Ñwaè' Joân 2
2
1Mnòŋ vi ka' ba btaar, bèe mo' a ce gèe Ŋkǎ' bgùu à rla' Kɛnà à ŋgǒŋ Galèlê. Ma yì Jisòs à m ba àfo. 2A m be Jisòs ba ŋgǎa yɛ'ni yì buu à ŋkà' ca foŋ. 3Mrù' ŋkà' ca mi ka' mì, ma yì Jisòs à laa nè Jisòs enɛ̂, “A no mrù' mi sɛ̂.” 4Jisòs à laa nè ye enɛ̂, “Njeŋwɛ̀, à ce làa ba nè mɛ̀ njokɛ? Nfè' yà à be ghɛɛ ka'.” 5Yì ma à laa nè ŋgǎa mfà' enɛ̂, “Gèe nè yuu ce e ka' suŋ wèe enɛ wèe gêe.” 6Mntʉŋ blùr vi m ba àfo vi ntuunfu. À m ba mntʉŋ ce Jus a m ce tɛr mdip njo tɛ a bo ce sù'si nyor àgho, ce ba brara à bsii Nyʉ̀. Àde' bgalòn mdip vi m ba ku du njep ntʉŋ mò'sir àmbò mmbaa du ba' mntaar wa'a. 7Jisòs à laa nè ŋgǎa mfà' enɛ̂, “Tu' nè mdip cu'ni njep mntʉŋ ca.” Wowèe a m tu' mdip a cu'ni njep mntʉŋ anà mi ruu àgho wɛɛwɛ. 8Jisòs à laa nè wowèe enɛ̂, “Sɛpsi nè mdip anà du fa nè ŋwɛ̀ ce e ce gàpshi buu ŋkà'.” Wowèe a m ku gee àmbò e m làa. 9Ŋwɛ̀ rgàpshì à yu'shì mdip ce mi m bèeŋger à mrù' na, a riŋ fàdì' mi lò ka'. Geewa'a ŋgǎa mfà' a m rìŋ fàdì' mi m lò. E kɛ' ndùu gùu, 10a laa enɛ̂, “Bèe a ke tar bèe, vʉ nè mrǔ' mbòŋmboŋ entombì, bèe a no yu' wɛɛ, e ka' vʉ nè mì ce mi bòŋ gòr ka'. Wɛ̀ gèe yo jɛɛ. Wɛ̀ lòr mrǔ' mmbòŋmboŋ a tar bèe àgho ba àlʉ̀simbùu.”
11Yuu ghagha' ce Jisòs à m gèe à rla' Kɛnà à ŋgǒŋ Galèle na, à m ba ncòo entombì ce e m dùŋshi njɛ̀ɛ fòo ce e tʉr. Ŋgǎa yɛ'ni yì buu a ka' yɛ, a byemi nè ye.
12A ka' ye ŋkà' mìsi, Jisòs ba yì ma ba bfʉr vi ba ŋgǎa yɛ'ni yì buu a natì a du à rla' Kàpanùm a cu àfo à mʉ mnòŋ mo'.
13Nfè' à m kɛ̀' a ce ghɛɛ ce bèe Jus a ke ye Ŋkǎ' càasi-mndap. Jisòs à du à rla' Jɛ̀rusalɛ̀m tɛ e bo ye ŋkà' anà foŋ. 14E ka' dù bà', a niŋ mbe Ndàp Nyʉ̀ a yɛ àmbò bèe a ce fyèni nà', ba njèe, ba bbèŋ a ker yɛ àmbò bèe a ce kupse mbàa mbo. 15E lor kʉ̀ a gee ŋgwàa àgho, a juu bèe anà àgho, a ker juu yap njèe ba yap nà' embe Ndàp Nyʉ̀. E m bùte btɛbùr ese bèe ce a m ce kupse mbàa nà, a da'si yap mbàa anà à nshè. 16E m làa nè bèe ce a m ce fyèni bbèŋ nà enɛ̂, “Lòr nè buu anà duse àgho. Wèe à gèe ndap yà Ta à kʉtì ndap ntaa njokɛ?” 17Ŋgǎa yɛ'ni yì buu anà a ka' yɛ àmbò e gèe wa'a, wowèe a kuushì yuu ce a saŋ mbe Ŋwǎ' Nyʉ̀ enɛ̂, “Njɛ̀ɛ rkòŋnì ce mɛ̀ tʉr nè yò ndap li be yʉ mɛ̀” nà.
18Jus a laa nè ye enɛ̂, “Yuu ce àde' à gee àmbò ncòo à rdùŋshi wèr enɛ à tʉr ŋger à rgèe buu ca, yu kɛ?” 19Jisòs à beesì nè wowèe enɛ̂, “Wèe ka' sa' Ndap Nyʉ̀ ca, m lor mnǒŋ btaar ba'rî.” 20Wowèe a laa enɛ̂, “Habai! A m bà'ri Ndap Nyʉ̀ ca à bfè' ncòp-ntuunfu-à-mŋkyèe. Àde' à gee wɛ kɛ ka' ba'ri à mnǒŋ btaar?” 21Geewa'a Jisòs à m ce làa àmbò Ndap Nyʉ̀ ca, a ce làa ba àmbò yì nyor. 22E ka' lǒ fʉʉ efa rkwe, ŋgǎa yɛ'ni yì buu a kuushì yuu ce e m làa anà. A ka' kuushi, a byemi yuu ce Ŋwǎ' Nyʉ̀ yi làa, a ker byemi yuu ce Jisòs à m làa anà.
23Jisòs à ka' ce ye Ŋkǎ' càasi-mndap à rla' Jɛ̀rusalɛ̀m, a duŋshi mncòo, vi gee bèe magòr a byemì nè ye sê. 24Geewa'a, e m fa yì nyor nè wowèe ka' njobè' e m rìŋ mntee bèe wɛɛwɛ. 25Mbùu mò' à m ker ba àgho enɛ a suŋ ye àmbò ŋwɛ̀ ka', njobè' e m rìŋ buu ce bèe a ce kwà'shi wɛɛ.
Επιλέχθηκαν προς το παρόν:
Ñwaè' Joân 2: LNT
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Limbum New Testament © Bible Society of Cameroon, 2003.