Ñwaè' Joân 18
18
1Jisòs à ka' làa buu ca wɛɛ, a lor ŋgǎa yɛ'ni yì buu, a wowèe a du a tuu ntòŋ Kɛdròn fàdì' ce ŋka' bce yi m ba. E m niŋ mbo a ŋgǎa yɛ'ni yì buu anà. 2Judàs ce e m fyèni ye nà, ye ye à m rìŋ dì' anà njobè' Jisòs ba ŋgǎa yɛ'ni yì buu wèe a m ce dù mbe dì' anà cɛ'cɛ'. 3Yi ka' ba wa'a, e koo kʉr bsoogɛ̀ ba ŋgǎa rkè'ni Ndap Nyʉ̀ ese ŋgǎa taŋshi taŋshì ba Farìsî, a wowèe a ka' ce dù, a lor blam a cʉ', a bɛrsi msùsùŋ, a lor buu bìr.
4Jisòs à m rìŋ buu ce vi be koni ye wɛɛwɛ. A ka' rìŋ wa'a, a fʉʉ a laa nè wowèe enɛ̂, “Wěe ròo ba nda?” 5Wowèe a beesì nè ye enɛ̂, “Wèr ce ròo ba Jisòs ce à rla' Nasarɛ̀t.” Jisòs à laa nè wowèe enɛ̂, “A mɛ̀ ye.” Judàs ce e m fyèni ye nà à m tɛɛ a wowèe. 6Jisòs à ka' làa nè wowèe enɛ̂, “A mɛ̀ ye”, wowèe a kʉtì njìnjì a gweŋger à nshè. 7E ker bipshi nè wowèe enɛ̂, “Wèe ce ròo ba nda?” Wowèe a ker laa enɛ̂, “Jisòs ce à rla' Nasarɛ̀t.” 8Jisòs à beesì nè wowèe enɛ̂, “Mɛ̀ suŋ wèe wɛɛ enɛ a mɛ̀ ye. Yi ka' ba enɛ wèe ce ròo ba mɛ̀, wèe ma'shì tɛ bèe ca a duse.” 9E m làa wa'a tɛ yi bo kù ghɛɛte àmbò e m làa enɛ̂, “Mɛ̀ bʉsi ŋwɛ̀ mò' efa mʉ̀ bèe ce wɛ̀ m fa nè mɛ̀ nà ka'.”
10Awɛ Saimʉn Pità ce e m tʉr sà', à co' embà rùu, a tee tù' mà' ese ŋkwàa ŋwɛ̀ ce e m ba tu nè ŋgǎa taŋshi taŋshì. A m ce too ŋkwàa anà enɛ Markùs. 11Jisòs à laa nè Pità enɛ̂, “Kʉsi kàafà' mbà rùu. M fa no njep ndoŋ ce Tàr à fa nè mɛ̀ na ka' a?”
12Ŋwɛ̀ ce e m ba tu nè bsoogɛ̀ ba ŋgǎa ke'ni Ndap Nyʉ̀ a m koo Jisòs a kur, 13a du àgho a yɛ Anàs entombì. Anàs à m ba talu yì Kaifàs ce e m ba tu nè ŋgǎa taŋshi taŋshì à fè' anà. 14Kaifàs ca a ŋwɛ̀ ce e m cep Jus enɛ yi yu bòŋboŋ enɛ ŋwɛ̀ mò'sir kwe àtu bèe nà.
15Saimʉn Pità ba ŋwɛ̀ yɛ'ni yì buu mò' a m dù àmbùu Jisòs à nfè' anà. Ŋwɛ̀ ce e m ba tu nè ŋgǎa taŋshi taŋshì à m rìŋ ŋwɛ̀ yɛ'ni buu Jisòs anà. E niŋ a Jisòs mbe mambe ŋwɛ̀ ce e m ba tu nè ŋgǎa taŋshi taŋshì anà. 16Pità à m tɛɛ yi ba njep ncʉ̀ʉndʉ̀' njepmbè. Ŋwɛ̀ yɛ'ni buu Jisòs mò' à m ba àfo ce ŋwɛ̀ ce e m ba tu nè ŋgǎa taŋshi taŋshì à m rìŋ. E m fʉʉ njepmbè a laa nè muunje ce e m tɛɛ à ncʉ̀ʉndʉ̀' enɛ e ma'shi, e lor Pità a ye a niŋ mbe mambe cà. 17Muunje ce e m ke'ni ncʉ̀ʉndʉ̀' nà à laa nè Pità enɛ̂, “Mbò à yu mò' efa ŋgǎa yɛ'ni buu ŋwɛ̀ ca lɛ?” E laa enɛ̂, “M yu mò' ka'.”
18Ŋgǎa mfà' ba ŋgǎa rkè'ni Ndap Nyʉ̀ a m fyɛɛshi mor a tɛɛ a ce yɛr njobè' mbɛp à m ce fute sê. Pità ye ye à m dù a tɛɛ a ce yɛr mor a wowèe.
19Ŋwɛ̀ ce e m ba tu nè ŋgǎa taŋshi taŋshì na à m bipshi buu nè Jisòs a kuu ŋgǎa yɛ'ni yì buu, ker ba li ryɛ'nì. 20Jisòs à beesì nè ye enɛ̂, “Mɛ̀ làa buu àwaŋ nè bèe wɛɛwɛ. Mɛ̀ m ce yɛ'ni bèe à nfè' wɛɛwɛ à mndap mloo, ba mbe Ndàp Nyʉ̀, ce yu bdì' ce Jus a ke vʉ̀ ce tarte. Mɛ̀ làa yuu mo' à bsʉ̀ti ka'. 21À ce bipshi nè mɛ̀ njokɛ? Bipshi ba nè bèe ce a m yu' buu ce mɛ̀ m ce làa nè wowèe. Wowèe a rìŋ buu ce mɛ̀ m làa.” 22Jisòs à ka' làa wa'a, ŋwɛ̀ rkè'ni Ndap Nyʉ̀ mò' ce e m tɛɛ a yě geŋ à lip ye nè bo a laa nè ye enɛ̂, “Haba! Wà' a njɛ̀ɛ njì ce àde' à beesì yuu nè ŋwɛ̀ ce e yu tu nè ŋgǎa taŋshi taŋshì a?” 23Jisòs à beesì nè ye enɛ̂, “M ka' laa wa'a, fàa ba njo, à suŋ fàa anà. Ka' ba enɛ mɛ̀ làa yɛɛnì, wɛ̀ ka' lip mɛ̀ njokɛ?” 24Anàs à lâa, a lor ye àmbò a m kur nà, a dù àgho, a yɛ Kaifàs ce e m ba tu nè ŋgǎa taŋshi taŋshì.
25Saimʉn Pità à m ku tɛɛ a ce yɛr mor. Bèe mo' a laa nè ye enɛ̂, “Mbò à yu mò' efa ŋgǎa yɛ'ni buu ŋwɛ̀ anà foŋ a?” Pità à kanì a laa enɛ̂, “M yu mò' ka'.” 26Mò' efa ŋgǎa mfǎ' ŋwɛ̀ ce e m ba tu nè ŋgǎa taŋshi taŋshì nà, ce e m ba ràrǎ ŋwɛ̀ ce Pità à m tee yi tù' nà, à m làa nè Pità enɛ̂, “Mbò mɛ̀ m yɛ wèe ye mbe ŋka' bce a?” 27Pità à ker kani. E ka' kani wa'a, nduŋgʉp à ku toŋ.
28À ka' ba à mʉ ŋgàptʉ', wowèe a lor Jisòs embe mambe Kaifàs a du àgho mbe nto' yàp govanò. Wowèe a ka' vʉ̀, a niŋ mbe nto' ka' njobè' wowèe a m ce kòŋ à rba brara à bsii Nyʉ̀ tɛ wowèe a bo ye yap Ŋkǎ' càasi-mndap. 29Yi ka' ba wa'a, Pailɛ̀t à fʉʉ njepmbè a laa nè wowèe enɛ̂, “Wèe à koo ŋwɛ̀ ca a vʉ àgho enɛ e fàa kɛ?” 30Wowèe a beesì nè ye enɛ̂, “Ŋwɛ̀ ca à ka' tɛ bà ba ŋwɛ̀ ŋgèe buu bbebep ka', wèr à ba koo ye vʉ̀ àgho fa nè wɛ̀ ka'.” 31Pailɛ̀t à laa nè wowèe enɛ̂, “Lòr nè ye du sa' ye àmbò ye ncir yi yu.” Wowèe a laa enɛ̂, “Wèr tʉr ŋger à rsa' ŋwɛ̀ yʉ ka'.” 32Cena yi m ba wa'a, tɛ nlàa ce Jisòs à m làa kuu njɛ̀ɛ rkwe ce e be kwe nà yi bo kù ghɛɛte njo.
33Pailɛ̀t à kʉtì mbe nto' a kɛ' Jisòs a laa nè ye enɛ̂, “A wɛ̀ ŋkʉʉ Jus a?” 34Jisòs à beesì enɛ̂, “Yuu ce wɛ̀ bipshi na, à ku kwa'shi ba wɛ̀ kɛ̀ à suŋ bèe mo' a suŋ wɛ̀ a kuu mɛ̀?” 35Pailɛ̀t à beesì enɛ̂, “M yu ŋwɛ̀ Jus ka'. Bèe ce a vʉ̀ nè wɛ̀ a fa nè mɛ̀ yu yò bèe ker ba bèe efa wǎp mʉ ce a ke taŋshi taŋshì nà. Wɛ̀ gèe ba kɛ a ka' koo wɛ̀ a vʉ àgho?” 36Jisòs à beesì enɛ̂, “Ya kʉʉ yu yì enjep ŋgòŋ na ka'. Ya kʉʉ à ba ba yì enjep ŋgòŋ na, yà bèe a ba bèe yà njì, rè bkòr fà dì' a fa mɛ̀ mbà mmbo Jus ka'. Yi yu enɛ ya kʉʉ yi lò ba enjep ŋgòŋ na ka'.” 37Pailɛ̀t à laa nè ye enɛ̂, “Banɛ à yu ŋkʉʉ a?” Jisòs a beesì enɛ̂, “To wɛ̀ làa wɛnɛ m yu ŋkʉʉ. A m bi mɛ̀ njep ŋgòŋ na, mɛ̀ vʉ̀ mɛnɛ m bo suŋ bèe àmbò yuu mini. A mbùu ce a m bi mɛ̀ njep ŋgòŋ na. Ŋwɛ̀ ce e ka' tɛɛ njep mini, a ŋwɛ̀ ce e yu' wa blàa.” 38Pailɛ̀t à laa nè ye enɛ̂, “Mini anà yu kɛ sê?” E ka' làa wa'a, a ker fʉʉ embe nto' a yɛ Jûs, a laa nè wowèe enɛ̂, “Mɛ̀ yɛ yuu bebep mò' ce ŋwɛ̀ ca à gèe ka'. 39Yè ndèe mò' yu enɛ a ka' ce ye Ŋkǎ' càasi-mndap, m fʉr ŋwɛ̀ mò' embe shaŋ, fa nè wèe. Wèe ce kòŋ weenɛ m fʉr ŋkʉʉ Jus fa nè wèe a?” 40Wowèe a waa enɛ̂, “Ài', fa fʉr ba ye ka'. Fʉr ba Bàrabàs fa nè wèr.” Bàrabàs ca à m ba ŋkep.
Επιλέχθηκαν προς το παρόν:
Ñwaè' Joân 18: LNT
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Limbum New Testament © Bible Society of Cameroon, 2003.