. Nadea mpuu tona lako ri bagia Galilea nantuntuni ira. Nadea muni tona nakava lako ri bagia Yudea, 8lako ri Yerusalem, lako ri bagia Idumea, lako ri bagia sambote Binangga Yordan, bo lako ri ngata Tirus bo Sidon. Ira nakava nte i Yesus sabana niepera i Yesus novia kabaraka-kabaraka. 9Nadea mpuu tona nasiromu ri sia sampe i Yesus nombatudu ana-anaguruNa mompakasadia sangu sakaya ka Ia ala nee sampe Ia raposiupisira. 10Nadea mpuu tona nipakabeloNa bara ipia sampe pura-pura tona nadua nosimpago nompasimbuku mompakapara nte Ia ala ira mamala manggabe Ia. 11Tona nipesua nu seta, nggani-nggani nanggita i Yesus, kana nantaputu ira ri ngayoNa bo nongare-ngare, <<Komiumo Ana nu Alatala!>>
12Tapi i Yesus nombatagi ira, <<Nee mpuu ratesamiu isema Yaku!>>
I Yesus nompelisi sapulu randua anaguruNa
Matius 10:1-4; Lukas 6:12-16
13Naupu haitu nantendemo i Yesus hau ri bulu, pade nipokioNa isema-sema nipodotaNa mangoseaka Ia, bo hau mpuumo ira. 14Nakavapa ira, nipelisiNamo sapulu randua majadi suroNa ala ira momporoa Ia bo ratuduNa hau mompatolele Kareba Belo. 15Bo nidekeiNa kuasa ka ira mompopalai seta-seta.
16Hitumo sangara sapulu randua haitu:
i Simon anu nipoposangaNa i Petrus,
17i Yakobus
bo tueina i Yohanes, ana-ana i Zebedeus. Ira randua nidaeNa Boanerges, batuana <<Ana-ana nu guru kede>>.
18Naria muni i Andreas,
i Filipus,
i Bartolomeus,
i Matius,
i Tomas,
i Yakobus ana i Alfeus,
i Tadeus,
i Simon lako ri partei Zelot,
19bo i Yudas Iskariot anu mompobalu i Yesus.
Guru-guru agama nanguli i Yesus nompopalai seta ante kuasa Magau nu Seta
Matius 12:22-32; Lukas 11:14-23; 12:10
20Naupu sia i Yesus nanjili hau ri banua. Tapi nakava vai sanupa tona dea nasiromu, sampe Ia ante anaguruNa ledo nakapo nangande. 21Sampesuvu i Yesus nangepe anu nipoviaNa haitu bo nisarumakara nabayamo Ia. Jadi nakavamo ira mangala Ia.
22Nangulimo guru-guru agama nakava lako ri ngata Yerusalem ivei: <<Ia nipesua i Beelzebul, Magau nu Seta. Magau nu Seta haitumo nombadekei kuasa ka Ia nompopalai seta!>>
23Jadi i Yesus nombaronde todea haitu bo notesa porapa ka ira ivei: <<Berimba Magau nu Seta mompopalai setana mboto? 24Ane maria saito magau bo todeana bate-batena nosipobali, ledo masae mageromo kamagaua haitu. 25Bo ane tona sambanua ledo maria posintuvura bo aga mosipobali, ira sambanua haitu aga masimpotare. 26Ivesia muni ante Magau nu Seta. Ane Magau nu Seta mompopalai roana bo seta-setana mosipobali, natantumo kamagauana ledo ntoto maroso, aga magero.
27Ledo ria saitoa tona mamala mesua riara banua ntona naroso bo mangago mbara-mbarana ane tona naroso haitu ledo ratipungguna ntani ruru. Maliu haitu pade mamalamo isi banua raalasina. Ivesia muni Yaku namala nompopalai seta, sabana Yaku nokolu nombadagi Magau nu Seta. 28Pariaramo tesaKu hitu! Pura-pura dosa manusia bo tesa-tesa nesalai, mamala raampungi. 29Tapi isema-isema nombasalai Nosa Gasa, ledo raampungi. Sabana, pesalaina haitu mai dosa sampe ri kasae-saena.>> 30I Yesus nanguli ivesia sabana naria tona nanguli Ia nipesua nu seta tano mai, kuasaNa lako ri Nosa Gasa.
Tona nangoseaka dota nu Alatala nipakasimbayu ka tina bo sampesuvu i Yesus
Matius 12:46-50; Lukas 8:19-21
31Naupu haitu nakavamo tina i Yesus bo sampesuvu-sampesuvuNa. Ira nepopea ri savalikuna bo nitudura tona hau mombaronde i Yesus. 32Tempo haitu tona dea nonturo nantagui i Yesus. Niulikara Ia, <<Guru, naria tinaMiu bo sampesuvuMiu ri savalikuna. Nielora Komiu.>>
33Nesanamo i Yesus, <<Isema kakanana tinaKu bo sampesuvuKu?>> 34Pade nikanotoNa pura-pura toponturo ri sinjoriNa bo niuliNa, <<Komiumo hii tinaKu bo sampesuvu-sampesuvuKu! 35Apa isema-sema nangoseaka dota nu Alatala, iamo sampesuvuKu bo tinaKu.>>
Επιλέχθηκαν προς το παρόν:
Markus 3: TLEDOV
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2020, Wycliffe Bible Translators, Inc. All rights reserved.