Bap 1
1
Mfufub Nsisim ayi sò
1A Teofil, e kalara osu #1,1E kalara osu ya Lukas angatil anë Mbëmbë Foe atili Lukas., mëngatil e mam mësë ya Yesus angabò, ayëgëlë, atarigi a mëtari, 2azaag kui amos angatëbëlë apostel ya angatòb, ai Mfufub Nsisim, ndò anganòṅëban a yob. 3Mbò angalëdë emen, atala, a mvus yë na abi ya mintye akyaè asë, mëlu mëlu mëwom mënyii, akòbògò mam më edzoe Zamba. 4Ndò hm, adzaag ai bò bidi ha, ndò abende bò na të bakodo a Yerusalem, bëyanga hë mëtiṅ më esya, akyaè ya mingawog mëdzoo na, 5Yohannes angadu a mëndim, mfa waan, miayi duuban abë Mfufub Nsisim e mëlu mazu ma.
Akë-lë yob Yesus
6Ndò hm bëngamana koan, bësili nyè na: «A Nti, yë abog wazu dugan tele edzoe Israel di akui ya nga?#1,6Abui bod angabë tsogo na Yesus ayi dzoe anë minkukuma ya si.» 7Nyè ai bò na: «Së ki mina miayean yëm mëbog ai bënyie ya tara angatele a ngul dzie, 8dzam da, miayi bi ngul eyòṅ Mfufub Nsisim ayi mina sòṅ a nyòl, abog te miayi ma bò bëbòòlò a Yerusalem ai a Yudea asë, ai Samaria, akëlë kui a mëbug më si». 9Akòbògò nala, bëngayen nyè anë anòṅëban a yob, ndò nkut ongamana nyè bò dimëzan a mis. 10Ndò mbol bëngabë bëbëbëgë a yob anë akë, ondzi na, fam ebè entëlë bò a mgbag, ebëgë mimfum biyie, 11bò na: «A Bod ya Galilea, dze mitëlë, mibëbëgë a yob? E Yesus ya avaaban mina a yob nyò, nala ngò ayi sò, e kan mihë yen akëlë a yob».
Apostel batòb efòlògò Yudas
12Ndò hm apostel bëngadugan a Yerusalem, bësòò a nkol bile-bi-mbòn; hom te ongabë babi ai Yerusalem, ntye dulu ya amos sabbat#1,12Mvende Yuden engabë na mod onë dzam wulu kilomera dzidzia a amos sabbat. Ngë olod fë nala, osëm ya.. 13Asuan bëngasuan a tisòn, ndò babed a nda-yob, e hom bëkarëga yanga; bënë ha na: Petrus ai Yohannes, ai Yakob, ai Andreas, Filip ai Tomas, Bartolomeus ai Matias, Yakob man Alfeus ai Simun man Zelot, ai Yudas man Yakob. 14Bò bësë bëngabë nnëm mbòg mbòg, mban a ngogëlan ai bininga, ai Maria, nyia Yesus, ai babënyaṅ. 15Mëlu mëte, ndò Petrus#1,15Petrus anòṅ nkòbò amu ṅnyè anë asu-zoa. angatëbë a si a zaṅ babënyaṅ, (Nkunda bod ongabë nkoan hom mbòg ha dzam bò ntèd ai mëwom mëbè) nyè na: 16A babëdzaṅ, ntilan ongabë oyean toban, akyaè Mfufub Nsisim ongatari kòbò a anyu David, atyan ai Yudas ya angavëṅan nlëdë-zënë asu e bod bëzaa bi Yesus, 17na angabë a ngab dzan, ndò abi fë ngab ya esye dzi. 18Ndò mod te angakus aboda si ai mòni dzongo, ndò alaban ai asu a si, atole a zaṅ, miyè midabëra a si. 19Ndò e bod bësë bëtoa a Yerusalem bayëm nala, antoa hm na, bëngaloe afub te a nkòbò waban na: Akeldamak, nala watyan na: Afub mëki. 20Amu anë ntilan a kalara bësalmen na: Dzal die lëbòò elig, ndò fë të mod atòbò ete#1,20: Bs 69,25, ai na Mod mfë anòṅò afola edzoe dzie#1,20: Bs 109,8.. 21Bod bëziṅ bazuzu ya batòbò ai bia ha abog asë, eyòṅ Nti Yesus angabë awulugu ai bia, asë ali, anë ali, 22atarigi a ṅduan Yohannes, azaag kui amos ya bënganòṅ nyè a yob a zaṅ dzaan#1,22Man apostel ayean bò na angabë a esamba Yesus ai eyòṅ Kristus angayene bò a mvus akui-lë sòṅ.; Layean na mbòg ya ete abò mbòòlò akui-lë sòṅ fufulu ai bia. 23Ndò bëbè bëngatëbë#1,23Yosef ai Matias bëngabë a taṅ bëyègè mëwom zamgbal ai bëbè., Yosef ya bëloege na Barsabbas, atoa mëbëdan na Yustus, ai Matias. 24Ndò bëngakogëlan, bò na: «A Nti, wa wayëm minnëm mi bod bësë; lëdëgë e nyò watòb a e bod bëbè ba, 25na anòṅ etoa esye apostel ya Yudas angadzoge a si nyè akëlë e hom woe.» 26Ndò bëngaboe ngam, ebii Matias, ndò fò anyian a taṅ a postel awom ai mbòg.
Επιλέχθηκαν προς το παρόν:
Bap 1: NTE12
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
MKPAMAṄ AMVOE Nouveau Testament en langue Ewondo © Bible Society of Cameroon, 2012.