Bap 4
4
Bakë sòman Petrus ban Yohannes a ekoan-nnam
1Mbol hm bëlèègè ai bod, ndò bëfada ai ndzoe#4,1 Ndzoe tempel angabë fada abëlë nkunda bëleviten asu yë na të endugëlan yabò a tempel. bëzimbi ya tempel ai bësadukea bëngazu bò tëbë a mgbag, 2bëwogo adzo di abe na bayëgëlë bod, bëyedëgan akui-lë sòṅ bëwu#4,2 Bësadukea bëyëbëgë ki akui-lë sòṅ bëwu. abë Yesus. 3Ndò babi bò, bëfudi bò a mimbog akui kindi lende ya hala, amu hala ngoge entoa ya. 4Abui bod ya bëvogolo ebug bëngayëbë, ndò bod bëngakui dzam bò tò bakuda bëtan. 5Ndò hm lazu bò na, e kidi lende ya hala, ndò bëdzoe baban, ai bënyia-bodo-mvia, ai bësaṅa bëkalara baban bëngakoan a Yerusalem, 6fufulu ai Annas, fada nen, ai Kaifas#4,6 Biayëm Annas ban Kaifas a Mbëmbë Foe., ai Yohannes, ai Alesander ai e ba bësë bëngabë a mvòṅ bëfada bënen, 7ndò batele bò a ezëzaṅ, bëngasili bò minsili, bò na: «Ai ngul fe, ngë ki na a dzoe za mihë bò e dzam di?» 8Petrus atoa ndzalan ai Mfufub Nsisim ha, ndò abodo nkòbò, nyè ai bò na: «A bëdzoe bë nnam ai bënyia-bodo-mvia, 9ngë badzëṅ bia a si amos ya ana, etòm ya na bibò nkokòn mod mbëmbë dzam, ai na a dzoe za akodeban, 10mina bësë hm, ai ayòṅ Israel asë, yëman na a dzoe Yesus Kristus man Nazaret ya mina mingabomë a klos, ndò Zamba angavëlë nyè a bëkon, a dzoe die ngò e mod nyò atëlë mina mvoè osu. 11Ṅnyè anë akòg ya bia bëloṅ bë nda binga woa a fyè, ndò avëṅan ya nnomo akògò#4,11 Bs 118,22. 12Ndò fë akode asëki abë mod mfë, amu dzoe afë asëki a si a zaṅ bod, a biayean kodeban ete». 13Mbol bëngayen azombo Petrus ban Yohannes, bëyëmë fë na bayëm ki kalara, bò ha tègè ai ayègè, bëngakam, mbol bëyëmë na bod bëte bëngabë ai Yesus, 14ndò babëbë e mod angabò mvoè nyò, atëlë ai bò, tègè ai ebug bafèd. 15Ndò bakad bò na bëyanga a nsëṅ nda-mëdzo, asu yë na bëbui fëg bò a bò, 16bò na: «Bibò ya ai e bod ba? Amu adzo ndëm te ayëmban ya a ngëëṅ a zaṅ e bod bësë bëtoa a Yerusalem, ndò biasë ki dò dzam sie. 17Dzam da, asu yë na të dzam te layaman abui abui, ntëlan bò mvende të dugan kòbò ai mod ziṅ a edzoe di». 18Ndò bëngaloe bò, bëtele bò mvende na tègè tègè bada fala ebug, ngë ki na ayëgëlë a dzoe Yesus. 19Ndò Petrus ban Yohannes bafèd, bò ai bò na: «Mina bëben yënan adzo di: Yë anë sosoo a mis më Zamba na bidaṅ mina vogolo alodo Zamba? 20Amu bia biasëki dzam bò të kòbò e mam bingayen, biwogo fë». 21Ndò badugan bò beme, bësoe bò, tègè yen e dzam bavë bò endëgëlë ete, hë etòm bod bë nnam, amu bësë bëngabë bëvaa Zamba duma asu e dzam angabò. 22E mod hm asimba mboan mvoè di angabòban a nyòl, angabë bisëb mëwom mënyii ai fus.
Bëyègè bakogëlan na bëbi azombo
23Eyòṅ bëngasoe bò, ndò bëngakë a bod baban, ndò balèè bò e mam mësë bëfada bënen ai bënyia-bodo-mvia bëngakad. 24Amana bëngamana wog, ndò bò bësë bëngavë kiṅ fufulu abë Zamba, bò na: A Nti, wa ongakom yob ai si, ai maṅ, ai e byem bisë ya ete, 25wa ongakòbò ai Mfufub Nsisim a anyu tara waan, mbò-esye woe David na: Asu dze mëyòṅ mënë ebyandi, minnam mibindigi zëzë mam? 26Minkukuma ya si-ndon mitëlë, bëdzoe bëkoan fufulu, na baluman ai Nti, ai Kristus woe#4,26 Bs 2,1-2. 27Amu Herodes#4,27 Herodes Antipas ya angabë adzoege Galilea ai Perea. ai Ponsius Pilatus ai bëhaiden, ai bòn bë Israel bëngakoan a tisòn te mfaṅ na baluman ai mfufub mbò-esye woe Yesus ya ongawòbò mbòn, 28na babò e mam mësë ya wò woe ai ṅyian woe bingatele na biayi bòban. 29Ndò hm etoa dzi, a Nti, yënë mëlam maban, ovë hm bituga bie na bëkòbò ebug dzoe ai azombo asë, 30osam wò woe na obò bod mvoè, ai na mëndëm ai biyëṅ bi mam bibòban a dzoe mfufub mbò-esye woe Yesus. 31Bëkogëlan ha, ndò e hom bëngabë nkoan ongatigëdan, bò bësë bëdzie ai Mfufub Nsisim, bëngakòbò ebug Zamba ai azombo.
Apostel babëlan ai byem biaban bisë fufulu
32Nkunda e bod bënganyian a ṅyëbë ongabë hë nnëm mbòg mbòg, ai nsisim mbòg mbòg, tò mod të dzo na dzom dzie yawoge ai nyè, byem biaban bingabë bò hë fufulu.#4,32-37Bëkristen bëngabë kaban akuma daban a zaṅ dzaba. 33Ndò apostel bëngabë bòòlò akui-lë sòṅ Nti Yesus ai abui fim, abui maa atoa ai bò bësë. 34Mod ziṅan gabë ki a mëyaṅan a zaṅ dzaban; amu e ba bësë bëngabë bëbëlë mënda ai mal bëkuan ai mò, bëzaag ai mòni nkuan, 35bëdzoge apostel a mëkol a si, bëngavë mod osë e taṅ a yaṅan ai dzò. 36E Yosef ya baloe na Barnabas, mbòg ya ngab apostel, (dzoe die latyan na mòn evòli), angabë man Leviten, bëbyali ya Siprus, 37angabë abëlë afub, ndò angakuan ai dò, asòò ai mòni, adzoge nyè apostel a mëkol a si.
Επιλέχθηκαν προς το παρόν:
Bap 4: NTE12
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
MKPAMAṄ AMVOE Nouveau Testament en langue Ewondo © Bible Society of Cameroon, 2012.