GENESIS 3
3
Mihing Thumanlouhna
1Huan, Toupa Pathian in gamsa a bawl tengteng lak ah gul a gitlouhpil pen hi. Aman numei kiang ah, “Pathian in, ‘huan a singgah himhim na ne ding uh ahi kei chi ahi maw?’ ” a chi hi.
2Numei in gul kiang ah, “Chilou e, huan a singgahte ne thei mah ung. 3Huan laizang a sing gah Pathian in, ‘Na ne ding uh ahi kei, khoih leng na khoih ding uh ahi kei, huchilou in zaw na si ding uh chi a ka’ ” a chi hi.
4Gul in numei kiang ah, “Si zenzen lou e. 5Na nek ni ua pat na mit uh a hongvak dia, a hoih leh a sia thei in pathiante na hong bang ding uh, chih Pathian in thei kilkel eive,” a chi hi.
6Numei in singgah nektheih ahi chih leh mit hiptak ahi chih leh mi pilsak dia singgah etlah huai ahi, chih a theih in a gah a lou a, a neta hi. A kiang a om a pasal leng a pia a, aman leng a neta hi. 7A nih un a mit uh a hong vakta a, vuaktang a hih uh hong kithei ua; theipi nah a khui khawm ua, puan a kibawl tawm uhi.
8 Toupa Pathian, nitaklam ninem a huan a vak aw a za ua; Adam leh a zi in huan a singlak ah Toupa Pathian a na kibuksanta uhi. 9Toupa Pathian in Adam a sam a, a kiang ah, “Kaw om na hia?” a chi hi.
10Aman, “Huan ah na aw ka za a, vuaktang ka hih ziak in ka lau a; ka na kibuta,” a chi hi.
11Aman, “Vuaktang na hih kua’n honhilh ahia? Singgah neklouh ding ka chih ne na hita maw?” a chi hi.
12Adam in, “Hon ompih dia n’on piak numei in singgah a honpia a, ne kei ve” a chi hi.
13 Toupa Pathian in, numei kiang ah, “Na thilhih bangchidan ahia?” a chi hi. Numei in, “Gul in a hon zekhem a, ne kei ve” a chi hi.
Pathian Vaihawmna
14Pathian in, gul kiang ah, “Hichibang a na hih ziak in ganhing tengteng leh gamsa chiteng lak ah hamsiat na hi tuanse dia, khupboh in na pai gige dia, na damsung in leivui na ne ding ahi. 15Nang leh numei k’on kidou sak dia, na suante leh a suante leng ka kidou sak lai ding. Huai in na lutang a sidup sak dia, nang a khetul na sidup sak ding” a chi hi.
16Numei kiang ah, “Na haksatna leh na naupaina nakpi’n ka pungsak dia; haksatak in tate na nei ding. Himahleh na deihlam na pasal lam ahi dia, aman na tung ah thu a nei ding” a chi hi.
17Adam kiang ah, “Na zi thu na man a, singgah na ne ding ahi kei, chi a, k’on thupiak na nek ziak in leitung nang ziak in hamsiat in a omta hi. Na damsung teng in gimtak a sem in a gah na neta ding hi. 18Ling leh louling neite leng a hon omsak dia, lei a anteh na neta ding hi. 19Lei a na kiknawn masiah na mai a kho-ul luang puappuap in an na neta ding. Lei apan lakkhiak na hi. Leivui na hi a, leivui ah na kiknawn ding” a chi hi.
20Adam in a zi, mihing tengteng nu a hih ziak in, a min Evi a sa hi. 21Toupa Pathian in Adam ading leh a zi ading in savun puanaktual a bawlsak a, a silhsak hi.
Adam Leh Evi Huan A Kipan Hawlkhiatna
22 Toupa Pathian in, “Ngai un, mihing in a hoih leh a sia thei in eite bang a hong hita. Tuin a khut a sawk in hinna singgah lou a ne in, tangtawn in a hing kha ding uh” a chi hi. 23Huaiziak in, Toupa Pathian in amah a lakkhiakna leilet ding in Eden huan a kipan a sawlkheta hi. 24Mihingte a delhkheta a; hinna sing lampi veng ding leh Eden huan suahlam pang ah Cherubte leh mei namsau kilek zualzual a omsakta hi.
Επιλέχθηκαν προς το παρόν:
GENESIS 3: PAITBSI
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.