ADUNHEL 14
14
Aikoniyam Rongsoyok Kidam
1Aikoniyam rongpe long, anali bang-hini inansi Jihudi hel kachirdom ahem lut damsi, ladi si lamthe thano, aro ako-ong Jihudi aro Grik arleng krolo. 2Manta kikrolkre Jihudi abang, kikrol kortehel kapangho yok, Bang-ajat arleng helyok pachonsalsi chipalang set-set otelo. 3Lasi adun hel lalong jokha adinyok dosi, potsi Hemphu anali arideng asin aro asombhik asal paklango, anang kajinso alamthe hakhi pilo, labang Hemphu long chipangtang dutsi paharo. 4Manta rongpe arleng hel bhak-ni chiphlaksi, angkhanke Jihudi hel aga, aro angkhanke adun hel aga chiplango. 5Laparake Bang-ajat pen Jihudi hel aro anali phu-phang hel chiloksi adun hel yok aduk kipiyok aro arlong kiwar yok chipachip mo, 6anali labang alampo than un si, Lekaniya alongri Lestra pen Darbe rongpe, aro adung arel kido angbong yok katsi, 7lalong anali kime-alamthe paharo.
Lestra Pen Darbeyok Kidam
8Lestra rongpe long keng-kam kachijor un-eh, akeng ajakong wesi kiplang para konga arleng ihut iningsi Pol po alam onesi kido. 9Lalong anang Pol po yok lang-etsi, kime ayok anang kikrolpo theksi, asi pathesi pulo, “Akeng long chipathir chipakengne thurnot.” 10La-amunsi arlengpo chon hrapsi ingthursi, akeng damworo. 11La-amun rat abang Pol po katiki asal theksi, Lekaniya alam pen hangsi pulo, “Arnam arleng hel amahang ensi, ili dungyok wang suno!” 12Aro anali Barnabas poyok Jihudi amen Dupitor ero, aro Pol po lam kithan thek apotsi, anang men ke Harmes ero. 13La-aphel rongpe adung kido Jeus arnam abangthe po ijon chal pen mirsang ensi owapo adung yok wano. Piyok pu tene rat abang adun hel aphan buli karkli yok wango. 14Manta Adunhel, lake Barnabas po aro Pol po labang alampo arju hlongsi, anali pehel ingseksi, rat adung dam phitsi hangsi pulo, 15“Ei arleng hel, labadi asal piyok tikido? Halita nali badisi kime-kangho pen kido arlengsi. Inghosi, athak, pirthimi pe, langpe aro lalong kido ahuwit abihini yokta sanselo, 16aro aporong adin, ahuwit ajat hel yok abithang kar-ih aduwar kengkam kachijor yok tikango, 17layongta bor-eh batsi naliyok inghun para arwe pajang pilo, athe kipawang abotor pisi, an pen neng rongsi nali neng pangsamsi, anang hakhi weleng ke tikangke yongot, labadi ajiuli pen Arnam, anangyok nali labang apharan kangwe arnam hel para neng kapharlep yok, hali nali ngot kime-alamthe pahar do. 18Labang hel than tangsi, adun hel analiyok buli papipe aphan arleng helyok anali teng klak ngo. 19Lalong para Antiyok pen Aikoniyam rongpe angkhan Jihudi arleng lalong wangsi, arleng helyok nengrungsi, Pol po yok arlong pawaro; aro anang thilo pusi chironsi, rongpe para mokolyok wungsi pono. 20Manta kikrol adun hel chikom-plengsi karjap amun si, anang thursi rongpe long lut damo; aro la-aphel arni Barnabas po pen Darbe rongpe yok damo.
Sisiriya Para Antiyokyok Chirulsi Kiwang
21La-aphel Pol po pen Barnabas po la rongpe long kime-alamthe paharsi ako-ong Adun otesi, Lestra, Aikoniyam, aro Antiyok yok chirul phakngo; 22aro “Ili ako-ong duk chihi tangsi Arnam-alongri lut dam nange,” pusi krol thipsi lamthe paklangsi, adun hel anang pachipmo. 23Aro anali phan kachikruk ten long phu-phang peksi, pingkit si aro an-humsi, Hemphu arideng kapingkit pen an humsi pekngo. 24Lapara anali Pisidiya alongri arpat hletsi Pamphiliya alongri yok damo, 25Perga long anali Arnam alam thansi Ataliya rongpe yok damo. 26Lalong para anali jipe asal pachok ango, labang asal anat rongpe long anali yok Arnam kajinso kipek tango, labang Antiyok yok tilong pen wango. 27Anali Antiyok long hlengsi kachikruk arleng helyok athawol pangrumsi, Arnam anali pen dosi la-an akithe asal tikilo, aro anang Bang-ajat ayok kikrol aduwar ingpu phleno, lamehel panirsi than detno. 28Aro anali kikrol dun abang pen jokha arniyok dolo.
Επιλέχθηκαν προς το παρόν:
ADUNHEL 14: AMRI-BSI
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
AMRI KARBI N.T. - AKIMI ANGTON N.T.
Copyright © 2014 by The Bible Society of India
Used by permission. All rights reserved worldwide.