JOHAN 2
2
Kana Rünyi Nyu Shenhü Keho
1Tson-o jonshen nyü Galil kazü Kana rünyi nyu senhü keho nme thyü; lo Jisu a-jvü le tsünyu bin 2Lo senhü keho tsünyu mele Jisu lo senthyükelonyu aphu ko. 3Lo vain zü le rhori la ntsin, Jisu a-jvü le Jisu ka, “Ngun vain zü le ndi laso.”
4Tsontsin Jisu le a-jvü ka, “Tenunyu, nle nyuthyüo a-ka tsonzo hü nla? A gwünkho timvu zun.”
5A-jvü le gonyu dan ka, “Jisu le hagun ka lihi zoshüe thyülo nye.”
6Lo jon tsükatsü Judanyu le nthyü kenshün jvü genyu zü mon kenyhun kenshen shülo kehü zükhin tsero le bin. 7Jisu le anyugun ka, “Hagun zü lü pe zükhin tsü sü külo nye.” Tsüselo anyugun le zü lü pe zükhin dan sükülo. 8Tson njüo Jisu le anyugun ka, “Hagun tsü thyülo njüo pen gü keho tsünyu kedagü ki shü nye.” Lo anyugun le pen gun la, 9lo keho tsünyu tha ketsen kebin gü le zü pe vain zü kethyü ntsin kethyü ka, dikipon hyulo yo shamvu, (ai gonyu zü lü pvü keryü dan we sha.) 10Tsükatsü a-le senhü gü koshüo a-ka, “Temi lihigüe süda keho nyu ho nyeka vain zü kegwa khishü tseo, mele tsü sakelo siki we tsünye ki keshvu khishü hü nyo; nwe le ntsokhin-e vain zü kegwa khishü bin zun hile la!”
11Jisu le Galil kazü Kana rünyi nyu a-le nduntho kerigü hi thyüshüo a-kekvu pe me tesha shü; lo a-le senthyü kelonyu dan-e a-tenyenlo.
12Tsüselo Jisu le a-jvü lo a-sikezen nyu dan lo senthyükelonyu ju zen-o Kapernaum nyu gun; lo anyugun le tsünyu jon kethonri bin mvu.
Jisu Le Kershvuka Thyü Nshün Keshü
(Mt 21:12-13; Mk 11:15-17; Lk 19:45-46)
13Lo Judanyu le Nkenkechwi Nga khonni gun kelo ka Jisu le Jerusalem nyu gun. 14Tson-o Jisu le Kershvuka nyu mele methu lo tanyü lo paro jwe kebin, lo raka kelu kebin nyu dan hyulo. 15Tsontsin a-le ron lope thakevü san ge shülo njüo Kershvuka nyu tanyü lo methu aphu kesin hü küla, lo pisa kelu kebin nyu pisa pe jala, tson-o anyugun miz-e boketo la. 16Tson-o a-le paro jwe kebin nyu dan ka, “Hagun hika hi tha jwen nya, sen-o tinla chi, Apvü ka lope hakethyü ka thyü loho!” 17Tsükatsü a-sikethen nyu dan le, “Ale nka nyu sherhün kethyü genyu a nke lati,” tson-o thu pe bin kenjü rüchünlo.
18Judanyu dan le a-ka, “Nle thyü keshü hile nyu zansü thyü pe agun hi hü nla?”
19Jisu le anyugun ka, “Hagun Kershvuka hi borhola chi, lo ale jonshen nyü thyüni loti.”
20Lo anyugun le, “Judanyu le Kershvuka higü kethyü le chen henzio tsero thyü, lo nle joshen nyü thyüni loti la?”
21Ai Jisu le a-thyümin gü kershvuka rüla zoshü. 22Tsügenyu kesinyu dan nyu Jisu le rhünniso kelo ka a-le jo higü kezo senthyükelonyu dan le rüchünlo; tson-o anyugun le ketsin lesü jo-e lo Jisu le zokeshü jo-e tse tenyenlo.
Jisu Le Temi Jvü Rüla Shakelo
23Tsüsika Nkenkechwi Nga ka Jisu le Jerusalem nyu kebin ka nga nyu a-le nduntho thyü keshü hyulo njüo temi kechon le a-zan nyu tenyenlo. 24Ai Jisu le anyugun tenyen ngwa mvu; kechamvule a-le temi aphu rüla sha genyu. 25A-le temi nyun ka nyu le bin yo tse kethyü sha kebin genyu, temi nme-e no temi rüla a-ka kezoi bin ndi.
Επιλέχθηκαν προς το παρόν:
JOHAN 2: REGSBSI
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.