Mt 14
14
Awu Yohannes Ndu-bodo
Mk 6,14-29; Lk 3,19
1Abog te Herodès Tetrarka#14,1 Tretrarka angabë e mod osë adzoe efas nyiina ya nguma nnam. A mvus hala, Tretrarka antoa nkukuma ntòg osë. awodan Yesus mindum, 2nyè ai bod bësë na: Yohannes ndu-bodo nyòlò; anë nkuan a sòṅ bëwu, asu te abò biyëṅ bi mam bisë bili. 3Herodès te emen nyè angabò na bëbi Yohannes, bëfaṅa nyè ngadag, bëfudi nyè a mimbog, etòm Erodiada, nga manyaṅ woe Filip. 4Yohannes ny'angadzo ai nyè na: Wayean ki tòbò ai nyè#14,4 A mvende Moses, angabë eki na mod anòṅ mininga manyaṅ.. 5Mbol ayii nyè woe, angambara bod, amu bëdzoo na anë profet. 6Ndò, a Herodès adzëmëṅa toban mimbu mi abyali, ngòn Erodiada engadzëm a zaṅ bod ha, enyëbë a hm fò Herodès a nnëm. 7Ndò angakani sòṅ na ayi nyè vë e dzi esë ndzaa nyè. 8Nyia angatindi nyè na akad na: «Vaa ma nlo Yohannes Ndu-Bodo a esoa, hë etoa dzi». 9Ngul esusu nkukuma a si, ai mbol angakani sòṅ, bëyëṅ bëtoa, ndò angabende na bëvë nyè wò, 10alomo hm na bëkë tsig Yohannes nlo a nda-mimbog. 11Ndò bëngabëgë nlo woe a esoa, bësò vë ngòn mininga, nyè akë vë nyia. 12Ndò bëyègè boe bëngazu bëgë mbim, bëdzëbë, bësò fë kad Yesus.
Yesus avë bakuda bë bod bëtan bidi
Mk 6,31-44; Lk 9,10-17; Yoh 6,1-13
13Awog Yesus angawog nala, ndò angakodo ete, abëdë a mal, akëlë e hom angabë nyè etam. Minkunda mingayi wog nala, mingabye nyè ai mëkol, bëtyege a bëtisòn. 14Ndò angakui, ayënë abui nkunda, angawog bò ngòl, angasye minkokòn miaban. 15A ngoge engavin, bëyègè boe bësubu nyè babi bò na: E hom hi onë a fëfël eyëgan, ndò fë awola bidi alod ya. Bòò, osoe bò, na bëkë kus e dzom badi a mal mal. 16Yesus nyè ai bò na: Mfi osëki na bësob, mina bëben vaan bò e dzom badi. 17Bò ai nyè na: Bibëlë ha hë bëmbaṅëla bëtan ai kòs ebè. 18Nyè na, Zaan ai biè mu. 19Ndò angabende minkunda na mitòbò a bilòg, anòṅò bëmbaṅëla bëtan ai kòs ebè, abede mis a yob, avëë ngaṅ, abëgë, avëë bëyègè boe bëmbaṅëla, bëyègè boe bëvëë minkunda. 20Ndò bësë bëngadi, bëdzie, bëbëgë e bi bingaligi bitun, minkun awom ai mibè mintud! 21E bod bëngadi bëngabë dzam bò bakuda bëtan, tègè laṅ bòngò ai bininga.
Yesus awulu a mëndim a yob
Yoh 6,15-21
22Etye etye te, ndò angabò na bëyègè bëbed a mal, bëdudu mò e kindig fòg, ntye aligi asoe bod. 23Asoe angasoe bod, ndò angabed a nkol a yob etam, angakogëlan. Ngoge engavin ha, hë atoa we etam. 24Mal mëngabë ntye oyab ai nkod si, minsum mëndim midzimbigi, amu evundu engabë vuṅu. 25Babi ai mëlende më kidi, ndò angakë abie bò, awulugu a maṅ a yob. 26A bëyègè bëyënë nyè awulugu a maṅ a yob va bëngambara, bëdzoo na kon. Bëngabam a yob ete ai e wòṅ bëwogo. 27Ndò Yesus angadzo ai bò na: Të miambara, mamen! tòbëgan a miëṅ! 28Ndò Petrus angafèd, nyè na: A Nti, ngë wamen, bò na mëzu mfa onë, a mëndim a yob. 29Nyè na: Zaa! Petrus asusu a mal, angawulu a mëndim, angakë a Yesus anë. 30Angayi wodan evundu, angambara fò. Atari fò na ayimbi, angayon nyè na: A Nti, ka ma! 31Yesus asama wò, akè nyè, nyè ai nyè na: Asu dze ohë soo, a mod onë tègè ai abui ṅyëbë? 32Ndò bëngabed a mal, evundu esusu. 33E ba bëngabë a mal bëngalaban a si bò na: Bëbëla emen, onë Mòn Zamba.
Yesus abò minkokòn mvoè a Genesaret
Mk 6,53-56
34Ndò bëngadaṅ a yat, a si Genezaret. 35Bod ya hom te bëyëmë nyè, bëlomo foe a nnam osë, bëngazu ai nyè minkokòn misë, 36bëngakogëlan ai nyè na bënamba të hë alò eyie dzie. E bod bësë bënambëga, bësë bëbò mvoè.
Επιλέχθηκαν προς το παρόν:
Mt 14: NTE12
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
MKPAMAṄ AMVOE Nouveau Testament en langue Ewondo © Bible Society of Cameroon, 2012.