Ñwaè' Matïìyoè 7
7
1“Wèe fa sa' bèe mo' ka', tɛ a bo sa' wèe ka', 2njobè' njɛ̀ɛ njì ce wèe ce sa' bèe mo' ku ba njɛ̀ɛ njì ce a be kèe sa' wèe. Njɛ̀ɛ njì ce wèe à gèe yuu nè bèe mo' ku ba njɛ̀ɛ njì ce a be gèe nè wèe foŋ. 3Wɛ̀ mà'shi ntaaŋguu nje rlìr njep wɛ̀, a ce fyɛ' ba ŋkʉ̀' ce ce yi yu nfʉrò nje rlìr njokɛ? 4Àde' à laa nè nfʉrò enɛ̂, ‘Nàa rlir tɛ m koo wɛ̀ ŋkʉ̀' ce enjo,’ ce ntaaŋguu yu wɛ̀ nje rlìr, à njɛ̌ɛ kɛ? 5Wɛ̀ ce à yu ŋwɛ̀ mbo'ni, fʉr ntaaŋguu ce e yu nje rlìr nje wɛ̀ wɛɛ, tɛ à bo yɛ ŋkʉ̀' ce ce yi yu nje rlìr nje nfʉrò bòŋboŋ, ka' fʉr. 6Fa fa yuu ce yi yu rara à bsii Nyʉ̀ nè ŋgwe ka'. Fa mà' yo yuu bòŋboŋ se nè ŋkǔnyàm ka'. Wɛ̀ ka' ma' nè ŋkǔnyàm banɛ ŋkǔnyàm yi be nyɛ̀ŋshi nè mkùu, bèeŋger koo wɛ̀, ceeshi à btete à btete.
7“Bipshi nè tɛ a bo fa nè wèe. Ròo nè tɛ wèe bo yɛ. Kùushi nè tɛ a bo mʉ̀' kèŋ nè wèe. 8Yi yu wa' njobè' ŋwɛ̀ wɛɛwɛ ce e ka' ce loo, banɛ e be koni. Ŋwɛ̀ ce e ka' ce ròo, banɛ e be yɛ. Ŋwɛ̀ ce e ka' ce kùushi, banɛ a be mʉ̀' kèŋ nè ye. 9Ŋwɛ̀ efa wěe mʉ ce muu yì à ka' loo brɛ̂d, e fa ye ba lùr yu nda? 10Wà' muu à ka' loo nca, e fa ye ba nyo a? 11Wèe ce wèe yu ŋgǎa ŋgèe buu bbebep, wèe ka' riŋ à rfa buu bbòŋboŋ nè boo wee, yi ba yi kɛ àmbò yè Ta embe bùu. Mbò e be fa yi buu bbòŋboŋ se nè bèe ce a loo enɛ e fa wowèe a? 12Banɛ yuu ce wèe ka' ce kòŋ enɛ bèe mo' a gee nè wèe, wèe gee yuu anà nè bèe mo' foŋ, njobè' yi yu mbe ŋwǎ' mncir ba mŋwǎ' ŋgǎa ncep ntuu Nyʉ̀ wa'a.
13“Niŋ njǐ à cǔu ŋka' ce yi yu yi'sè, njobè' cǔu ŋka' ce yi yu bɛ̀bɛr ba nduunjì ce yi yu bɛ̀bɛr yi ce dù ba à dì' rkwe ce nfesè, bèe ce a ce niŋ à cǔu ŋka' anà a ba gòr. 14Cǔu ŋka' yǐ yi'sè ba nduunjì yǐ yi'sè yi ce dù ba à dì' rcu ce nfesè, bèe ce a ce yɛ yi, a ba mʉcàr.
15“Lòr nè nfè' nè bèe ce a ce nya' mnde' enɛ a wowèe ŋgǎa ncep ntuu Nyʉ̀. Wowèe a ce vʉ̀ à ryɛ wèe, ma' ŋgùp njèe, wɛ̌ fyɛ' njep mʉ, wowèe a ba àmbò bkuura ce vi ce ròo yuu ye. 16Wèe be rìŋ wowèe nè yàp ndèe. Wà' àde' bèe a kʉʉ lèemʉ embe mnòo a? Wà' àde' bèe a kʉʉ piyà embe msini a? 17Yi ku ba foŋ enɛ mbǎŋ bòŋboŋ yi ke yʉ mbe ce bòŋboŋ, mbǎŋ bebep yi yʉ mbe ce bebep. 18Àde' mbǎŋ bebep yi yʉ mbe ce bòŋboŋ ka', àde' mbǎŋ bòŋboŋ yi yʉ mbe ce bebep ka'. 19Ce ce yi ka' tɛ yʉ bòŋboŋ ka', banɛ a be gwàr, mà' njep mor. 20Banɛ wèe be rìŋ ŋgǎa nya' mnde' ca nè yàp ndèe.
21“Yu ŋwɛ̀ wɛɛwɛ ce e ce làa nè mɛ̀ enɛ̂, Tatâ, Tatâ, ce e be kèe niŋ mbe dǐ' kʉʉ Nyʉ̀ ka'. Ŋwɛ̀ ce e be kèe niŋ mbo yu ba ŋwɛ̀ ce e ce gèe yuu ce yà Ta embe bùu ce kòŋ. 22Be kèe ba à nòŋ anà tɛ bèe magòr a laa nè mɛ̀ enɛ̂, ‘Tatâ, Tatâ, mbò wèr à m cep yo ntuu a wɛ̌ rlii, a fʉr byʉ' mnyʉ̌mkà' enjep bèe, a gee buu bghagha' a wɛ̌ rlii a?’ 23Wowèe a làa wa'a, tɛ m laa nè wowèe enɛ̂, ‘Mɛ̀ rìŋ wèe ka'. Lò nè efa mɛ̌ geŋ, wèe ce wèe yu ŋgǎa ŋgèe buu bbebep.’
24“Banɛ ŋwɛ̀ ce e ka' yu' buu ce mɛ̀ làa na, gee vi, ŋgàŋ yu àmbò ŋwɛ̀ bfee ce e m bà'ri yì ndap mbendù ryɛɛ, 25mbèŋ à gwê, mdip mi ruu, fu' yi caa a ci' ndap anà sê, e ke' gwe ka' njobè' a m boo kùu efa gho mbendù ryɛɛ. 26Ŋwɛ̀ ce e ka' yu' buu ce mɛ̀ làa na, ke' gee vi ka', banɛ ŋgàŋ yu àmbò lʉr ce e m bà'ri yì ndap mbendù nsaruŋ, 27mbèŋ à gwê, mdip mi ruu, fu' yi caa a ci' ndap anà, e gwê, a koo yuu efa gho ka'.”
28Jisòs à ka' làa buu ca mìsi, ku' bèe anà a bɛɛŋgèr à ryɛ'nì ce e m yɛ'ni anà sê, 29njobè' e m yɛ'ni àmbò ŋwɛ̀ ce e m tʉr ŋger, a ke' yɛ'ni àmbò yàp bèe ce a m ba ŋgǎa ryɛ'ni mncir nà ka'.
Επιλέχθηκαν προς το παρόν:
Ñwaè' Matïìyoè 7: LNT
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Limbum New Testament © Bible Society of Cameroon, 2003.