Mateo 8
8
Jesús kjuínchekito̱he jína ijnko chojni chónta chin lepra
(Mr. 1:40-45; Lc. 5:12-16)
1A̱ndá ti ó kꞌuínkaji̱nxi̱n chꞌin Jesús ti ijna̱ la itsjé chojni chréhe̱. 2La kóchjina ijnko nkexro níhi chónta chin lepra la kjuákꞌexín tochꞌin nkayakon chꞌin Jesús la ndáchro:
―Ti tjinkaoan la chrókjui̱nchekito̱héni jína.
3Ndá chꞌin Jesús kjuakꞌetja tja ti nkexro a, la ndáchro:
―Jeén tjínka̱oan, tito̱ha jína.
Ndá tuénxín kuito̱he jína ti chꞌin níhi la ó kjuìin ti chin.
4 #
Lv. 14:1-32. *Ndá ndáchro chꞌin Jesús:
―Chenkahya ninkexró. Jehó itjia ti itjen ti ncha̱tꞌá kixin tsꞌikon kixin kuito̱ha jína la tjiko̱a ti nkehe kꞌue̱to̱an Moisés kixin xi̱kaha tso̱noexín kaín chojni kixin kuito̱ha jína ―ichro chꞌan.
Kuito̱he jína ijnko nkexro chꞌehe ixra̱ ijnko capitán
(Lc. 7:1-10)
5Ti ó kꞌuíxehen chꞌin Jesús Capernaum, la kóchjina ijnko capitán romano la chrónòa, 6ndáchro:
―Ndo̱eni itjen ijnko nkexro chꞌexín ixra̱ la níhi tjetsínka, tsíkꞌen to̱té#8:6 tsíkꞌen to̱té paralítico la imá tjasóte.
7Ndá chꞌin Jesús kjuáte̱he ndáchro:
―Itsjia si̱ntakito̱ha̱ jína ti nkexro a.
8Ndá ti capitán kjuáte̱he ndáchro:
―Náhí, tósuéhe̱ni kixin tsꞌixe̱hén ti ndo̱eni kixin jehya chojni jínani. Jehó této̱an, ndá ti ndasoá chꞌexín ixra̱ ndo̱eni la tsito̱he jína. 9Janhan la kja̱xin chonta chojni tꞌe̱tue̱hen ti janhan la ko kja̱xin janhan tétua̱nha̱n ti sin soldado. Ti ó tétua̱nha̱n ijnko sin sátsji sin la sátji sin, ti tétua̱nha̱n ijnko sin tsoxrakoa sin la xrakoa sin. La ko ti ó tétua̱nha̱n ijnko nkexro sichꞌe ixra̱, la ichꞌe ixra̱.
10Ndá ti ó kuíhin chꞌin Jesús xi̱kaha la kóchéhe̱ chꞌan kixin xi̱kaha ichro ti nkexro a, ndá chenka chꞌan ti sin chréhe̱, ndáchro chꞌan:
―Chaxín ndáxrja̱n kixin kuenté Israel la kꞌuitjáhya ninkexró titekaon xi̱kaha éxi titekaon ti nkexro i. 11#Lc. 13:29.*Janhan ndáxrja̱n kixin nchónhña chojni tsji̱xi̱n sin nó tji̱to̱xin ña̱o la ko ti tjiátóxin ña̱o la tsꞌejótja̱xi̱n sin sinieko sin Abraham, Isaac la ko Jacob ti itjen ti kjuachaxin kuènté Díos itjen nkaya nka̱jní. 12#Mt. 22:13; 25:30; Lc. 13:28.*A̱ndá ti sin chrókꞌuejó ti itjen Díos tꞌe̱to̱an, la tsꞌaxrjexín sin ntiha, sátsji sin ti sítie la ntiha tsotsjánka sin la sinietaón ñeno sin.
13Ndá kjuixin la nixje̱he̱ chꞌin Jesús ti capitán ndáchro:
―Sátjia ndo̱a. Éxi kuitekaoan la xi̱kaha tsoxiteyá.
A̱ndá ti nkexro chꞌexín xra̱ la tuénxín ti hora a tsíkito̱he chꞌan jína.
Jesús kjuínchekito̱he jína ichꞌe̱e Pedro
(Mr. 1:29-31; Lc. 4:38-39)
14Ndá sákjuí chꞌin Jesús ndo̱e Pedro la ntiha kꞌuíkon chꞌan kixin ti ichꞌe̱e Pedro la níhi tjan tjetsínka tjan, chónta tjan sóa. 15Ndá chꞌin Jesús la itsé chꞌan itja tjan la tuénxín kjuìihin tjan ti sóa, la kꞌuínkatjen tjan la kóyaxíhin tjan la kjuajon tjan nkehe kjónie sin.
Jesús kjuínchekito̱he jína itsjé si̱níhi
(Mr. 1:32-34; Lc. 4:40-41)
16A̱ndá ti ó kóntanonte, la kjui̱kohe sin Jesús nchónhña chojni chónta ncha̱kuén jínahña. La jehó nixja chꞌin Jesús la kꞌuaxrje ncha̱kuén ti jínahña, la kja̱xin kjuínchekito̱he chꞌan jína kaín ti si̱níhi. 17#Is. 53:4.*Mé xi̱kaha kjuíchꞌe chꞌan kixin xiteyá ti nkehe tsíchronka Isaías ósé, ndáchro: “Jehe chꞌan kuákja chꞌan ti ichin chóntani la ko kuamá chꞌan ti kjuatjoté kuènténi.”
Ti sin tjinkaon chróchréhe̱ Jesús
(Lc. 9:57-62)
18Ndá ti ó kꞌuíkon chꞌin Jesús kixin itsjé chojni kua̱ntátjen ti jehe chꞌan la kꞌue̱to̱an chꞌan kixin sátsji sin ti íjnko chrínta nda̱ñao. 19Ndá ijnko maestro tjako ley mé kóchjinehe ti chꞌin Jesús la ndáchro:
―Maestro, tjinkaoni tsochréhe̱ni ti jaha kjónté nketí sátsjia ―ichro chꞌan.
20Ndá chꞌin Jesús, ndáchro:
―Ti koxróntá la chónta itjue̱é la ko ti koxroxe la chónta ka̱ké. A̱ndá ti Xje̱en Díos kꞌóna Chojni la chóntahya nketí tso̱kꞌèxín.
21A̱ndá ijnko ti chojni kꞌuájiko chꞌin Jesús, mé ndáchro:
―Ìnchéni, ti̱to̱héni sa̱o tsíkja̱váni ti itꞌéni.
22Ndá kjuáte̱he chꞌin Jesús, ndáchro:
―Chréhé ti janhan. La tito̱hé ti chojni tsíkꞌen tsja̱vá kícho.
Jesús kjuasitán ti xri̱nto̱ la ko ti ìnta̱
(Mr. 4:35-41; Lc. 8:22-25)
23Ndá kjuixin la chꞌin Jesús la ko ti sin kꞌuájiko chꞌan kꞌuíxehen sin ti ntabarco la sákjuí sin. 24La xrína̱hña imá chjéhe xri̱nto̱ la ti ìnta̱ la chrika la ó chjina tsꞌáñákí ìnta̱ ti ntabarco. Kjánchó chꞌin Jesús la tjejua chꞌan. 25Ndá ti sin kꞌuájiko chꞌin Jesús la kjuínchekjaye̱he̱ sin chꞌan, ndáchro sin:
―Ìnchéni, nchekaáni kixin ó tjejótꞌániankíni ìnta̱ ―ichro sin.
26Ndá chꞌin Jesús kjuáte̱he, ndáchro:
―¿Nkekuènté imá chrakonra? ¿Xá ntsíkoá titekáonra Díos ní?
Ndá kꞌuàya chꞌan la kꞌue̱tue̱hen chꞌan ti xri̱nto̱ la ko ti nda̱ñao kixin tsꞌixitán, landá tuénxín kꞌuixratá. 27La ti sin kꞌuájiko chꞌan la imá chrákon sin la ndáchro sin:
―¿Xá nkexro tíhi kixin kjónté ti xri̱nto̱ la ko ti nda̱ñao la titekakohen? ―ichro sin.
Ti sin chónta ncha̱kuén jínahña tjejó Gadara
(Mr. 5:1-20; Lc. 8:26-39)
28Ndá ti ó kꞌuatsínka chꞌin Jesús ti nda̱ñao, la kjuíji sin chjasin Gadara. La yaá chojni chónta ncha̱kuén jínahña kꞌuaxrjexín ti tsíxravá chojni, la kóchjinehe sin chꞌan. Jehe sin mé imá jie̱he sin la kohya nkexro tjacha tꞌatsínka ntiha. 29Ndá kjuankíxin kꞌóyako sin ndáchro sin:
―Tjiatéhya ti nkehe ichꞌeni, jaha Jesús Xje̱en Díos. ¿Á kꞌuinka ntihi kixin si̱nchekjasóteni kjónté na̱xa̱ kjuixrakánhña ti ña̱o tsjasóteni, ní? ―ichro sin.
30Kja̱xin chjinaxón ntiha xrinie itsjé kochíno. 31Landá ti ncha̱kuén jínahña mé chrónoéhe̱ chꞌin Jesús ndáchro:
―Ti tséto̱an sátsjixini ntihi la tjánjua kjuachaxin tsꞌixeheni a̱sén ti kochíno.
32Ndá chꞌin Jesús ndáchro:
―Ti xi̱kaha la sátjira.
La kaín ti ncha̱kuén jínahña kꞌuaxrjexín ti chojni la kꞌuíxehen ti kochíno. Ndá kaín ti kochíno la kuinká va, sákjuí va nó tsa̱ka, la kꞌuitsínkankí va ìnta̱, la kjuihin va la ikꞌuén va.
33Landá ti chojni tꞌayakohen ti kochíno mé chrakon sin, la kuinká sin, sákjuí sin chjasin la chrónka sin kaín ti nkehe kóhen la ko nkexrín kóhen ti sin kꞌuéchónta ncha̱kuén jínahña. 34Ndá kaín ti sin chjasin sákjuitsjehe sin, la kjuíji sin ti itjen chꞌin Jesús ndá kꞌuíkon sin kixin xi̱kaha kóhen la chrónòa sin kixin sáchrókjuixin chꞌin Jesús ntiha.
Επιλέχθηκαν προς το παρόν:
Mateo 8: poeNTplus
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2016, Wycliffe Bible Translators, Inc. All rights reserved.