Hechos 9
9
Ri Saulo ndutaqij ri Jesús
(Hch. 22:6-16; 26:12-18)
1Chupan ri tiempo riꞌ, ri Saulo ma ndeqꞌax ta ri royowal chikij ri kitaqin ri Ajaw#Hch. 8:3 y ndubꞌij chake chi ngerukamisaj. Romariꞌ xbꞌechꞌaꞌa chare ri más nimalej ruqꞌij sacerdote, 2y xukꞌutuj chare chi ketzꞌibꞌex e wuj chake ri eꞌukꞌuey bꞌey chikiwech ri ndikimal kiꞌ pa teq sinagoga pa tinamit Damasco chin tikitoꞌ chikikanoxik ri koqan ri kꞌakꞌakꞌ Bꞌey#Hch. 19:9 xukꞌut kan ri Jesús. Y keriꞌ, chi achiꞌaꞌ chi ixoqiꞌ xkerutzꞌen, xkeruxim y ngerukꞌuaj pa tinamit Jerusalén chin ndiqꞌat tzij pa kiwiꞌ. 3Pero atoq rutzꞌamon bꞌey y chunaqaj chik ri tinamit Damasco bꞌaneq, kꞌateꞌ ruwech xyikꞌan pe chikaj jun luz ri tzꞌan ruchuqꞌaꞌ y xuyikꞌaj ri Saulo.#1Co. 15:8 4Rijaꞌ xtzaq pa ulew, y xrakꞌaxaj jun chꞌabꞌel ri kereꞌ xubꞌij chare: ¡Saulo! ¿Achike roma yin atzeqlebꞌen chin ndabꞌen itzel chuwa?
5Y ri Saulo xubꞌij: ¿Achike kꞌa rat, Ajaw? Y ri jun ri xchꞌaꞌa pe chare kereꞌ xubꞌij: Ja riyin ri Jesús ri atzeqlebꞌen chin ndabꞌen itzel chuwa.#1Ti. 1:13 6Pero wokami kayakatej, katok apu pa tinamit, y chiriꞌ ndibꞌix chawa achike ndikꞌatzin chi ndabꞌen.
7Ri achiꞌaꞌ ebꞌaneq junan rikꞌin ri Saulo tzꞌan kixibꞌin kiꞌ xepeꞌeꞌ qa y ma ndel ta kichꞌabꞌel, roma qetzij chi ndikakꞌaxaj ri chꞌabꞌel, pero ma jun wineq ndikitzꞌet ndichꞌaꞌa. 8Ja atoq riꞌ ri Saulo xyakatej pe pa ulew, pero atoq xujeq ruwech, ma nditiker ta nditzuꞌun. Romariꞌ, yuqen chiruqꞌaꞌ xukꞌuꞌex apu pa tinamit Damasco. 9Oxiꞌ qꞌij ma xtiker ta xtzuꞌun y ma jun achike xukꞌux nixta xutij.
10Chiriꞌ pa tinamit Damasco kꞌo jun hermano rubꞌiniꞌan Ananías,#Hch. 22:12 ri achoq chuwech xuqꞌalajrisaj riꞌ ri Ajaw pa jun achel achikꞌ. Ri Ajaw kereꞌ xubꞌij chare: ¡Ananías! Y ri Ananías xubꞌij: ¿Achike ndawojoꞌ, Ajaw?
11Y ri Ajaw xubꞌij chare: Kayakatej, takꞌuaj ri bꞌey ri ndibꞌix Chojmilej Bꞌey chare y atoq ngabꞌeqaqa chirachoch jun achi rubꞌiniꞌan Judas, takꞌutuj razón apeꞌ ndawil jun achi aj tinamit Tarso rubꞌiniꞌan Saulo. Rijaꞌ wokami ndubꞌen orar, 12y pa jun achel achikꞌ xutzꞌet chi kꞌo jun achi rubꞌiniꞌan Ananías ndeqaqa rikꞌin, y nderuyaꞌ ruqꞌaꞌ pa ruwiꞌ chin nditzuꞌun chik jumbꞌey.
13Pero ri Ananías xubꞌij: Ajaw, ekꞌiy wineq kibꞌiꞌin chuwa chi ri jun achi riꞌ santienta itzel#Hch. 8:3; 9:1 teq achike rubꞌanun chake ri loqꞌolej teq awalkꞌuaꞌl pa tinamit Jerusalén. 14Y ri sacerdotes israelitas más kꞌo ruchuqꞌaꞌ kitzij kiyoꞌon pe uchuqꞌaꞌ pa ruqꞌaꞌ chin ngerutzꞌen e konojel ri rat kitaqin chireꞌ pa tinamit Damasco.
15Pero ri Ajaw xubꞌij chare: Rat taꞌakanoj ri Saulo, porque riyin nuchaꞌon#Hch. 13:2; Ro. 1:1, 5 chin nderuyaꞌ utzulej nutzijol chake ri ma israelitas ta,#Hch. 22:21; Gá. 2:7, 8 chake reyes#Hch. 26:27, 28 y chake ri israelitas chuqaꞌ. 16Y riyin nikꞌut chuwech janipeꞌ kꞌayew#Hch. 20:23; Col. 1:24 nderuqꞌasaj roma nderuyaꞌ utzulej nutzijol, xchajeꞌ.
17Ri Ananías xbꞌa, y xok apu pa achoch apeꞌ kꞌo ri Saulo. Atoq xuyaꞌ ruqꞌaꞌ pa ruwiꞌ ri Saulo, kereꞌ xubꞌij chare: Hermano Saulo, ri Ajaw Jesús ri xukꞌut riꞌ chawech atoq rat pataneq pa bꞌey, xiruteq pe chiꞌatzꞌetik chin ngatzuꞌun chik jumbꞌey, y chin ndinoj awánima#Hch. 2:4; 4:31; 13:52 rikꞌin ri Espíritu Santo, xchajeꞌ ri Ananías.
18Ja atoq riꞌ xetzaq e ri eꞌachel rij ker pa teq ruwech ri Saulo, y xtzuꞌun chik jumbꞌey. Xyakatej kꞌa pe y xbꞌan bautizar. 19Y atoq xwaꞌ yan, xkꞌojeꞌ chi pe ruchuqꞌaꞌ. Y xkꞌojeꞌ jun tiempo kikꞌin ri kitaqin ri Ajaw pa tinamit Damasco.#Hch. 26:20; Gá. 1:17
Ri Saulo ndutzijoj rutzij ri Dios pa tinamit Damasco
20Ri Saulo kin ja paqiꞌ xutzꞌuk ndok pa teq sinagogas chin ndutzijoj chi ri Jesús kin Rukꞌajol wi ri Dios. 21Y konojel ri aj Damasco ri ngeꞌakꞌaxan richin ri Saulo, ndisach kikꞌuꞌx y ndikibꞌilaꞌ: ¿Ma ja ta kꞌa achi reꞌ, ri juyo kiwech ndubꞌen chake ri ngeyoꞌon ruqꞌij ri Jesús#Hch. 8:3; Gá. 1:13, 23 pa tinamit Jerusalén? ¿Ma xuqaqa ta kꞌa chireꞌ pa tinamit Damasco chin ngeruxim konojel ri ngeyoꞌon ruqꞌij ri Jesús chin ngerukꞌuaj chikiwech ri sacerdotes israelitas más kꞌo ruchuqꞌaꞌ kitzij? ngechajeꞌ.
22Pero ri Saulo qꞌij-qꞌij más nditiker ndichꞌaꞌa pa ruwiꞌ ri Ajaw Jesús chake ri israelitas pa tinamit Damasco, y ndusuqꞌ kinoꞌoj porque ndukusaj ri rutzij ri Dios chin ndukꞌut chi ja ri Jesús ri xtaq pe roma ri Dios chukolik ri rutinamit.
Ri Saulo ndanimej chikiwech ri ruwinaqul
23Atoq kꞌiy chik tiempo tikꞌojeꞌ ri Saulo pa tinamit Damasco, ri israelitas jun ruwech kitzij xkibꞌen chin ndikikamisaj. 24Chi chaqꞌaꞌ chi paqꞌij kichajin ri puertas chin ri tinamit, roma ndikajoꞌ ndikikamisaj.#2Co. 11:32 Pero ri kinojin xbꞌeqaqa rutzijol pa ruxikin ri Saulo. 25Romariꞌ ri ru-discípulos ri Saulo, pa jun tokoqꞌaꞌ xkiyaꞌ e chupan jun chakech, xkiqasaj qa chuwech ri xan#Jos. 2:15; 1S. 19:12 chin ri tinamit chin xkelesaj e y xbꞌa.
Ri Saulo ndeqaqa pa tinamit Jerusalén
26Ri Saulo xbꞌeqaqa pa tinamit Jerusalén,#Hch. 22:17 y xrajoꞌ xbꞌekꞌojeꞌ chikikajal ri kitaqin ri Ajaw chiriꞌ, pero konojel ndikixibꞌij kiꞌ chuwech, y ma ndikitaqij ta chi rijaꞌ rutaqin chik ri Jesús. 27Pero ri Bernabé chin xutoꞌ ri Saulo, xukꞌuaj chikiwech ri apóstoles,#Gá. 1:17, 18 xutzijoj chake chi ri Saulo xutzꞌet ri Ajaw pa bꞌey, xutzijoj chuqaꞌ chake chi ri Ajaw xchꞌaꞌa chare ri Saulo, y chi ri Saulo ma xuxibꞌij ta riꞌ xuyaꞌ rutzijol ri Jesús chake ri wineq pa tinamit Damasco. 28Y keriꞌ, ri Saulo xkꞌojeꞌ pa tinamit Jerusalén, ndel-ndok kikꞌin ri apóstoles, y ma nduxibꞌij ta riꞌ ndichꞌaꞌa pa ruwiꞌ ri Ajaw Jesús. 29Nditzijon chake ri israelitas ri ngechꞌaꞌa pa chꞌabꞌel griego, y nduchuquchaꞌ riꞌ chi tzij kikꞌin, pero ri israelitas riꞌ#2Co. 11:26 xa ndikikanolaꞌ rukamik. 30Atoq ri hermanos xkinabꞌej chi ri wineq ndikajoꞌ ndikikamisaj ri Saulo, xkikꞌuaj qa pa tinamit Cesarea,#Hch. 8:40 y atoq ekꞌo chiriꞌ, xkiteq pa tinamit Tarso.#Hch. 9:11
31Chupan ri tiempo riꞌ, ri hermanos aj rochꞌulew Judea, aj rochꞌulew Galilea y aj rochꞌulew Samaria, ma ngetzeqlebꞌex chi ta chin ndibꞌan itzel chake. Ri hermanos ndikinimaj ri Ajaw y ndikꞌiy ri kikꞌaslen, y más wineq ndikitaqij ri Ajaw, porque ri Espíritu Santo ngerutoꞌ.
Ri apóstol Pedro ndukꞌachojrisaj jun achi rubꞌiniꞌan Eneas
32Atoq ri Pedro ndajin chikitzꞌetik ri loqꞌolej teq ralkꞌuaꞌl ri Dios ekꞌo pa teq tinamit, xebꞌerutzꞌetaꞌ chuqaꞌ ri ekꞌo pa tinamit Lida. 33Chiriꞌ xril jun achi rubꞌiniꞌan Eneas, ri ja waqxaqiꞌ junaꞌ tikotzꞌeꞌ chuwech ruwarabꞌel roma kamineq ruqꞌa-raqen. 34Ri Pedro kereꞌ xubꞌij chare: ¡Eneas! Ri Ajaw Jesucristo ngarukꞌachojrisaj.#Hch. 3:6; 4:10 Kayakatej y tabꞌanaꞌ rukꞌojlen la awarabꞌel, xchajeꞌ.
Y kin ja paqiꞌ xyakatej pe ri Eneas. 35Y ri aj tinamit Lida y ri aj tinamit Sarón,#1Cr. 5:16 atoq xkitzꞌet ri xbꞌanatej rikꞌin ri Eneas, xkiyaꞌ kan ri itzel kꞌaslen kikꞌuan y xkitaqij ri Ajaw.#Hch. 11:21
Jun ixaq rubꞌiniꞌan Dorcas ndikꞌojeꞌ chi pe rukꞌaslen
36Ri tiempo riꞌ, pa jun chik tinamit rubꞌiniꞌan Jope, kꞌo jun ixaq rubꞌiniꞌan Tabitá, ri pa chꞌabꞌel griego ndubꞌij tzij Dorcas. Ri ixaq riꞌ santienta utz ndubꞌanalaꞌ#Pr. 31:20; 1Ti. 5:10; Stg. 1:27 chake ri wineq, y ngerutoꞌ ri maneq ok kichajin. 37Chupan teq ri qꞌij riꞌ, ri Dorcas xutzꞌen qa yabꞌil y xken. Y atoq xchꞌaj yan ri ru-cuerpo, xukꞌuꞌex e pa rukan nivel chin ri jay. 38Y roma ri tinamit Lida ma nej ta kikajal rikꞌin ri tinamit Jope, y roma ri discípulos xkakꞌaxaj chi ri Pedro kꞌo pa tinamit Lida, xekiteq kaꞌiꞌ achiꞌaꞌ apeꞌ kꞌo ri Pedro, chin xbꞌekikꞌutuj kamelal chare chi tipuꞌun paqiꞌ chikij pa tinamit Jope.
39Atoq ri Pedro xrakꞌaxaj ri xbꞌebꞌix chare, xyakatej paqiꞌ y xbꞌa chikij ri kaꞌiꞌ achiꞌaꞌ, y atoq xebꞌeqaqa pa tinamit Jope, xkikꞌuaj e ri Pedro apeꞌ libꞌan ri ámna. Y konojel ri malkaꞌ teq ixoqiꞌ ngeꞌoqꞌ xebꞌeqaqa chuwech ri Pedro, y ndikikꞌut ri tzieq rubꞌanun ri Dorcas chake atoq kꞌa kꞌes. 40Ja atoq riꞌ ri Pedro xerelesaj pe konojel saqil,#Mt. 9:25 y xxukeꞌ qa chin xubꞌen orar.#1R. 17:19-23; 2R. 4:32-36 Xtzuꞌun apu rikꞌin ri ámna, y xubꞌij: ¡Tabitá, kayakatej! xchajeꞌ chare.
Ja atoq riꞌ ri ixaq xujeq ruwech y atoq xutzꞌet ri Pedro, xtzꞌuyeꞌ pe. 41Ri Pedro xutzꞌen chiruqꞌaꞌ ri Tabitá y xutoꞌ chin xpeꞌeꞌ pe, y ja atoq riꞌ ri Pedro xeroyoj ri hermanos y ri malkaꞌ teq ixoqiꞌ y xukꞌut chikiwech chi ri Dorcas xkꞌojeꞌ chi pe rukꞌaslen. 42Re xbꞌanatej rikꞌin ri Dorcas, xetamex koma konojel ri ekꞌo pa tinamit Jope, y ekꞌiy xkitaqij ri Ajaw. 43Y kꞌiy tiempo xkꞌojeꞌ ri Pedro pa tinamit Jope chirachoch jun achi rubꞌiniꞌan Simón.#Hch. 10:6 Ri achi riꞌ ngerutzek y ngeroqꞌomaj kitzꞌumal chikap chin ngerusamajij.
Επιλέχθηκαν προς το παρόν:
Hechos 9: cakX
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2015, Wycliffe Bible Translators, Inc. All rights reserved.