MAK 8
8
I Jisas mo vangani na sinobu teri vagavesi
1Lo tarogi ngehi a sinobu lawua ram sone bubugi taligu. Ko hatie hinaga ve rai geni, i Jisas mo warera ira nona rorongtagi, mo veve lawera vena: 2“Nam hahagavi huri na sinobu ngaha, a vevenagi rau toga meieu beno huri na rani gaitolu, ko siserigi ngaha hatie hinaga ve rain geni. 3Tare ve nain horara rain mule mwaruruhi lo tanora, rain mate huri gara lo turegi, huri lavasigi rau vonai vagahao.” 4Ira nona rorongtagi ram huie vena, “?Dain haqe na hinaga hi logo u tatarise huri na sinobu ngaha lo vanue vurogi?” 5Ko mo huire vena, “A bereti gaivihe mei gimiu?” Ko ram veve vena, “Gaibitu.” 6Ko nge mo hora na sinobu ve ran toga hivo lo tano. Siu nge mo lai na bereti gaibitu, mo vevegareagi God hurire, mo vise vurivurire, mo laire lawe na nona rorongtagi huri ve ran betera lawe na sinobu; ko ram vai mwerehi. 7Ko a ige wuwerigi gaivihe vage meire. I Jisas mo vevegarea hurire, ko mo veve lawe ra rorongtagi ve ran betera vage. 8Ngere doluegi rau geni rau guqe ingere u tatarise teri vagavesi. 9Siu ira rorongtagi rau vile bulutegi na maututugi, a gete gaibitu rau horo. I Jisas mo hora mulegi na sinobu, 10ko siserigi mo kalo lo aka meire nona rorongtagi ko ram vano lo loloi venue Dalmanuta.
Ira Varise ram navu huri na vaigivui
11Ira Varise lavasigi ram vonai ram tauvuigi ram vuigarogi mei Jisas. Ram tarani ve ran sine lehe, siu ram navu ve vin haharagi na vaigivui nge hi mo vanai dein God. 12I Jisas mo mabu horagi lolo lolona, mo veve vena, “?Huri havagineu a sinobu ta hibagataha ram hikesi na gigilegi? A hogo, nam veve lawe gimiu, nge hatie gigilegi ve vin haharagi lawe na sinobu ta hibagataha.” 13Nge mo sireginire, mo kalo lo aka taligu, mo vano utu lo tavalui wei.
A isi nora Varise ko a noi Herot
14Ira rorongtagi rau geluvegi ve rain hako tea hinaga, nge rau hakovi na bereti gatagale hogosie meire lo aka. 15I Jisas mo veve na leo matagute lawera vena, “Nein leo huri na isi nora Varise ko a isi noi Herot.” 16Ingere ram veve veveginire vena: “Ingeie mo veve mwere ngaha a vevenagi a bereti hatie mei gide.” 17I Jisas u ilo huri na hava gineu ingere ram veve, ko nge mo huire vena: “?Huri hava gineu igimiu nem veve vevegi gimiu a vevenagi a bereti hatie mei gimiu? ?Gimiu ne he ilo vurugegi tea sige ne he rong hogo te tau? ?A domimiu mo lulu? 18A matamiu lumiu, ne he leo tea? ?A qeromiu lumiu, ne he rongo tea? ?Gimiu ne he lado haqe tea 19lune nau vise vurivuri na bereti gailime huri na sinobu teri vagalime? ?A gete gaivihe rau horo gena maututui bereti neu vile?” Ram duvi lawea vena, “Hangavulu domwagi gairue.” 20“?Ko lune nau vise vurivuri na bereti gaibitu huri na sinobu teri vagavesi, a gete gaivihe rau horo gena maututui bereti neu vile?” Ram duvi vena, “Gaibitu.” 21Ko nge mo veve lawera vena, “?Ne he ilo vurugegi tea mosigei?”
I Jisas mo vaileleogi na matadodo a Betsaeda
22Ko ingere ram vonai a Betsaeda, ko a tangaloi lavasigi ram lai na tangaloi matadodo vonai lobei Jisas, ram tiehie ve vin tango lune. 23I Jisas mo dulei na matadodo, mo laie mo vano dena togagi venue. Nge mo lodo siu lo matana vunu, nge mo bei teu na limana lune, mo huie vena, “?Gom lehi na hava gineu tea?” 24A matadodo mo dada mo veve vena, “Nam lehi na tangaloi, nge ram dali lategi mwere na gai.” 25I Jisas mo tango vano lo matana taligu. Ko a tangaloi hi mo rada mo leo vurugegi, a matana mo leleo taligu, ko nge mo lehi na gineu doluegi. 26I Jisas mo hora muleginie lo valena, mo veve vena, “Goin mese vano taligu lolo togagi venue hi.?”
I Bita mo serelue na nona ladohogo
27Siu i Jisas meire nona rorongtagi ram vano utu lo togagi venue u sao kakarani lobei Sisaria Vilibae. Ko lune ingere ram dige mo vano, i Jisas mo huire vena “?A tangaloi ram veve ve ineu ihine?” 28Ngere ram duvi goroe vena. “Lavasigi ram veve ve iniko i Jon Garuhigogona, ko lavasigi rave iniko i Elaeja, ko lavasigi rave iniko gatagale denire tangaloi ligoligogi.” 29Ko nge mo huire vena, “?Nge igimiu, nem veve ve ineu ihine?” I Bita mo duvi goroe vena, “Iniko i Kraes.” 30Ko i Jisas mo veve lawera vena, “Nein mese veve lawe hine tea hurieu.”
I Jisas mo veve huri na nona mateana ko a nona maragaana taligu
31Ko i Jisas mo tauvuigi mo huhui na nona rorongtagi ve mo veve vena, Netui Tangaloi vin rongogagarasi garagara, ko ve ira tamaragai ko ira muei rugurugu ko ira huhui talo Leo Hora noi Mosis rain tuli vohoginie ko rain vei vagamatea, ko ve nge vin maraga taligu lo tagui rani gaitolu. 32Nge mo veve matamwasaragi lawera. Siu i Bita mo lai beraginie, mo tauvuigi mo gato goroe. 33Nge i Jisas mo tu dori, mo lehi na nona rorongtagi, mo gato goro Bita, mo veve vena: “Goin vano denieu satan! A nomu ladolado he vanai tea dein God, nge mo vanai dena tangaloi hogosie.”
Irahine ram tarani ve rain huri Kraes rain vei na hava gineu
34Ko i Jisas mo ware na sinobu meire nona rorongtagi vonai lobena, ko mo veve lawera vena: “Tare ve ihine mo tarani vena vanai na hurieu, ingeie vin geluveginie sibona ko vin weli na nona gai saroutu, vin hurieu. 35Huri ihine tea mo tarani vena hako bibi na mwasoana vin vei salaginie, ko ihine mo vagasalagi na mwasoana hurieu ko huri na Roro Garea vin hako bibie. 36?Huri a tangaloi vin lei na hava gineu u garea tare ve vin qoragi na ureure doluegi nge mo vagasalagi na mwasoana? ?Hatie vohogi? 37?Hatie gineuhigi ve vin bete vena vai mule na mwasoana taligu? 38A sinobu ram toga hi bagataha, ram toga lolo galegaleasi ko a taroi gineu esi. Tare ve ihine tea mo maemae meieu ko a noku leohuhui, i netui Tangaloi vin maemae meie lune ingeie vin vanai mena varavarai Tamana meire engsel gogona.”
Επιλέχθηκαν προς το παρόν:
MAK 8: HNT
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Bible Society of the South Pacific, 2013