MAK 6
6
A vanue Nasaret mo taturegi huri Jisas
1I Jisas mo mwalue dena ute ngaha ko mo vano taligu sulo vanuana, ko ira nona rorongtagi ram hurie. 2Lo Rani Mangaana mo tauvuigi mo huhui lolo valei soneana. A tangaloi sao ram rongoe ram awogi ram veve vena, “?Mo lai na gineu ingere ngaha logo? ?Hava mataisao ngaha u bete lawea? ?Ingeie mo vai na vaigivui mwerehilogo? 3?Wa hatie ve ingeie hi tangaloi mwagu, inetui Meri, ko i tuei Jemis, Joses, Judas ko Saemon? ?Wa hatie ve ira haqena ram toga vage hano?” Ko ram rahaginie. 4I Jisas mo veve lawera vena, “A tangaloi ligoligogi, a tangaloi rau lado mavaginie vataha ute, hogosie lo vanua a sinobu ira havana, rahe lado mavaginie tea.” 5Ingeie he vai lei tea ve vin vei na vaigivui teri aiehi, nge hogosie u tango gina limana lo sinobu te gai vihe ram sege ko mo vagamwasoire. 6Nge mo garigi garagara, huri a sinobu hatie nora ladohogo.
I Jisas mo hora na nona rorongtagi hangavulu domwagi gairue
I Jisas mo dige dali na togagi venue mo huhuire. 7Ingeie mo ware bulutegi na nona rorongtagi hangavulu domwagi gairue, mo tauvuigi mo horara gairue gesegi. Ko mo bete na managi lawera goro na vui esi teri, 8Ko mo tau na leo lawera mo veve vena, “Lune nein vano nein mese hakovi na gineu mei gimiu; nein mese lai na hinaga, a tanga, ko a homu; nge nein lei na nomiu gaitigo hogosie. 9Nein seru na nomiu sandel, nge nein mese wali na luqe gairue.” 10Ingeie mo “lune igimiu nem dadari lo togagi venue ko ram lai vurugegi gimiu sulolo vale, nein toga tamwere lolo vale hi vin dadari nein siregi na vanue hi,” veve vage lawera vena, “Lune nem dadari lo qatui venue, nein toga lobena tangaloi ngerehi ram lai vurugegi gimiu vin dadari lune hi nein mule taligu.
11Tare ve nein dadari lo qatui venue rahe lai vurugegi gimiu tea, sige ra he rongo huri gimiu tea, siu nein tudori dena vanue ngehi, nein heheragi vohogi na qie dena karumiu, a gigilegi lawera.” 12Siu ram mwalue vano ram toretore huri ve a sinobu rain tudori dena nora galegaleasi. 13Rau vuro lue na vui esi u sao, ko ram vureire ira segesege u sao gena nubugi ko mo vagamwasoire.
A mateana noi Jon Garuhigogona
14Lune i Herot a Ratahigi u rongo na gineu ingere ngaha, a vevenegi i Jisas a rorona mo vano vataha na ute. A sinobu lavasigi ram veve vena, “!Ingeie i Jon Garuhigogona u mwaso taligu! Giniehi mo vai na vaigivui ingere ngaha.” 15Lavasigi ram veve vena, “Ingeie i Elaeja.” Ko lavasigi ram veve vena, ingeie a tangaloi ligoligogi rarai, u mwere na tangaloi ligoligogi gatagale tatuei. 16Lune i Herot mo rongoe mo veve vena, “Ngehi i Jon Garuhigogona, hi nau tei utu na qatune, u maraga taligu!” 17Herot sibona u teu na leo huri ram wiribibi Jon, ko u veve ram vauhie ko ram taue lolo valei veuveu. I Herot u veie ngaha, a vevenagi huri Herodias hi u legi meie, ngehi i gahorai Vilib i tuana. 18I Jon Garuhigogona mo veve tamwere lawe Herot vena, “He vovohoi tea huri ve gom lagi mei gahorai tuemu!” 19Giniehi, Herodias mo merogi Jon ko mo tarani vena wehe, nge he vai lei tea a vevenagi Herot. 20I Herot mo matagugi Jon a vevenagi nge u ilo ve i Jon a tangaloi garea ko u gogona; giniehi, nge mo koko goroe. Lune nge mo rongoe mo laqa, ingeie mo tarani vena rorongtaginie, ingeie mo tatu lo nona leo vataha tarogi lune mo rorongtaginie.
21A taro u hogo garea lawe Herodias, huri a rani vorana noi Herot, lune u vei na hinaga lawua huri na tangaloi lalawua doluegi lolo kavman, a tangaloi lalawua lolo vuro, ko ira tomtomuegi lawe na sinobu ta kalili. 22Ko a taqalugu i netui Herodias mo vonai mo wetu, ko mo vai havuhevugi Herot, ko irahine hi ram gagani bubugi bulu. I ratahigi mo veve lawe na taqalugu hi vena, “Tare ve gom tarani na hava gineu, gon hui, nai bete lawego.” 23Mo haharigi mo vena, “Hava gineu tea goin nevu denieu nain bete lawego, tare ve a duvi noku tanoi ratahigi!” 24A taqalugu hi mo mwalue vano, mo hui retahine vena, “?Nain hui na hava gineu?” I retahine mo veve vena, “A qatui Jon Garuhigogona.” 25Ko siserigi a taqalugu hi mo tudori vano taligu lobei ratahigi, mo huie vena, “Nam tarani na qatui Jon Garuhigogona vena eno lolo laha tangaha ko siserigi hi.” 26A leo hi mo vai na ratahigi mo hahagavi, nge vin he leahi na waratau hi tea, a vevenagi ira hine hi rau gagani bulu rau rongoe. 27Siserigi a ratahigi mo hora na nona tangaloi vuro gatagale, mo tau na leo vena lai na qatui Jon. Ko a tangaloi vuro hi mo vano, mo tai utuhi na qatune lo vale vauveu, 28ko mo haloe mo vonai meie lolo laha, mo betea lawe na taqalugu hi, ko ingeie mo betea lawe retahine. 29Lune ira rorongtagi noi Jon rau rongoe, ram vonai ram lai na betune, ram taue lolo malanga vatu.
I Jisas mo vangani na tangaloi teri vagalime
30Ira gaihora noi Jisas ram mule taligu lobena, ram veve sere lawea huri na gineu doluegi hi rau vei ko rau huhui. 31A sinobu u sao rau vonai ram vano, siu i Jisas meire nona rorongtagi hatie mahogi lawera huri ve rain gagani. Ko i Jisas mo veve lawera vena, “Gide da vano lo mahoi ute gatagale gahe gide huri nein manga te mahogi qilodo.” 32Ko ram kalo sulolo aka, ram vano gahera lo mahoi ute hi mo eno qeroqero.
33Nge a sinobu ram lehire ram vano, ko ram ilo ve ingere ira hine. Ngere ram maraga dena vataha vanue, ram toa tomue lo tano, ram vano ram dadari lo ute ngehi i Jisas meire nona rorongtagi ram vano hurie. 34Lune i Jisas mo hage varea, mo lehi na sinobu u sao, mo hagavire, a vevenagi ingere ram mwere na sibsib hatie tangaloi huri ve na leo gorora. Ko mo tauvuigi mo huhuire huri na gineu sao.
35Lune a taro u qilodo vohogi, nge tangaha a ute qeroqero, ira nona rorongtagi ram vonai lobei Jisas ram veve vena, “Mo tauvuigi mo dodo, ko ta ngaha a mahoi ute. 36Gon hora mulegi na sinobu huri ve rain vano lategi lolo talu sige lo qatui venue ran voli gara hinaga sibora.”
37I Jisas mo duvi lawera vena, “Nen bete tea hinaga lawera ran gani.”
Ko ingere ram huie vena, “?Sige igamai gan vano gan voli tea hinaga hurire gena vatu teri vagarue ve da vanganire ginie?”
38I Jisas mo veve lawera vena, “A bereti gaivihe mei gimiu? Nen vano nen leo.”
Lune ram vano ram haqe vurugegi, ingere ram veve lawea vena, “A bereti gailime, ko a ige gairue.
39I Jisas mo hora na nona rorongtagi huri ve ran veve lawe na sinobu ve ran toga hivo lolo duvu qaroqaroga. 40Ko a sinobu ram toga hivo lo burigi, lavasigi vudolue, lavasigi ngavulu gailime. 41Siu i Jisas mo lai na bereti gailime ko a ige gairue, mo dada sueulu, mo vevegareagi God hurie. Siu mo vise vurivuri na bereti hi, mo laie lawe na nona rorongtagi huri ve ran betea lawe na sinobu, ko a ige gairue hi mo wahegi lawera doluegi. 42Ko ingere doluegi rau geni rau guqe. 43Siu a nona rorongtagi rau vile bulutegi na maututui bereti ko a ige, a gete hangavulu domwagi gairue rau horo. 44A tovoi mwera hogosie hi rau gagani ingere teri vagalime.
I Jisas mo dige lo ului wai
45Ko siserigi i Jisas mo hora na nona rorongtagi huri ve ran kalo lo aka ko ran vano tomue denie a Betsaeda, lune nge mo hora mulegi na sinobu. 46Lune mo tuletulegi lawera, siu mo hage lo vusi huri ve na tataro. 47Lune a ute mo revirevi, aka nge beno lolo livugei wai lawua hi, nge i Jisas ingeie. 48Ko ingeie mo lehi na nona rorongtagi ram ragagi na huire lo vohe, a vevenagi ingere ram hue sosori na langi, lategi kilogi gaitolu ko kilogi gaiono lolo robongi, i Jisas mo vonai lobera mo dige lo raui wei, ko ingeie u tarani ve vin dige liure. 49Lune ram lehie mo dige lo ului wai, ram lado ve ingeie a tamate, ko ram ngaragi siaga. 50Huri ingere doluegi ram lehe, ram matagu garagara. Nge siserigi i Jisas mo laqa meire mo veve vena, “Nen mese ladoasi! Ineu ngaha. Nen mese matagu!” 51Siu mo kalo meire sulo aka, ko a langi mo mautu. Ko ira rorongtagi ram garigi garagara, 52huri ingere rahe ilo vurugegi na domiana tea huri na leoi vaigivui hi tea, huri na bereti gai lime, a vevenagi a domire u vono.
I Jisas u vagamwasoi na segesege lo vanue Kenesaret
53Ingere rau vano utuhi na wai hi ram dadari lo vanue Kenesaret, ram vohogi bibi na aka. 54Lune ingere ram mwalue dena aka varea ko a sinobu aiehi ram leo hogosi Jisas hou. 55Ingere ram maraga ram toa ram vano vataha na mahomahogi lolo vanue hi ingere ram tauvuigi ram laire segesege lo niara vonai lawea lune ram rongo ve mo tino tahilogo. 56Ko vataha vanue i Jisas mo vano aie, lolo vanue sige lo qatui venue sige lolo talu, ram wali na segesege vonai lolo sara, ko ram navu denie ve ira segesege ran sikeli lei na gologoloi luqana; ko irahine ram sikelie rain mwaso.
Επιλέχθηκαν προς το παρόν:
MAK 6: HNT
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Bible Society of the South Pacific, 2013