Yoh 1
1
Ebugu anganòṅ nyòl
1A mëtari, ebugu #1,1Yohannes atari mbëmbë foe woe ai mbol ya Ebugu angabë a mëtari abë Zamba, ai Zamba. Ebugu te anë Yesus Kristus. Dzam bò na Yoh 1,1-18 angabë nguma dzia ya bëkarëga yia asu duma Yesus Kristus ya anë Ebug Zamba. angabë; ebugu angabë abë Zamba, ebugu atoa man Zamba. 2Angabë abë Zamba a mëtari. 3Dzom esë engakomban ai nyè, ndò fë, tègè ai nyè, dzom ziṅ yandzëki komban. E dzi engakomban 4engabë enyiṅ abë nyè, ndò enyiṅ engabë mfyè bod. 5Ndò mfyè wafyè a dibi, hë da, dibi tègè wò nòṅ#1,5Dibi ai mfyè binë bibug ya Yohannes adiṅ bëlan ai biè asu yë na atoan lëdë e bod batëb Zamba ai e ba bayëbë nyè.. 6Ndò mod ziṅan gasò, a nloman Zamba, mod te dzoe na Yohannes. 7Angasò asu mbòòlan, na azu bòòlò mfyè, asu yë na bod bësë bëyëbë etòm dzie. 8E nyòlò te angabë ki mfyè; angasò hë asu yë na azu bòòlò mfyè. 9Angabë mfaṅ mfyè ya wafyè mod osë, a ongasò a si ndon. 10Angabë a si ndon, ndò fë si ndon engakomban ai nyè, hë da, si ndon yandzëki nyè yëm. 11Angasò a biwoge bie, hë da, emboe bandzëki soan ai nyè. 12Eba bësë ya bëngasoan ai nyè, a bëngayëbë a dzoe die, angavë bò ngul ya avëṅan bòn bë Zamba, 13e ba ya bëngabyali, së a hm ki a mëki ngë ṅyian nyòl ngë ki a ṅyian fam, hë abë Zamba emen. 14Ndò ebugu anganòṅ nyòl, aloṅo abëmba die abë bia, ndò biayen duma die, duma anë e di mbaṅ mòn obëlë abë esya; anë ndzian ai maa, ai sosoo. 15Yohannes abòòlò nyè, ndò adzo na: E nyò ṅnyè mëdzoo na: E mod azu ma a mvus alod ya ma osu, amu angabë ma osu. 16Amu bia bësë bingayen maa abede maa a yob, a ntud enyiṅ woe, 17amu a zaṅ Moses ngò mvende engavëëban, maa ki ai sosoo bintoa a zaṅ Yesus Kristus. 18Mod ziṅ abë ya ki yen Zamba. Mbaṅ Mòn ya anë Zamba, a anë a nnëm esya, ṅnyè angayaè zen.
Mbòòlan Yohannes Ndu-bodo
Mt 3,1-12; Mk 1,2-8; Lk 3,15-17
19Mbòòlan Yohannes a hi, eyòṅ Yuden ya Yerusalem bëngalom nyè bëfada ai bëleviten na bësili nyè na: Wa onë za#1,19Yuden bëngabë yanga Messias atoa profèt. Ayen bëngayen anë Yohannes adu bod akyaè ya profèt Ezekiel angatil, bëngatsog hm na ṅnyè anë Messias. «Ekoan nnam» ya engalom bod abë Yohannes engabë ekoan nen ya etsigi fë mimfaṅ mëdzo. Bod ya etere bëngabë kan elè: 1) Bëfada bënen; fada nen ya adzoe ai bëfada bënen bëfë. 2) Bënyia-bod-mvia bë nnam. 3) Bësaṅa bëkalara ya bëwoge ai ekoan bëfarisea.? 20Ndò angamëm, andzëki sie, ndò angamëm na: Ma, masëki Kristus#1,20Asu ebug Messias, yënë afëb... Asu abui Yuden Messias angabë nkode ya azu a nda David. Dzam da, bod bëngabë tsogo kan kan. E ba bëtsogo na Elias adugan sò, e ba bëvòg bëtsogo na profèt ziṅ ayi sò, abò e kan mam ya Moses angabò.. 21Ndò basili nyè na: Dze hm, yë wa onë Elias? nyè na: Kokoa. Yë wa onë profèt? nyè na: Kokoa. 22Ndò hm badzo ai nyè na: Onë hm za ben tuk? Mbol yë na bivë e ba bëlom bia eyalan. Wadzo adzo doe ya? 23Nyè na: Mënë kiṅ e nyò ayëdan a nkod-nnam: limëṅan zen Nti#1,23Is.40,3, anë profèt Isaias angakad. 24E bod ba bëngabë a nloman bëfarisea. 25Ndò basili nyè, bò na: A dze hm wadu bod, ngë osëki tò Kristus, tò Elias, tò ki profèt? 26Yohannes nyè ai bò na: Ma madu bod a mëndim. Mod atëlë a zaṅ dzaan, miayëm ki nyè; 27azu ma a mvus, hë da mayean ki na matii nyè nkòl silfas. 28E mam ma mëngayenëban a Betania#1,28Betania ya Yordan ayat asëki dzal da ai e Betania angabë dzal Lazarus ai bëkal boe., a Yordan a yat, e hom Yohannes angabë aduu bod.
Man ntomba Zamba
29E kidi lende ya hala, ndò ayen Yesus azaag abë nyè, nyè na: Yënë ntomba Zamba ya wavaè minsëm ya si ndon. 30Ṅnyè mëdzoo ai nyè na: Mod ziṅ azu ma a mvus, a angalod ma osu, amu angabë ma osu. 31Mamen mëmbë yëmë ki nyè#1,31Yohannes angabë yëmë ki Yesus, mbol nyè angabë nyiṅi hë a nkod-nnam., dzam da mëngazu du bod a mëndim asu yë na akulëban a Israel. 32Ndò Yohannes angabòòlò, nyè na: mëngayen nsisim osusu, osòò a yob anë obëṅ, ndò ongatòbò nyè a nyòl. 33Mfa wama, mambë yëmë ki nyè, dzam da e nyò angalom ma na mëdu bod a mëndim ṅnyè angadzo ai ma na: 'E mod oṅyënë nsisim osusu, ozaa tòbò abë nyè, ṅnyè ayi du abë Mfufub Nsisim!' 34Mamen mëngayen, ndò fë mazu ya mabòòlò na ṅnyè anë mòn Zamba.
Yesus aloe e bëyègè bë osu
35E kidi lende ya hala, Yohannes atëlë na, ai bëyègè bëbè ya esamba dzie, 36ndò afòmbò Yesus, mbol alodo, nyè na: Yënë sik, ntomba Zamba. 37Ndò e bëyègè bëbè ba bawog nyè akòbògò nala; mbò bakë batoṅ Yesus a zud ba. 38Ndò Yesus ahëṅan, antala anë bazu batoṅ nyè, nyè ai bò na: Dze miadzëṅ? Bò ai nyè na: Rabbi#1,38Bòngò bë sikulu ai e bod bëyëmë na mod angayègè mvende bëloege bëyëgëlë na Rabbi. Baloe Yesus nala, afyaṅan bò na andzëki kë a bësikulu baban. (nala watyan na: a ṅyëgële), eye otoa he? 39Nyè ai bò na: Zaan, miayi yen. Ndò bëngakë, bëyënë e hom atoa, ndò bëngatòbò ai nyè amos te. E mam ma, dzam bò awola awomo. 40Mbòg ya e ba bëbè ya bëngawog Yohannes akòbògò, bëtoṅo nyè, angabë Andreas, manyaṅ Simun#1,40: Yesus angavë Simun, mòn Yoannes, mëbadan na Kefas, Petrus (Akoa). Petrus. 41Ndò atari yen manyaṅ Simun, nyè ai nyè na: Bisòm ya Messias (nala watyan na: Kristus). 42Ndò akë ai nyè abë Yesus. Ndò Yesus afòmbò nyè, nyè na: Wa, onë Simun, man Yohannes; wayi loeban na Kefas, nala watyan na Akògò.
Yesus aloe Filipus ban Natanael
43Amos otsaag hala, angabë ayii na akë a Galilea, ndò ayen Filipus. Yesus nyè ai nyè na: Zaag wabie ma. 44Filipus angabë mod ya Betsaida, mod ya tisòn Andreas ban Petrus. 45Filipus atoban ai Natanael#1,43-45Yohannes etam ṅnyè alèè bia na Yesus angaloe Natanael., nyè ai nyè na: E mod Moses ai bëprofèt bëngatil a kalara mvende, bisòm ya nyè, Yesus, man Yosèf ya Nazarèt. 46Natanaèl nyè ai nyè na: Yë e dzam anë mbëṅ anë dzam sòṅ a Nazaret#1,46Osusua yë na Yesus azu, bod të yëm Nazaret, amu mfaṅ dzom ziṅ ongabë ki ete.? Filipus nyè ai nyè na: Zaag yen. 47Ayen Yesus angayen Natanaèl azaag abë nyè, ndò alaṅ nyè ebug dzi na: Yënë a mfaṅ, man Israel nyò anë të ai mvol a nyòl. 48Natanaèl nyè ai nyè na: Eyë wayëm ma he? Yesus nyè ai nyè na: osusua yë na Filipus aloe wa, hala otoa a ele bibuma a si, ma mëyen ya wa. 49Natanaèl nyè ai nyè na: A Rabbi, onë man Zamba, onë ndzoe Israel. 50Yesus nyè ai nyè na: dze yë mbol mëkad wa na mëyen wa a ele a si ndò wayëbë? Wayi yen alodo nala. 51Ndò adzo ai nyè na: Amen, amen, makad mina na, miayi yen yob ayoo, benglès bë Zamba bëbëdë, bësusu a man Zamba anë.
Επιλέχθηκαν προς το παρόν:
Yoh 1: NTE12
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
MKPAMAṄ AMVOE Nouveau Testament en langue Ewondo © Bible Society of Cameroon, 2012.