1 Johannes 2
2
1Mure šavora, kado ramonav tumenge te na maj keren bezex pale. Me te kerena varekon bezexa, si amen jekh fiškarosi kaj vorbil anda amende kai o Dad, o Jesus Kristus, o Čačimasko. 2Anda leste si amare bezexa jertime, na ferdik amare bezexa, me intrego la lumake. 3So sikhavel amenge ke prindžaras le Devles, si te inkras leski vorba.
I nevi vorba
4Savo phenel ke prindžarel les, me či inkrel leski vorba xoxamno si taj o čačimos na'i ande leste.
5Me kon inkrel leski vorba, ande leste si o kamimos le Devleske tista vorta. Anda kado ačaras ke sam ande leste. 6Kon phenel ke si ande leste, trubul te trajil sar o Jesus trajilas. 7Mure kamade, či ramonav jekh nevi vorba, me jekh phurani, jekh vorba kaj sanas tumen anglunes. Kadi phurani vorba si i vorba kaj tume ašundan.
Kadi si i vorba kaj tume ašundan
8Sintik ramonav tumenge jekh nevi vorba kaj akana čaci si and'o Jesus Kristus taj maškar tumende. Ke o tunjariko žaltar taj o čačo udud aba glansil. 9Kodo kaj phenel ke si and'o udud, me či kamel peske phrales, vo si inke and'o tunjariko. 10Kodo kaj kamel peske phrales, vo ašel and'o udud, taj či inkrel kanikas p'o bezex. 11Me kodo kaj či kamel peske phrales, si and'o tunjariko, taj phirel and'o tunjariko. Vo či žanel kaj žal ke o tunjariko korardas les.
Na kamen la luma!
12Me ramonav tumenge šavorenge, ke tumare bezexa jertime si anda o Jesus Kristus. 13Me ramonav tumenge dadenge, ke tume prindžaren les kaj sas tista anglunes. Me ramonav tumenge, le ternenge, ke tume nirindan pa o Nasul. 14Me ramonav tumenge šavorenge, ke prindžaren le Dades. Me ramonav tumenge dadenge, ke prindžaren les kaj sas tista anglunes. Me ramonav tumenge, le ternenge, ke tume san zurale. I vorba le Devleski bešel ande tumende taj nirindan pa o Nasul. 15Na kamen la luma taj či kado kaj si and'i luma! Kodo kaj kamel la luma, či kamel le Dades. 16Ke sa so si and'i luma, so o korpo kamel taj so le jakha kamen, taj o barimos le barvalimasko, kodo na'i katar o Dad, me katar i luma. 17Načola i luma taj so le manuš kamen, me kodo kaj kerel so o Del kamel, trajila mindik.
O Antikrist
18Mure šavora, akana si o paluno čajto. Ašundan ke si te aval o Antikrist, taj but antikristora aba sikhadjile. Anda kado ačaras ke o paluno čajto avilo. 19Geletar amendar, me nas amendar. Te avile von amendar, atunči sas te ašen amenca. Anda kado sikhadjol ke na'i sa amendar. 20Me o Suntho Duxo si šordo pe tumende, taj sa si tumen gudži. 21Na'i anda kodo ke či prindžaren o čačimos, me ramonav tumenge, me ke prindžaren les, taj žanen ke či sosko xoxajmos avel katar o čačimos. 22Taj kon si o xoxamno? Savo phenel ke o Jesus na'i o Kristus. Vo si o Antikrist, vo kaj či kamel te prindžarel le Dades taj le Šaves. 23Sako kaj či kamel te prindžarel le Šaves, na'i jekh le Dadesa. Sako kaj phenel te prindžarel le Šaves, si jekh le Dadesa. 24Mekhen kodo kaj ašundan anglunes, te bešel ande tumende. Te mekhena te bešel ande tumende, kodo kaj ašundan anglunes, atunči vi tume ašen and'o Šav taj and'o Dad. 25Taj kado si kaj šinadas amenge: o trajo trajostar. 26Ramonav kado pa kodolende kaj inkren tumen tele pa o drom le Devlesko. 27Me o Suntho Duxo si šordo pe tumende, taj o Suntho Duxo bešel ande tumende. Taj či trubel tumen ke varekon sičarel tumen. Ke o Suntho Duxo sičarel tumen sa, taj čačo si taj bixoxajmo. Ašen and'o Jesus Kristus sar sičardas tumen lesko Suntho Duxo.
Kana O Kristus sikhadjola
28Jo, mure šavora, ašen and'o Jesus Kristus. Atunči či darasa kana o Kristus sikhadjola, taj či trubul te garadjuvas lažavesa kana vo avela. 29Žanen ke vo si vorta, taj atunči ačaren vi tume ke sako kaj trajil vorta lestar si kerdjilo.
Επιλέχθηκαν προς το παρόν:
1 Johannes 2: LOV1984
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© Det Norske Bibelselskap (Norwegain Bible Society) 1984