Čơdơ̆ng Phŭn 4
4
Kain hăng Abel
1Ađam dŏ hăng Êwa, bơnai ñu. Ñu pi kian laih anŭn tơkeng rai Kain. Ñu laĭ: “Yua mơ̆ng tơlơi Yêhôwa djru, kâo hmâo tơkeng laih sa čô ană.” 2Ñu tơkeng dơ̆ng mơ̆n Abel, adơi kơ Kain. Abel jing pô wai triu, samơ̆ Kain jing pô mă bruă đang hmua.
3Tơdơi kơ anŭn ƀiă, Kain yua boh troh mơ̆ng đang hmua ñu kiăng pơyơr đĭ kơ Yêhôwa kar hăng sa gơnam pơyơr. 4Bơ kơ Abel pơyơr črăn hiam hloh amăng ană triu blŭng hlâo amăng khul triu ñu. Yêhôwa mơak hăng Abel laih anŭn hăng mơnơ̆ng ñu pơyơr,#Hêb 11:4. 5samơ̆ Ñu ƀu mơak ôh hăng Kain laih anŭn hăng mơnơ̆ng ngă yang Kain pơyơr. Yua kơ anŭn, Kain hil biă mă hăng kơtraŏ ƀô̆ mơta amăng tơlơi hil. 6Yêhôwa tơña Kain: “Yua hơgĕt ih hil? Yua hơgĕt ih kơtraŏ ƀô̆ mơta amăng tơlơi hil? 7Tơdah ih ngă tơlơi hiam, hyư̆m ngă ih ƀu dưi hmâo tơlơi tŭ ư ôh hă?#4:7 Dưi pơblang dơ̆ng mơ̆n: hyư̆m ngă ih ƀu či angak đĭ ƀô̆ mơta ih ôh hă. Samơ̆ tơdah ih ƀu ngă tơlơi hiam, tơlơi soh či dŏ krăp ƀơi bah amăng ih yơh, ñu mơhao ih biă mă; samơ̆ ih khŏm dưi hĭ hăng ñu.”
8Kain pơhiăp hăng Abel, adơi ñu.#4:8 Đơđa hră Ơi Adai Pơhiăp so đưm thim jơlan: Brơi ƀing ta nao pơ đang hmua bĕ. Tơdang dua gơñu hlăk dŏ amăng đang hmua, Kain blŭng nao pơ Abel laih anŭn pơdjai hĭ gơ̆.#Mat 23:35; Luk 11:51; I Yô 3:12. 9Yêhôwa tơña kơ Kain: “Abel, adơi ih pơpă lĕ?” Kain laĭ glaĭ: “Kâo ƀu thâo ôh. Kâo jing pô wai adơi kâo hă?” 10Yêhôwa tơña: “Hơgĕt tơlơi ih hmâo ngă laih? Săp pơhiăp kơ drah adơi ih mơ̆ng lŏn tơnah hmâo iâu đĭ truh pơ Kâo.#Hêb 12:24. 11Ră anai, tơlơi hơtơ̆m pah truh kơ ih, ih khŏm tơbiă đuaĭ mơ̆ng đang hmua anai, jing lŏn hmâo ha amăng bah hrip mă drah adơi ih hŏk yua mơ̆ng tơngan ih ngă. 12Tơdah ih jŭ pla, lŏn ƀu či mơboh rai hơgĕt gĕt kơ ih dơ̆ng tah. Ih či đuaĭ kơdŏp laih anŭn hyu rưng ƀơi lŏn tơnah.” 13Kain laĭ hăng Yêhôwa: “Tơlơi pơkơhmal anai jing prŏng hloh kơ tơlơi kâo dưi tŭ. 14Anai nê, hrơi anai Ih hmâo puh pơđuaĭ kâo mơ̆ng lŏn čar anai, pơdŏp kâo mơ̆ng ƀô̆ mơta Ih laih anŭn kâo đuaĭ kơdŏp, hyu rưng ƀơi lŏn tơnah; laih anŭn hlơi pô bưp kâo, gơñu či pơdjai hĭ kâo.” 15Yêhôwa laĭ: “Huaĭ ôh! Samơ̆ tơdah hlơi pô pơdjai ih, pô anŭn či mă tŭ tơlơi rŭ nua tơjuh wơ̆t lu hloh.” Yêhôwa ngă gru kơnăl ƀơi drơi jan Kain kiăng kơ hlơi pô bưp Kain ƀu pơdjai hĭ ñu ôh. 16Kain đuaĭ hĭ mơ̆ng ƀô̆ mơta Yêhôwa laih anŭn nao dŏ amăng čar Nôt#4:16 Nôt: kiăng pia jing “rưng hyu djŏp anih”., anih gah ngŏ kơ Êđen.
Kơnŭng Djuai Kain
17Kain dŏ hăng bơnai ñu, bơnai ñu pi kian laih anŭn tơkeng rai Ênok. Kain man pơdơ̆ng sa boh plei laih anŭn pơanăn gơ̆ Ênok, tui hăng anăn ană đah rơkơi ñu. 18Ênok jing ama kơ Irat; Irat jing ama kơ Mêhujaêl, Mêhujaêl jing ama kơ Mêthusaêl; Mêthusaêl jing ama kơ Lamek. 19Lamek dŏ dua čô bơnai; sa čô anăn ñu HʼAda, sa čô anăn ñu HʼSila. 20HʼAda tơkeng kơ Jabal; Jabal jing ơi adon kơ ƀing mơnuih dŏ amăng sang khăn laih anŭn rong hlô mơnơ̆ng. 21Anăn adơi Jabal jing Jubal; ñu jing ơi adon kơ ƀing mơnuih pĕ brŏ laih anŭn ayŭp đing klơt. 22HʼSila tơkeng rai Tubal Kain, ñu jing pô kia djŏp mơta khul gơnam yua ƀơ̆ng dji djip ngă hăng kong laih anŭn hăng pơsơi. Adơi đah kơmơi kơ Tubal Kain jing HʼNama. 23Lamek laĭ kơ dua čô bơnai ñu tui anai:
“Ơ HʼAda laih anŭn HʼSila! Hmư̆ bĕ hiăp kâo:
Ơ ƀing bơnai Lamek, pơđing bĕ tơngia kơ tơlơi kâo laĭ:
Kâo hmâo pơdjai laih sa čô yua kơ ñu hmâo ngă pơrơka kâo,
Laih anŭn sa čô čơđai yua kơ ñu taih kâo brah brơ̆p.
24Tơdah Kain dưi hmâo tơlơi rŭ nua tơjuh wơ̆t,#Mat 18:22.
Sĭt yơh, Lamek či dưi hmâo tơlơi rŭ nua tơjuh pluh tơjuh wơ̆t.”
Tơlơi tơkeng Set
25Ađam dŏ hăng bơnai ñu dơ̆ng, bơnai ñu tơkeng sa čô ană đah rơkơi, pơanăn ñu Set,#4:25 Set: Amăng tơlơi Hêbrơ, boh hră anai hmâo dơnai pơđok hrup hăng arăng pơđok boh hră kiăng pia “hmâo pha brơi”. yua kơ ñu laĭ: “Ơi Adai hmâo pha brơi kơ kâo sa čô ană đah rơkơi pơkŏn pơala kơ Abel, pô Kain hmâo pơdjai hĭ laih.” 26Set ăt hmâo tơkeng sa čô ană đah rơkơi mơ̆n, pơanăn ñu Ênos. Mơ̆ng anŭn, arăng čơdơ̆ng iâu kơwưh anăn Yêhôwa.
Επιλέχθηκαν προς το παρόν:
Čơdơ̆ng Phŭn 4: JRA2016
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2016 United Bible Societies. All rights reserved.