Mateyo 5
5
Yesu abilikilevyo mwe mlima. Mt.
5-7.
Nyemi za Kikilisito.
1Akiona mabumba azakwela mwe ntuli; akiikala, wahina wakwe wazaiza na kwakwe. 2Azainula kanwa chakwe, azawafuza angwe: 3We nyemi ni wakiwa wa kimpeho, hambu uzumbe wa lwingu ni wawe. 4We nyemi ni waja weduma ukiwa, hambu watazahembuliziγwa. 5We nyemi ni wahozu, hambu watazapala inu shi. 6We nyemi ni waja wena sala na nkilu ya utanda, hambu watazaiγushiγwa. 7We nyemi ni waja wena mbazi, hambu watazaonelwa mbazi. 8We nyemi ni waja wena myoyo yeṅala, hambu watazamwona Mulungu. 9We nyemi ni waja weivanya weyae wawe, hambu watazaitangwa wana Mulungu. 10We nyemi ni waja weingatwa kwa mbuli ya utanda, hambu uzumbe wa lwingu ni wawe.
11Muna nyemi inywi, wantu wakimikanka, wakimiingata, wakimishinga mbuli mbada zoshe za mambeza kwa mbuli ya imi. 12Tamilwai na kutowa mazumo! Hambu upokezi wenyu mwe lwingu ni ungi; hambu vivyoho wazaγulusha hata waja wateγanyi wamilongwelewo.
13Inywi mu munyu wa inu shi. Ati munyu wabanika, utakola zeze vituhu? Nkauna ndima lushe, utaashiγwa du, ujatwe ni wantu. 14Inywi mu langaila ja ngulu ngima. Muzi weikala mwe ntuli ulanga nkaukifisha. 15Wantu wohena wakikoleza taa nkawaifunikila ngahu, waiika mwe kiikilo chakwe, imulikile woshe we muja nyumbai. 16Vivyoho lekai, hata langaila jenyu jimulikile wantu, waone ndima zenyu ntana, wakamtogole ishe ywenyu mweikala mwe lwingu!
Bontokelo ja kweli ja mulomongwa.
17Mshefanyanye, kuti nizaiza, nichakule mbuli za mulomongwa ao za wateγanyingwa! Siizile nichakule, niizile nibontoleze.
18Kweli namiti: Mpaka lwingu lubanike haṅwe na inu shi, miya mulomongwa nkeubanike kagonde ao kasonono kaṅwe du, shuti vyoshe vinebontoka! 19Lushe ndiye aushe mulaγilizo muṅwe du, hata ni mdodo kabisa, kangi akifuza wantu ivyoho, mwe uzumbe wa lwingu uyu atazaitangwa mdodo ṅwenye; miya ndiye auγoshole na kufuza wantu ivyoho, mwe uzumbe wa lwingu uyu atazaitangwa mkulu. 20Hambu namiti: Utanda wenyu ukishezinka uja wa watabaluwangwa na uja wa Mafaliseyo nkezemwingile mwe uzumbe wa lwingu.
21Mzaiva kuti: Wakale wazaγangwa: Ushekome! Ndiye akome atakola masa. 22Miya imi namiti: Kila mwena maya na mnduγu ywakwe atazakola masa; ndiye amweze mnduγu ywakwe, atazakola masa bomani, ndiye amkanke, atazakola masa ya kushindikwa mwe moto wa kuzimu. 23Ati waiγala tulo jako vikiloi, lushe uko ukifukila, kuti mnduγu ywako ana mfundo mwe moyo kwa mbuli ya iwe, 24asha tulo jako kuja kwe vikilo, unehita kwa ivana na mnduγu ywako, ukibinda udaheiza, uiγale tulo jako! 25Ṅwiyawo mwekuifya ufikemγendela na uhozu ukena naye silai, kangwe uyu ṅwiyawo mubada ashezakuinkila kwa mlaha masa, uyu mlaha masa akikuinkila kwa mshilikali, ukigelwa mwe chumba! 26Kweli nakuti: Nkezeumlawe muja, shuti unemliha ṅwiyawo na kusheshiγaza, ati ni kahela kaṅwe du.
27Mzaiva kuti: Wakale wazalongwa: Ushetende kilanga! 28Miya imi namiti: Kila mwemwolela mvyele na luzisho azabinda kutenda kilanga naye mwe moyo wakwe. 29Ati zisho jako ja kulume jakunda kukuhosa, ujifokole, ujiashe! Hambu ni vitana, dango iṅwe ja ṅwili wako jikibanika, kushima ṅwili wako mgima ukishindikwa na kuzimu. 30Ati mkono wako wa kulume wakunda kukuhosa, uushenge, uuashe! Hambu ni vitana, dango iṅwe ja ṅwili wako jikibanika, kushima ṅwili wako mgima ukishindikwa na kuzimu. 31Kangi kuzalongwa: Ndiye alekane na muke, shuti amunke cheti cha kulekana! 32Miya imi namiti: Ndiye alekane na muke, ati so kwa mbuli ya kilanga, aleka, yuja atende kilanga, kangi ndiye aγuwe mvyele alekiγweye ni mγoshi ywakwe, atenda kilanga.
33Vituhu mzaiva kuti: Wakale wazalongwa: Ushekilishe ulongo du! Miya shuti umlihe Zumbe malape yako! 34Miya imi namiti: Ushezakilisha hata hadodo! Ushekilishe na lwingu! Hambu ni kiti cha Mulungu. 35Ushekilishe na inu shi! Hambu ne ayoikila milundi yakwe. Ushekilishe na Yelusalemu! Hambu ni muzi wa Zumbe mkulu. 36Ushekilishe na mutwi wako! Kwa kuti luzwili luṅwe du nkudaha kuluṅaza haidu kuluchusha. 37Mkilonga: Ndivyo, shuti ndivyo kweli! Mkilonga: Sivyo, shuti sivyo kweli! Vyezinka aho, viandusha vibada.
38Mzaiva, kuti viyakalongwa: Zisho jilihiγwe zisho! Zino jilihiγwe zino! 39Miya imi namiti: Ṅwiyawo mubada ushemwikile nkani! Ndiye akutowe kibao mwe tama ja kulume, umtendezwile hata tama tuhu! 40Ndiye akunde kukulaha masa, aγuwe nkazu yako, umleke, aγuwe hata shuke yako ya kiγubika. 41Ndiye akukungumize, uhite naye ntambo ṅwenga, γesanya naye hata mbili! Mwekulombeza umunke! 42Hata yuja mwekunda kukuambala ushemnyime!
43Mzaiva, kuti vizalongwa: Umkundishe ṅwiyawo, umshuke munkulu ywako! 44Miya imi namiti: Kundishai wankulu wenyu, mhembelezeze waja wemiifya, 45kangwe mγaluke wana wa ishe ywenyu mweikala mwe lwingu! Kangi aleka, zuwa jakwe jiake kwa wabada na kwa watana, hata fula aileka, igwe kwa watanda na kwa wahuza. 46Hambu ati mwakunda waja wemikundisha, muna upokezi ani? Wangelu wohena nkawaγoshola ivyoho? 47Ati mwaluγushana na wanduγu wenyu du, mzinka zeze watuhu? Wamzimu wohena nkawaγoshola ivyoho? 48Kwa ivyoho γalukai watakuzifya sa ishe ywenyu ywa kilwingu avyo mtakuzifya!
Επιλέχθηκαν προς το παρόν:
Mateyo 5: KISHNT05
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
New Testament in Kishambala © Bible Society of Tanzania, 2005.