Kejadian 22
22
Allah manyuruh Ibrahim mangurbanakan anak sidin jadi kurban banaman.
22:1-19
1Imbah samuaan kajadian nang itu, Allah mauji kaimanan Ibrahim.
“Ui, Ibrahim” ujar Allah baucap.
“Pun” sahut Ibrahim.
2“Bawa Ishak, anak ikam nang saikungannya, nang ikam sayangi tu, lalu tulak ja ka banua Moria. Di situ di salah satu gunung nang pacang Kutuduhakan lawan ikam, parsambahakan inya manjadi kurban banaman gasan Aku” ujar Allah manjalasakan.
3Isuknya, imbah bangun guring, baisukan banar, Ibrahim mambalah kayu gasan mambanam kurban. Imbah dijaratnya kayu tadi, diandaknya di lapak kaladainya, wan dikiaunya dua ikung pambantunya wan Ishak, anaknya. Lalu tulakan ai bubuhannya ka wadah nang dipadahakan Allah lawan sidin. 4Imbah talu hari bajalan, gunung nang itu sudah talihat ulih Ibrahim matan jauh.
5“Hadangi di sini haja nah bubuhan ikam lawan kaladai tu nah. Aku wan anakku handak tulak ka sana, kami handak sambahyang, imbah itu kami babulik pulang ka sini” ujar Ibrahim baucap lawan dua ikung pambantunya.
6Diambil sidin kayu gasan mambanam kurban tu, lalu disuruh sidin Ishak manyahan kayu tu. Sadangkan sidin saurang mambawa bara api wan lading. Lalu tulakan ai kaduduannya bajalan baimbai.
7“Bah” ujar Ishak baucap lawan abahnya.
“Kanapa nak?” sahut sidin.
“Bara api wan kayu sudah ada kita bawa, tagal anak domba nang cagar dibanam gasan kurban, mana inya bah?” ujar Ishak batakun.
8“Allah, nak ai, nang pacangan manyadiakan anak domba tu, nang jadi kurban banaman gasan Inya” sahut sidin.
Lalu bajalan pulang kaduduannya baimbai.
9Imbah sampai ka wadah nang dipadahakan Allah tu, Ibrahim manyusun batu maulah mija gasan mambanam kurban. Disusunnya kayu gasan mambanam, dijaratnya Ishak anaknya tu, lalu diandaknya di atas kayu tu nang ada di atas mija batu tu. 10Imbah itu, sidin maambil lading. Pas handak manyumbalih anaknya, 11bakakajutan tadangar suara malaikat Allah di langit.
“Him, Him, Ibrahim!” ujar malaikat Allah mangiau.
“Pun” sahut sidin.
12“Jangan dimatiꞌi anak ikam tu, wan jangan diapa-apai inya, sualnya wayah ini Allah sudah tahu amun ikam tu hurmat wan maasi lawan parintah-Nya. Lawan pulang, ikam langsung hakun mamparsambahakan anak ikam nang saikungannya tu gasan Allah” ujar malaikat Allah baucap.
13Ibrahim manulih lalu talihat saikung domba laki di balakang sidin nang tanduknya takait di padang sabat. Diambil sidin domba tu lalu dikurbanakannya gasan mahurupi anaknya. Lalu domba tu dibanamnya.
14Lantaran itu, wadah nang itu dingarani sidin, “Allah manyadiaakan”. Lantaran itu pulang, sampai wayah ini urang-urang biasa baucap, “Di atas gunung pacang disadiaakan Allah.”
15Lalu malaikat Allah baucap pulang matan langit wan Ibrahim,
16“Aku, Him ai, basumpah demi ngaranKu saurang. Lantaran ikam sudah balaku nang kaya itu, wan langsung hakun mamparsambahakan anak ikam nang saikungannya gasan Aku, 17maka Aku pacangan bujur-bujur mambarkahi ikam. Juriat ikam pacangan Kuulah banyak banar nang kaya bintang di langit wan karangan di pantai. Juriat ikam tu pacangan manguasai kuta-kuta musuhnya. 18Malalui juriat ikam, samunyaan urang-urang di bumi pacangan Ku-barkahi lantaran ikam maasi lawan parintah-Ku” ujar malaikat tadi manyampaiakan Pirman Allah lawan Ibrahim.
19Babulik ai Ibrahim wan anaknya mandapati kadua pambantunya lalu bubuhannya tulakan baimbai ka Kota Bersyeba. Lalu, Ibrahim salajur bagana di situ. 2021222324
Επιλέχθηκαν προς το παρόν:
Kejadian 22: BJN
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© Pioneer Bible Translators