Sơnròp Gơlik Gơs 21
21
Bơta deh Isak
1Yàng Jehôwa lòt còp Sara jat be jơnau Kơnràñ neh đơs, mơ lơh khai in jat be jơnau Kơnràñ neh ho. 2#Heb 11:11.Sara bun, deh dô nă kòn klau Abraham in tòm tŭ khai neh kra, tòm toh di tŭ Yàng Tom Trồ neh pơgon mơ khai.
3Abraham tơmoh sơnđan kòn klau Sara neh deh khai in la Isak. 4#Sơnròp 17:12; Broă 7:8.Mơ Abraham siat gơltau Isak kòn klau khai in tòm tŭ khai neh phàm ngai jat be jơnau Yàng Tom Trồ neh sồr. 5Tòm tŭ deh Isak, gen Abraham neh dô rhiang nam. 6Sara đơs lah: “Yàng Tom Trồ lơh añ in gơràn ñŏ,#21:6 nŏ: Do la gơtha sơnđan Isak dê (sền 17:17-19). jơh ală cau kơno rơp ñŏ bal mơ añ.” 7Mơ đơs tai lah: “Ñcau neh khin đơs mơ Abraham lah: Sara rơp ai kòn in pô ơ? Bơh añ neh deh dô nă kòn klau khai in tòm tŭ khai neh kra rau.”
Bơta bơtrơh Agar mơ Ismael
8Kòn dềt neh dờng gen lòi pô. Tòm ngai Isak lòi pô, Abraham yò dô bơta ñô sa dờng. 9Sara gŏ kòn Agar, cau dĭ Ejiptơ, neh deh Abraham in, dơñŏ tơnhial.#21:9 Rct: bơrcek, bơrsèl.#21:9 Sră bơh yau bơtơl: mơ kòn khai dê la Isak. Jơnau cih bơh sơnròp ò gơs ală jơnau do. 10#Gal 4:29-30.Gen khai đơs mơ Abraham lah: “Bơtrơh tĕ dĭ ùr mơ kòn khai dê. Bơh kòn klau dĭ ùr do ò geh gơnoar pơrdòn bal mơ kòn klau añ la Isak.” 11Jơnau do lơh nùs Abraham in moat ngan tài bơh kòn klau khai dê. 12#Rôm 9:7; Heb 11:18.Mơya Yàng Tom Trồ đơs mơ Abraham lah: “Mê bañ moat jrùng bơh kòn klau mơ dĭ ùr mê dê. Sara đơs be lơi, gen iat tĕ jơnau khai đơs, bơh tòm Isak rơp gơlik gơs jơi bơtiàn mê dê. 13Añ kung rơp lơh kòn klau dĭ ùr mê in gơlik gơs dô nơm làng bol, bơh khai kung bơh mê mơ lik.”
14Abraham guh bơh drim, ai piang lă mơ dà tòm nhồng gơltau, ai Agar in mơ ơn dê pơnì khai, mơ jào kòn klau khai in, gen jun khai lòt. Khai lik lòt lềng làng tòm ƀlàng bràs Beerseba. 15Tòm tŭ dà tòm nhồng gơltau neh jơh, khai ơn oh dềt hơđơm mƀur chi#21:15 Cil: ñhơm chi.#21:15 Gsc: kòn dềt ñìm. dềt ne, 16mơ khai lòt ngài ngài, mơ nggui pơgap dê dô bồng pañ mơ srào mơ đơs lah: “Mbe añ rgơi ơm sền kòn dềt chơt!” Khai nggui tòm toh tềng hơ̆ mơ ñìm rac.
17Yàng Tom Trồ kơno oh hơ̆ ñìm gen cau gơnrơh Yàng Tom Trồ dê bơh đang trồ hòi Agar mơ đơs lah: “Ơ Agar, ñchi gơlơh ai be gen taih? Bañ rngòt! Bơh Yàng Tom Trồ neh kơno jơnau kòn dềt bơh di tiah khai ơm. 18Ntào tĕ, yò kòn mơ ai tê kơnđu kơ̆ khai, bơh Añ rơp lơh khai in gơs dô nơm làng bol dờng.” 19Mơ Yàng Tom Trồ pò mat khai, khai gŏ dô nơm tơrlung dà, gen khai lòt bơ̆ bềng nhồng gơltau mơ ai kòn dềt in hùc. 20Yàng Tom Trồ ơm bal mơ cau kơnòm hơ̆, khai rhòi dờng, ơm tòm ƀlàng ngềt ngơt, mơ gơlik gơs cau jak pañ. 21Khai ơm tòm ƀlàng bràs Paran, mè khai lap bau khai in dô nă cau ơruh Ejiptơ.
Abraham ho bal mơ Abimelek tòm Beerseba
22 #
Sơnròp 26:26. Tòm tŭ hơ̆ bơtau Abimelek mơ Pikôl, cau gơnoar dờng at bồ ling khai dê, đơs mơ Abraham lah: “Yàng Tom Trồ ơm bal mơ mê tòm kòp broă mê lơh. 23Behơ̆ tŭ do, ai tĕ sơnđan Yàng Tom Trồ mơ ho bal lah mê rơp ò gàt añ, kòn añ mơ sau añ. Mơya mê rơp lơh niam mơ añ bal mơ lơgar mê ơm ing be añ neh lơh mê in.” 24Abraham đơs lah: “Añ ho nền.”
25Abraham yoam mơ bơtau Abimelek bơh dô nơm tơrlung dà mơ cau dĭ khai neh tòmpìt gơ. 26Gen bơtau Abimelek đơs lah: “Añ ò git cau lơh bơta hơ̆, mơ mê kung òhềt yal añ in git sơl, ngai do sồng añ git.” 27Mơ Abraham kup belàt mơ kơnrồ ai bơtau Abimelek in, gen bàr nă bol khai lơh bơta ho bal. 28Abraham ai bơh tòm mpồl poh nơm belàt dra mơ ơn is, 29gen bơtau Abimelek lùp lah: “Ñchi mê lơh ơn is poh nơm belàt dra behơ̆ taih?” 30Khai ho lah: “Dan bơtau dòp poh nơm belàt dra do bơh tê añ, nàng lơh cơng tàng lah añ neh tò tơrlung do.” 31Tài bơh hơ̆ cau sơnđan tiah hơ̆ la Beerseba,#21:31 Beerseba: Tòm jơnau Hebrơ, jơnau do gơs gơtha la “tơrlung dà srat să” hala “tơrlung dà khà poh”. bơh tềng hơ̆ bàr nă bol khai neh tòmho bal. 32Behơ̆ bàr nă bol khai tòmho bal tòm tiah Beerseba. Gen bơtau Abimelek mơ cau gơnoar dờng at bồ ling Pikôl ñă rê wơl hơ lơgar Philistin. 33Abraham tam dô đòm ơmil tòm tiah Beerseba, mơ tềng hơ̆ khai hòi dan di sơnđan Yàng Jehôwa la Yàng Tom Trồ gam sùm sùm. 34Abraham ơm ing jŏ ngai tòm lơgar Philistin.
Επιλέχθηκαν προς το παρόν:
Sơnròp Gơlik Gơs 21: KPM2018
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2018 United Bible Societies. All rights reserved.