Luk 9
9
Iesu misil lelen moletin lu e le tei (12) nan tengan ha lihithiten longeongen hos
Mat 10:5-15; Mak 6:7-13
1Iesu mikes viton moletin nan xil xa labe lu e le tei (12). Di, misa xeihen mi xil tengan likila ti lihol rerat ninin tesa e lileh rerat mesien savsav xil ra moletin xil. 2Di, Iesu misil lelen xil laba tengan ha lisetu usil lelaxatien na Hi e meulien na moletin xil e suse xa mei ihe suv toto nae ixo en, e ha lileh rerat mesien ra moletin xil.#Luk 10:5-7; 10:10-11; Pol 13:51 3E biteni mi xil bit, “E kakaoen namim, munaleh ti neta natel xat xamim. Reitin, munaleh ti eitingil, ateli, mu mani. Munahur ti eising mu anien. 4Melele xa muhe rute tei, xosxa moletin tei nggur pilei xamim e nim man, ma muti kat en ituxoh melele xa muhe reling rute ak. 5E xosxa moletin xil linahur pilei xamim ti e metimal tei, ma melele xa muheling rute ak, muhas rerat meas te rute ak ra lemim pe metexil. Ngan ak ihe selxatien mi xil xa Hi pus sexien tesa nae e isa rilomun ni mi xil.”
6Melele xa Iesu misepin mi xil bus, moletin nan xil lamea laba labe metimal xil vus e di lasetu usil longeongen hos na Hi. E xil laleh rerat mesien ra moletin xil e rute xil vus xa laba en.
Suv toto Herod ien bei vakil ti xa Iesu be visi
Mat 14:1-12; Mak 6:14-29
7E melengien nen ak, Herod Antipas be suv toto te provins te hal Kaleli. Melele xa milong usil holesok xil xa Iesu di pol ni, minem holu usili vengan xa rut moletin ngan xil di latumul holu usili. Rute xil labit Iesu be Sion Baptis xa temea rilomun ra maten.#Mat 16:14; Mak 8:28; Luk 9:19 8Rute sav xil di labiteni xa xi be provet Ilaetsa xa mistal rilomun xiak, e rut moletin xil mun di labiteni xa provet tei tetiamu temea rilomun ra maten. 9E Herod biteni bit, “Inou vari tang iaxa natesemae ni tengan lita xoteh vat Sion temese. ?E visi vari iaxa di nalongeong usili xiak?” Ve rin ak, misak tengan vapus ti Iesu.#Luk 23:8
Iesu pol ni merekel tengan vasa anien mi moletin xil xa lali taosen lim (5000)
Mat 14:13-21; Mak 6:30-44; Sion 6:1-15
10Melele xa moletin xil na Iesu lapol bus, ladilomun e lasep mesen ni mini holesok xil xa ba latepol ni. Ma Iesu mileh kes ni xil ba labe taon tei xa lakesi ni ‘Betsaeta.’ 11E melele xa vanut moletin ngan xil lalongeong ni xa Iesu ba, lamea e langgusili. E melele xa Iesu pus xil, nggur pilei xil e di misetu mi xil usil lelaxatien na Hi e meulien na moletin xil e suse xa mei ihe suv toto nae ixo en. E ngan xil xa lamesei, Iesu mileh rerat mesien ra xil.
12Iesu pol del moletin xil ba vuma … eai ba minu. Ma moletin nan xil xa labe lu e le tei (12) lamei visali e labiteni mini labit, “Rute ak be toun ut e da be vongien tuei xiak. Bos xa usil rerat vanut moletin xil ak liha lihe metimal xil mu rute sav xil tengan ha likamet anien ae e ut te paten mae.”
13E Iesu biteni mi moletin nan xil bit, “Xamim tang musa anien mi moletin xil tengan lia ni.”
E labit rilomun ni mini labit, “!Ei! ?Mupol ni itep? Pusi xiak, xamem maleh xat beret be lim (5) e meseo be lu (2) tang. ?Midep? ?Iem bei mava maxal ti anien vapin mi vanut moletin xa be mahulong xiak?” 14(Tata xil vus xa ladi e melele nen ak sangas labe taosen lim (5000), e atou e horamue xil latavuli xil ti.)
Ma Iesu biteni mi moletin nan xil bit, “Ha museti moletin xil ha litotan e vanute xil xa moletin xil sangas lihe hanutap lu e he xalu mun (50) liti e vanute tei.”
15Ma moletin nan xil lapol usil naha xa xi biteni, misak ni moletin xil vus ladotan. 16Di, Iesu mileh beret lim del meseo lu xiak, e miketeh be nesao e misa memesien mi Hi ven. Di, bul papas beret e meseo xil e misa ni mi moletin nan xil tengan ha liseti mi vanut moletin xil. 17 Moletin xil vus langganien kuhi e vange polu. E melele xa moletin nan xil laleh viton rut anien xil xa moletin xil latea lingi, lase ni be valeat lu e le tei (12) xa lapolu ni.#2King 4:44
Pita bit rati xa Iesu be Mesaea xa Hi tehit xati
Mat 16:13-28; Mak 8:27–9:1
18Vatei, Iesu di misis tasen tang e moletin nan xil ladit sangas. Di, Iesu biles e misis xil bit, “?Vanut moletin xil di labiteni xa inou nabe visi?”
19E labit rilomun ni mini labit, “Rut moletin xil labit obe Sion Baptis. E rute ngan xil labit obe provet Ilaetsa. E rute sav xil mun labit xouk obe provet tetiamu xa temea rilomun ra maten.”#Luk 9:7-8
20E Iesu misis pilei xil bit, “?E xamim, ma midep? ?Mubit inou nabe visi vari?”#Sion 6:68-69
E Pita mitamea e bit rati bit, “Xouk, obe Mesaea xa Hi tehit xati tengan imei.”
21Di, Iesu misep xol xil tengan linavit sepinien ak ti mi moletin sav xil. 22E biteni mi xil bit, “Hi teling xati ngamu tengan inou, Nat Moletin, ti nilong pangas inou ihe holu. E elda xil na Siu xil, vat xil na pris xil, e titsa xil te rae na Mosis, xil ngasen ti lisin nou e lihas vin nou. E melele xa melengien tol mei itavi, nimea rilomun ra maten.”#Mat 16:21; 20:18-19; Mak 8:31; 10:33-34
23Di, Iesu biteni mi xil bit, “Xosxa moletin tova ien bei tengan ihusil nou, ma istokovein holesok xil te meulien nan. Ti, e melengien xil vus, ipo eivave te maten nan e ihusil xat nou.#Mat 10:38; Luk 14:27 24Vengan xa moletin xa misak pisi tengan ikenin meulien nan ve xi tang, ma meulien nan ikesae ra ni. E moletin xa di maen meulien nan ikesae vengan xa di nggusil xat inou, ma, e ut nesao, xi ikamet meulien sal.#Mat 10:39; Luk 17:33; Sion 12:25 25?Naha ihos xosxa moletin tei ileh holesok xil vus te ut etan ak, e istokovein meulien sal nan tengan ileh holesok xil ak? !Navos ti vari! 26Xosxa moletin tei be unoun tengan vahit rati xa di nggusil nou e pispisien navan xil, ma inou mun, Nat Moletin, nihe unoun ni e melele xa itilomun itel masxaxa eo xil e minehinen te xeihen navan, e itel xeihen xa Tata navan isa ni minou.#Mat 10:33; Luk 12:9; 2Tim 2:12 27Reitin li nabiteni mi xamim xa rut xamim xa di lasoh del nou xosali, ti lipus neta tei mei istal e melele xa lameul tamu ladi xa ipisen ni xa xeihen te lelaxatien na Hi bemei ngamu.”
Minehinen te xeihen na Hi bemei e Iesu
Mat 17:1-13; Mak 9:2-13
28Melele xa melengien tol e he sav (8) mei mitavi xa Iesu tehit kil holesok xil ak mi moletin nan xil, xi be nesao e vathu tei tengan vasis, e nggur Pita, Sion e Temis latnggusili. 29-32E melele nen ak, Pita, Sion e Temis, met xeihen bas xatel e ba lapat. E melele xa Iesu di misis, valnaon biles, e eising nan mei mieh xa mieh pupu nggoni laet xa mileluv nggeih. E vatakes, moletin lu mun lustal e ba lusepin dela, tei xalu be Mosis, e teimun be provet Ilaetsa. Xalu mun luminehin pupu. Lubit kila mi Iesu xa itep ipol sen polien nan xil e hal Serusalem, ti, imat.#Sion 1:14; 2Pit 1:16
E melele xa holesok xil ak di mistal, Pita, Sion e Temis, lattamea latketeh ba, e lattemanin pupu. Latpusi xa tenbe Iesu di minehin e di misoh del moletin lu mun. 33E latopus kila xa be Mosis xal Ilaetsa iaxa lusepin del Iesu, e sangas lalohe relingi. Ma Pita mea e biteni mi Iesu bit, “!Suv, bos mak mu xa xamem madi tak! Matikili ni horao ihe tol: tei ihe mam, tei ihe ma Mosis, e tei mun ihe ma Ilaetsa.” Pita takil ti naha xa di biteni.
34E melele xa Pita di tamu misepin, momah tei xa mattel miloh bemei da xol xil, e uliatel mikan pupu. 35Di, latolong rae tei nggo momah xa bit, “Ngan ak be Natuxoli xati xa natehosei xa eheien navan di en. !Muteong xat raen!”#Sam 2:7; Aes 42:1; Mat 3:17; 12:18; Mak 1:11; Luk 3:32; 2Pit 1:17
36Melele xa rae ak misepin bus, lattapus ti mun rumali, Iesu kestang di misoh del xatel. E neta xa xatel latopusi, latnggur xati be natel tang. Lattavit pas ti mi moletin sav xil e melele nen xil ak.
Iesu minggol rat ninin tesa ra pol ni horamue tei
Mat 17:14-20; Mak 9:14-29
37E makoe nen, Iesu xatel Pita, Sion e Temis latdilomun latnggo vat hu latomei e tan. E melele xa latomei e tan, lapus vanut moletin xil holu di ladatil Iesu. 38Di, moletin tei xa de hilaep te vanut moletin xil ak mikei ba ni Iesu bit, “!Titsa! Ieok bei xouk li himetu tengan mei upus ti mu natuxoli xa be siskes navan. 39Vengan xa ninin tesa tei da en. E melele xa bemei en, misak ni di mikei nggeih, malili tova tang, e pol ni rurungon mun di misol. Vehakut, ninin tesa ak di purun ni e nggeih pupu tengan vahe relingi. 40Nadakes moletin nam xil tengan lavol rati vahe relingi, e xil lasakras.”
41Melele xa Iesu milonge mak, biteni mi moletin nan xil bit, “!Iva! !Xamim moletin xil te xosali, mukavui e neketen namim tovuol vari! ?Niti visal xamim ituxoh vilieh? Veok buol ni xamim xa neketen namim tovuol.”
Di, misemae ni tame horamue bit, “Hur horamue nam vamei inggak.” 42E melele xa horamue ak di mikakao bemei visal Iesu, ninin tesa xa da en bas tan ni e misak ni mikilkile e tan. Di, Iesu mike xat ninin tesa, ma be reling horamue ak. Di, horamue ak milonge bos mun e Iesu mideli ba misa rilomun ni mi tamen. 43Ngan xil xa ladi sangas lamesep tova tang ni xeihen na Hi xa lapusi.
Iesu bit lelen usil maten nan vatei mun
Mat 17:22-23; Mak 9:30-32
Melele xa moletin xil di labesi xil ve naha xa Iesu tepol ni, xi biteni mi moletin nan xil bit, 44“Xamim muteong kuhi ni sepinien navan. Nave nousav ti, moletin tei isa rat nou, Nat Moletin, nihe he moletin xil te ut etan.”#Luk 18:32 45E moletin nan xil latakil ti koute te sepinien nan vengan xa minggus tamu ra xil. E ulixil mikan tengan lasisi ve kout sepinien nan.#Mak 9:32; Luk 18:34
Iesu pispisi xa visi iaxa be eilep mak mu pe met Hi
Mat 18:1-5; Mak 9:33-40
46Dutou ni melele nen ak, moletin xil na Iesu di langor mi xil mun tang usil visi e xil iaxa be eilep mak mu e xil.#Luk 22:24 47E Iesu mikil nenemien nae. Misak ni, mideli tutut horamue tei bemei, e misak ni mei misoh e rin. 48Di, biteni mi xil bit, “Moletin xa nggur pilei horamue tei xa mak e hisok, nggoni ngan xa di nggur pilei inou. E ngan xa di nggur pilei inou, nggoni ngan xa di nggur pilei ngan xa tesil nou namei. Vengan xa moletin xa be neta sav tang pe metemim, xi iaxa be eilep mak mu mili xamim vus pe met Hi.”#Mat 10:40; Luk 10:16; Sion 13:20
49E Sion biteni mi Iesu bit, “Suv, xamem matepus moletin tei xa di nggol rerat ninin tesa xil e hisom. Misak ni, xamem masep xole tengan napol ni ti mun vengan xa xi tave tei e xir ti.”
50E Iesu biteni mi moletin nan xil bit, “E‑e. Munasep xole ti, vengan xa moletin xa di tavae ti vatel xamim, xi di mos e rin namim.”#Luk 11:23
Iesu misel xat moletin xil tengan linem kuhi mu xosxa labit lihusili
Mat 18:19-22
51Melele xa melengien bemei sangas tengan Iesu ihe ut nesao, xi pol ni nenemien nan tengan vahe Serusalem.#Mak 10:32 52Ma misil rut moletin nan xil tengan ladiamu ni laba. Xil labe metimal tei na mol‑Sameria xil tengan lasak mesen holesok xil ven. 53E moletin xil te metimal ak labit Iesu nava ti visal xil vengan lakila xa Iesu di nggusil suse nan tengan vahe Serusalem.#9:53 Melele xa Siu xil tetiamu latexo provins te hal Kaleli tengan lave taon te hal Serusalem e provins te hal Sudea, xil latekakao latehur xoteh tan na mol‑Sameria xil melengien tol (3). E mol‑Isrel xil lateketeh tesa mi mol‑Sameria xil vengan xa mol‑Sameria xil latnave hortan xil ti te kantri te hal Isrel. E, neta sav xa mak, xil latehur tan xa mahulong. Teimun, mol‑Sameria xil latehit xil mun di lamot mi Hi na mol‑Isrel xil. E sexien te moten nae misav ni xil. Ve rin ak, mol‑Sameria xil latnamaal ti e melele xa latekila xa Iesu tehe Serusalem tengan vamot mi Hi. #Sion 4:9 54Melele xa Temis xal Sion lulong usili, iexalu mikat e lusis Iesu lubit, “?Suv, midep? ?Iem bei tengan malokei ve upang vaxo ut nesao mei vaa len xil?”#2King 1:10,12
55E Iesu biles e bul xat xalu. 56Di, Iesu del moletin nan xil laka sal labe metimal sav tei.
57E melele xa di laba, moletin tei bemei visal Iesu e biteni mini bit, “Ut xave uha en, inou nihusil xatuk.”
58E Iesu bit rilomun ni mini bit, “Asu xil#9:58 Sepinien xati teni bit, “fokis xil” xa langgoni kuli reran xil. E nggoni asu xil, lapol ni nunu mae e vangavul xil tang. vangavul te paten mae di, e tuman xil mun nunum mae di. E inou, Nat Moletin, tim savan xati tengan ningel kuhi en tovuol.”
59Iesu biteni mi moletin sav tei bit, “!Husil xat inou!”
E moletin ak biteni mini bit, “Bos tang, nihusiluk. E Suv, itiamu, umaen nou nitilomun niha, e nilaxat kuh tata navan ituxoh melele xa imat e nitihin ni.”
60E Iesu bit rilomun ni mini bit, “Ustokovein ngan xil xa lamat e neketen nae tengan litihin ngan xil xa lamat. E xouk iaxa umei uhithiten longeongen hos usil suse xa Hi mei ihe suv toto e meulien na moletin xil ixo en.”
61Moletin teimun bemei e biteni mini bit, “Suv, inou nihusiluk. E itiamu, umaen nou nitilomun niha e nisep ling kor ni vatimol navan xil.”#1King 19:20
62E Iesu biteni mini bit, “Moletin xa nggur kokot ni polien na Hi, e dutou sung, di minem holu usil naha xa testokovein ni, ma xi tapin ti tengan vahur polien ak.”
Επιλέχθηκαν προς το παρόν:
Luk 9: tvk
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2015, Wycliffe Bible Translators, Inc. All rights reserved.